احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الخميس، مارس 18، 2010

افراااااااااااااح 2010...

من عمايل ايد .... мαησηα بالظبط الساعة 8:46 م

سالخير عليكوا .. 

البوست ده طويل .. بس مش ممل 

معايا شوية افراح علشان تفرحوا معايا 

لان الفرح مش هيبقالوا طعم غير بيكوا 

امبارح بعد الساعة 12 يعنى ف اول ساعات النهاردة 

قلت اما احطلكم بوست انى مبسوطة ده 

وصحيت من النوم متفائلة كده ومجددة املى ف ربنا واملى ف ان الدنيا اكيد هتحلو 

المهم بقه روحت الشغل لقيت خبر بجد كنت مستنياه من كتيييييييير اوى 

لقيت رغدة وهى من اعز اصحابى اتخطبت 

ايون احنا كده شلة خبيثة هههههه بنخبى لحد ماالموضوع يتم 

فرحت جدااااااااااااااااااااااااااااااا جدااااااااااااااااااااااا 

بجد انا بقالى سنتين بدعيلها ربنا يكرمها بالزوج الصالح والحمد لله اخيرااااااااااا هاطمن عليها 

رغدة : بجد انا بموت فيكى يمكن نكون بعدنا شوية لكن اقسم بالله انى بحبك جدااااااا 

وبتمنالك الخير دايما والسعادة والهنا 

عارفة انا بحس انك بنتى اه والله وبحب حنيتك اوى 

رغم انك اسد بس مش عليا هههههههه 

ربنا يارب يتمم فرحتك بالخير وتعيشى وتفرحى

 ويباركلك ف ايهاب ويجعل ايامكم كلها حلوة 

ويملى حياتك فرح على قد الخير اللى ف قلبك

هتوحشينى لما تسافرى اوى 

======================

قبلها صحيح نسيت اقولكم ان زوزو كمان اتخطبت وانكتب كتابها يوم ميلاد ملك 

كان يوم حافل هههههههههههه 

معلش يا زوزو انا نسيت اعملك بوست بس انا وقتها كنت ف  وادى تانى 

ربنا يكرمك ويهنيكى ويوفقك ويسعدك يارب ويملى حياتك فرح على قد الخير اللى ف قلبك 

اللهم امين

هتوحشينى يا زوزو  انتى كمان لما تسافرى 


==================================

تالت خبر حلو .. اختى  سمو الاميرة سارة 


نجحت ياولااااااااااااااااااااااااد اه وربنا 

كنا فاقدين الامل فيها 

الف مليون مبروك يا سارورتى يابنتى يا حبيبتى 

ربنا يارب يفرحنا بيكى دايما ونكون دايما فخورين بيكى وبنجاحك 

قولى امين يابنت 

=========================

حصلت حاجة غريبة جدا 

بعد ما عرفت خبر خطوبة رغدة وهيصتلها وقمت لها بالواجب 

" ايون انا مديرة بس دول بناتى لازم ازغرطلهم وافرحلهم واغنيلهم 

وبتحول لام العروسة ساعتها هههههههههههه 

سالتها اسمه ايه ؟ قالتلى ايهاب 

استغربت الاسم جداااااااااا 

محدش يقولى ليه ؟ هههههههه 

اصل انا ايهاب ده كان بعيد عن دماغى خالص كنت دايما متخيلاها هتتجوز محمد 

محمود مثلا مصطفى 

وده ف الاوقات القليلة اللى كان ممكن اتخيل فيها رغدة عروسة هههههههههههه 

اصل رغدة دى اصلا تحسها راجلنا اوى اشد منى كمان 

زينب كمان جوزها اسمه عبد الحميد 

سرحت كده وقلت ياترى هيبقى جوزى اسمه ايييييييييييييه ؟ 

وساعتها افتكرت كمية العرسان زوى الاسماء العجيبة 

واخرهم السباعى ههههههههه اللى اتقدمولى 

والحمد لله ان ساعتها اتقالت الجملة المشهورة " معلش مافيش نصيب " 

محدش يقول انى هايفة علشان بركز على الاسم بس

ولادى مالهموش ذنب ابوهم يبقى اسمه غريب

وانا يعنى ادلعه ازاى يعنى لو اسمه غريب ومالوش دلع 

الله مش ده حق من حقوقى افرط فيه يعنى ههههههههههه 

هى هيافة بس اعملوا نفسكوا اقتنعتوا 

يوووووووووووه رغيت وخرجت عن الموضوع 

المهم اذ فجاتنننننن كده وانا سرحانة ف حكاية اسم زوجى العزيز 

الاقى رضا وهى دادة عندنا داخلة تجرى عليا وتقولى يا ميس يا ميس

مين دووووووووول ؟؟ 

انا : مين دول ايه ؟ يابنتى انا ناقصة جنانك مش كفاية الاتنين التانيين 

ودول الاتنين داداة التانيين

هاكتبلكم بوست عنهم لما ازود جرعة النكد علشان اضحكوا شوية 

وتعرفوا معاناتى معاهم المهم
   
نكمل 

رضا : (ماسكة ربع جنيه ورق ف ايديها هاوريلكم صورته (

والكلام المكتوب عليه 

اهون اهو 



لقيتها بتسالنى مين دوووول على امانى وسامح 

ههههههههههه 

هى بتهزر طبعا بس كمان لقيتها بتقولى 

ميس منى دى بشرة خيييييير 

قالتلى هيبقى اسمه احمد 

بقولها مين ده قالتلى جوزك ان شاء الله 

استغربت اوى من الفكرة كلها 

ان ليه وانا قاعدة بفكر ف الموضوع ده الاقى الحكاية دى كلها تحصل 

انا اخدت منها الربع جنيه ده ووريتهولهم ف البيت 

كل ده بحسبنى بيتهيألى 

الاغرب بقه بجد انا جيت البيت حبيبت اصور الربع جنيه ده 

فعايزة احطه على حاجة لقيتنى حطيته على كتاب وصورته 

بعد ماصورته بشيل الربع جنيه لقيتنى حاطاه على كتاب اسمه 

ابتسم للدنيا " لـــــــ محمد عفيفى 

ههههههههههههههههههه 

ساعتها قلت صح والله علشان صحيت مبتسمة للدنيا 

ربنا بعتلى رسالة وبيقولى  ماتييأسيش وعافرى مع حلمك 

هتوصلى لحلمك وحلمك هيوصلك 

على فكرة

حلمى 

" ده مش اسم واحد على فكرة هههههههههه 

  حلمى مش بس انى اتجوز علشان الجوزا نفسه لا حلمى ده ليه حكاية تانية 

هاحكيهالكم يوم تانى بقه ههههههههههههههههههه

======================

انا كنت متفائلة جدااااااا ف اول 2010 

والحمد لله ربنا مخيبش ظنى كلها افراح تقرريبا كل شهر فيها فى ع الاقل 

حاجتين يفرحوا 

بس يااااااااااااااااارب تكمل ماتجيش لعندى وتقف 

يووووووووووه  بردو رجعت اتشائم تانى ههههههههه 

انا فقر معلش معلش 

يلا بقه تصبحوا على خييييييييييير  وهنا 




25 داقوا الشاى وقالولى رأيهم:

غير معرف يقول...

مبرووووووووووك لكل المناسابت الحلوة دى
وعقبال مانفرح بيكى ياقمر

P A S H A يقول...

ربنا يجعل أيامك كلها فرحة وهنا وسرور ويوفقك ويكرمك ويفرح قلبك ويريح بالك ويحفظك من كل سؤ . اللهم آمين


:))

تحياتي

sony2000 يقول...

مبرووووووووووووك مبروك للاخبار الحلوه دي
وعقباااااالك كدا
اللهم امين
تقبلي مروري وتحياتي

sony2000 يقول...

وبعد اذنك ضفت مدونتك حدايا

أع ـقل مـ ج ـنـونــة يقول...

هههههههههههههه

ربنا يجعلها سنة سعيدة عليكي ويحقق احلامك كلها :)

وبجد مدوناتك جميلة جدا

تقبلي مروري وزيارتي ويارب اكون خفيفة عليكي ^_^

تحيـــاتي .. ومبروك لرغدة واماني واسامة وايهاب وعقبالك يارب :)

قلم رصاص يقول...

ألف مبروك لكل اللي اتخطبوا واتجوزوا وانتي هنيتيهم هنا

والف مبرووووووك لاختك سمو الاميره ساره على النجاح ومزيد من التميز دايما

بصراحه البوست بتاعك طويل جدا وعاوز يترد عليه في صفحتين .. بس رغم كدا اجبرني اكمله لأنك فعلا كارثه والمصنع اللي عملك قفل على رأينا المصريين وملكيش قطع غيار في مصر هههههههههههههه

وعلى رأي اخواننا الفلطسينين:

الله خلقك وكسر القالب
هههههههههههههههه

__________________

السبااااااااااااااااااعي ؟!

ههههههههههههههههههههه

انا قعدت اضحك لما كنت هفقد الوعي

دا الواحد طلع هيثم بقى جنب السباعي دا
!

يلا عقبال خطوبتك وفرحك قريب ان شاء الله

ونيجي كلنا نبارك لك يارب

تقبلي مروري وتحيتي

Tamer Moghazy يقول...

ضحكتيني والله بجد.
ويارب ايامك كلها فرح وسعادة وعقبالك وقريبا نبارك لك كلنا..
عل فكرة انا باقتنع نه الاسماء بتضفي طباع على اصحابها وبتديهم لمحة من اسمهم :)
ده راي شخصي :D

أسماء حسين يقول...

هههههههههههههه
انتى بسطتينى أوى والله يا بنوتة معاكى
الف مبرووووك لكل اللى بتحبيهم فى أفراحهم وربنا يكتر أفراحك ويخليكى دايما سعيدة وجامدة وبتعافرى يارب
بس بالنسبة لنقطة أسامى الخطاطيب دى
فى مفارقة مشابهة عجيبة حاصلالى
مش عارفة ايه حكايتى مع اسم أحمد
كل ما واحد يقول بيحبنى أو يتقدملى يطلع اسمه أحمد بيتهيألى انى عرفت أحمدات مصر كلها
لدرجة انى مصممة بغباء دلوقتى ماارتبطش باى حد اسمه احمد
:)
بس انتى ايه رأيك فى اسم حنظلة

سمع هوص (Abo 3li) يقول...

فعلا البوست مش ممل .. بس برضو مش طويل.. خضتيني في اوله..

اولا.. مبرووك لكل اصحابك.. وعقبالك يارب... بس متنسيش تعزمينا..

ثانيا.. مبروك لسارة.. بلغيها سلامي.. وانا بقولها مبروك.. لحسن هيا مكتبتش حاجة عن نجاحها في البلوج بتاعها وكاتبة حاجة نكد كتيير..ههههههههههه..

ثالثا ماله السباعي؟؟؟ تحسي كده انه جاي من السبعنة.. ههههههههههه...
بس ايه العالم البتبارك علي الربع جنيه دوول.. ميبركه علي جنيه كامل احسن..

تحياتي

beautiful mind يقول...

السلام عليكم
طبعا دي اول مرة ازور المدونة التحفه دي بجد والله
تسلم ايدك
والشاي طلع مظبوط ميه ميه هنا
المهم
البوست بتاعك دا طلعني من حالة الاكتئاب اللي ماشيه في البلد وخلاني اضحك وابتسم واعايش معاكي في الحكاية
ربنا يوفقك في حياتك
وان شاء الله اللي جاي اجمل
وتقبلي مني كل تحيه

طوبه فضه وطوبه دهب يقول...

ربنا يكرمهم ويفرحك ذيهم ويكتبلك عريس امور واسمه جميل يبقى احلى من اى حاجه تتوقعيها فى حياتك امال دا ربنا جميل اوى وحنين اوى بس انتى قولى يارب واوعى ااوعى تنسى تدعى لى معاك يا اجمل منون فى الدنيا

мαησηα يقول...

حنونتى .. الله يبارك فيكى يا عمرى

الله يخليكى حبيبتى عقبالك انتى كمان يارب

ميرسى حبيبتى على مرورك

мαησηα يقول...

شريف .. يارب اللهم امييييييين

ولك مثل مادعوتلى به

ميرسى على مرورك

мαησηα يقول...

سونى .. الله يبارك فيكى حبيبتى

عقبال ما افرح بيكىان شاء الله

ومبروووووك ليكى اهى اخبار

كانت بشرة خير ليكى

وبعدين بتستأذنى فى ايه يابنتى ده شرف ليا

ميرسى حبيبتى على مرورك

мαησηα يقول...

اعقل مجنونة ..

ههههه يارب ماتبلى هالضحكة ابداااااا حبيبتى

يارب اللهم امين عليا وعليكى حبيبتى

وانا وانتى وكل الناس يارب احلامها تتحقق

ده انتى نورتينى وبجد اسعدنى مرورك

يوصل ان شاء الله معرفش منهم غير ايهاب

هههههههههههه جبتى الاسامى دى منين ؟؟

هههههههههههه

мαησηα يقول...

قلم رصاص .. وربنا وربنا منورنى ياريس

بفرح بجد لما بشوفك متابع شعبك الغلبان

ههههههههه الله يبارك ف عمرك يارب

هههههههههههههههه الله على الجملة دى

الله خلقنى وكسر القالب

ميرسى بجد اخجلتم تواضعنا يا ريس

وبعدين ده من بعض ماعندكم ياريس

هههههههههههه وبعدين يا ريس ده انت سيد الناس

السباعى ده اول اسم اومال لو كملت بقيت الاسم

كنت عملت ايه ؟ ههههههههه

يارب اللهم امييييييييين وعقبالك ياريس لما ان شاء الله

تعثر على سيدة مصر الاولى يارب اللهم امين

اظن ضحكتك اهو بالــــ 200 بوست نكد

اهو اى خدمة هههههه

мαησηα يقول...

تيموووو .. ههههه

يارب ماتبلى هالضحكة اللى ضحكتها ابدا يارب

يارب يسمع منك انا وانت وكل الناس يارب

تمام .. صدقنى فعلا كلامك مظبوط

عارف الدليل ايه ؟ انهم بيقولوا ان ربنا بيسمينا اول مابيخلقنا

ان مجرد اختيار الاهل لاسماينا ده بيبقى كده

مهما اختاروا ف اسامى هو اسمك اللى ربنا خلقك بيه

فاكيد بيبقى طبع البنى ادم من اسمه

اتفق معاك ف رأيك الشخصى :)

نورتنى يا تيمو ماتغيبش عننا

мαησηα يقول...

بوكى .. واحلى واحد كابتشينو بيظبطلى دماغى

ههههههههههه يارب ماتبلى هالضحكة ابداااااا حبيبتى

الله يبارك ف عمرك ياسكرة

يارب اللهم اميييييييييييييييييين

هاتيلى احمد من عندك طيب هههههه

انا نفسى يتقدملى حد اسمه احمد

قولتيلى انتى بقه وانا اقول احمدات راحوا فيييييين ؟؟

طيب سيبيلى واحد يعنى اموت وانا نفسى فيه ههههههه

هههههههههههههههه حنظلة كويس هيطلع موضة كمان سنتين

هههههههههههههه

نورتينى ياقمر يارب يخليكى ليا

мαησηα يقول...

ابو على .. ههههههههههه

لا طويل يا راجل انا اصلى رغاية لما بفتح ف الكلام

مابتوصاش ههههههههههه

اولا : الله يبارك في عمرك يارب لا مش هنسى بس انت ابقى تعالى

ثانيا : الله يبارك فيك بلغتها والله وبتسلم عليك

اه اصل يوم نتيجتها دكتور هى بتعزه اوى اتوفى

فالحزن كان اكبر بصراحة

ثالثا : ههههههههههههههه مالوش انا قلت حاجة

هههههههههههه الناس بتنسى ان اسم منى ده رقيق

بيحسسونى ان ام السعد مثلا ههههههه ماعلينا

ياسيدى يباركوا فاى حتة المهم البشارة هههههههه

ميرسى لمرورك الطيب

نورتنى واسعدنى لفك ع المدونات كلها :)

يارب اكون عند حسن ظنك

мαησηα يقول...

بيوتيفل مايند .. ابراهيم

وعليكم السلام ورحمة الله وبركاته

تسلملى يارب نورتنى يا فندم والله

ههههههه الحمد لله طيب انه مظبوط

والحمد لله انى نجحت ف فك كرب حد

حكم الاكتئاب ده لوحده بلوة مش سهل تخرج منه

يارب ماتبلى هالضحكة ابداااااااا قول اميييييين

ويارب دايما تبقى سعيد ومتهنى ويبعد عنك اى اكتئاب

بس بلاش تقلب ف المدونة احسن هتتنكد هههههههههه خليك ف البوست ده

يارب يا ابراهيم يكون اللى جاى اجمل

ميرسى لمرورك ومجاملتك الرقيقة دى

نورتنى وشرفتنى

мαησηα يقول...

طوبة فضة وطوبة دهب .. حبيبتى ازييييييك ؟؟

بقالك كتير مش باينة والله لسه كنت هابعتلك ع الفيس امبارح

يارب اللهم اميييييييييييييييييييييييين يسمع من بقك ربنا يارب انا وانتى

وكل الناس يارب لا مش هانسى والله دايما بدعى لكل الناس

ربنا يفرحك يا قمرايتى زى مافرحتينى بتعليقك ده ويطمن قلبك ياسكر

سارة درويش يقول...

:) الله يبارك فيكي يا منونتي يارب

طبعاً انتي اكتر واحدة كنتي شايفاني بذاكر قد ايه وبتعب قد اييييييييه ههههههههههههههههه

عقبال يارب ما افرح بفرحك يااااااااااااارب

انا اتعلمت الرقص مخصوص علشان فرحك :)

محمد التركى يقول...

السلام عليكم ورحمه الله وبركاته
مدونتك جميله جدآ وأسمها هو اللى شدنى علشان أدخل وأشوف أيه أخبار الشاى عندك

بس بجد والله وبدون مجامله
جاااااااااااااااااااامد جدااااااااااا
ومن أجمل كوبايات الشاى اللى شربتها فى حياتى
بجد كلامك جميل جدا وتعبيراتك أجمل مع أنه كلام عادى
أنتى بتحكى حكايه بس طريقه كتابتك للأحداث جميله جدآ وتشد اللى بيقرء
بجد مدونتك جميله جدا ورائعه وأنا سعيد جدا جدا أنه كان ليا الشرف ودخلت هنا
وبقولك شايك جميل جدا هبقى أجى كتيييير
علشان أشربه عندك
أنتى كريمه ولا أى هتزهقى بسرعه
ربنا يجعلنى ضيف خفيف على قلبك

تقبلى مرورى الأول وليس الأخير بأذن الله

تحياتى وتقديرى

мαησηα يقول...

سمو الاميرة الناجحة ههههههههه ..

عقبال الليسانس يا حبيبتى يارب ..

اها انتى هتقوليلى على يدى ههههههههه ..

يارب اللهم امييييين

طيب خليكوا شاهدين لو مارقصتيش

ف فرحى انتى حرررررة

мαησηα يقول...

محمد التركى ..

وعليكم السلام ورحمة الله وبركاته

تسلم يارب ده من بعض ماعندكم

يارب اكون فعلا طلعت عند حسن ظنك بيا

تسلملى يارب ربنا يخليك بجد

كسفتنى بكلامك ده

انا اللى ليا الشرف

والله بزيارتك دى

بالف هنا وشفا ..

واحد شاى تحت امرك ف اى وقت

تنورها وتشرفها .. البيت بيتك

لا بخيلة جدااااااااااا

على فكرة هههههه والله مش بكدب

اكيد طبعا ضيف كريم عزيز

وخفيف ع القلب

نورتنى وشرفنى مرورك الطيب

 

ೋ واحــد شـاى ♨ Template by Ipietoon Blogger Template | Gift Idea