احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الأحد، سبتمبر 30، 2012

الحمد لله ♥

من عمايل ايد .... мαησηα بالظبط الساعة 12:07 ص 4 داقوا الشاى وقالولى رأيهم




الحمد لله ..

شكـــــــرًا ياحبيبي يارب 

♥♥


على باب الله
راضى بكل حال
على باب الله
عمر ماقلبى شال
ماتعودتش اسيب
لبكره فى يوم مجال
ماتعودتش اشوف
فى الناس غير الجمال
وبسامح مهما قالوا
ولا اشيل لوحتى شالوا



جميل انك تحس يانك راضي عن حياتك ونفسك 

يارب إرضينا كلنا بحياتنا 



الأربعاء، مايو 23، 2012

فــــــــــاطمة ♥

من عمايل ايد .... мαησηα بالظبط الساعة 1:47 ص 13 داقوا الشاى وقالولى رأيهم








دى فاطمة جول :) 

البنت التركية البسيطة حكايتها حكاية 

هابقى ارغيها بعدين 

بس كنت جاية اقول ان كلنا كنون النسوة بتمثلنا فاطمةجول 

كل واحدة مننا  اغتصب حقها ف الحياة بشكل ما

كل واحدة مننا اتعرضت لنفس مشكلتة فاطمة بس بشكل مختلف

مش بالضرورة زى ماحصل ف المسلسل

المهم انها ضاع حقها واتداست بالأقدام علشان المصلحة

اى مصلحة الا مصلحتها

كل واحدة مننا اغتصب حقها ف الفرحة زيها زى فاطمة جول بالظبط 


وكل واحدة مننا 

 محتاجة تحس بالامان محتاجة  الحنية من نصها الحلو 

محتاجة ان نصها الحلو يحسسها بقوتها


 ويقف جنبها لما تكون ضعيفة او مكسورة 

كلنا محتاجين حد نثق فيه 

 " محتاجين الثقة والامان والحنان اكتر مما تطلقون عليه  " الحب 

محتاجين الاهتمام 

محتاجين حاجات بسيطة اوى كلمة او وردة او حتى طبطبة وبس 

ع كتف الواحدة مننا بعد يوم طويل ومتعب 

كلنا فاطمـــــــــة جول 

 عزيزى الرجل ارجوك كن " كريمًا "


 ♥ ♥ 


وعلى رأى المثل كن لى كريمًا

 اكن لك فاطمة جول




وكريم ده هو كمان حكاية بس مش دلوقتى


فللحديث بقية مدام فى العمر بقية :)




♥ 


تصبحوا ع  انتخابات رئاسية لاول مرة ف مصر :)






الخميس، أبريل 19، 2012

الى اعز الاصدقاء ♥

من عمايل ايد .... мαησηα بالظبط الساعة 2:43 م 2 داقوا الشاى وقالولى رأيهم








البوست ده خصوصى :) 

لأعز وأول صديقة ليا فى حياتى كلها 

 ♥  خالتو 



عارفة يا خالتو حسيت إن كلمات الاغنية دى تنطبق عليكى بالظبط 

 "  قلبك بيبرق زى الماس وما تملكيش غير الاحساس 

غرقانه فى جروحك والامك

وبتداوى فى جروح الناس 

كلنا بنيجى نرميلك همومنا وانتى بتسمعينا كلنا 

وتصبرى علينا وتشيلى همنا وتفكرى لنا ف حلول ومحدش 

عارف يلاقي حل لهمومك 

بس انا بدعيلك .. كلنا بندعيلك يا جميلة القلب يا احلى خالتو وعمتو ف الدنيا كلها 

التصميم ده علشانك بحبك انا





الأحد، أبريل 08، 2012

أمورتى الحلوة .. عجزتنى♥

من عمايل ايد .... мαησηα بالظبط الساعة 12:34 ص 14 داقوا الشاى وقالولى رأيهم



امورتى الحلوة  الطمعة.. 

بقت أطعم.. .

 ولها سحر جديد

لــــــها خـــفة روح لــــما بتـــضحك بـــتروح لبعيد

لو شفتوا جمالها هتحتاروا .... تحتاروا تحتاروا

والبيض والسمر هيتداروا..... يتداروا يتداروا

والحب هيحصل فيه أزمة وتسعيرته هتزيد

تطول قد ما تطول تكبر قد ما تكبر

جوا القلب هتفضل زى الاول واكتر

دى حبيبتى ومش حبيبتى دا احنا اخـتين

والفرحة الواحدة منقسمها على ضحكتين

ياما نفسى اشوفها تتمختر فوق جنب الشمس

واكتب على باب السما يافطة ممنوع اللمس

توصل قد ما توصل تكبر قد ما تكبر

جوا القلب هتفضل زى الاول واكترررر



هي :

 " عصبية.. مـزاجية..متسرعة..متمردة ..نحيلة
  ..

شكاكة ..غيورة ..مجنونة ..مستفزة أحياناً

..تجادلنى  دائماً ..تتعبنى كثيراً ..

ورغم ذلك .. حنونة جداا "

 وأحبها جداً !!

 " ربما لأنى أعلم أنها : تحبنى بصدق .. تفهمنى بسرعة .. 

تخلص لى حد الموت !" 


مش علشان اختى الصغننة ..

او لانها بنتى الجميلة اللى بفرح بشوفتها وهى بتكبر قدامى .












" أستعيد براءتي بها "

بشوف نفسى اللى كان نفسى اكونها فيها

بتعيشينى من تانى عمرى اللى ما عيشتهوش صح :)










" أحبها حين تأتي إلي طائرةً بجناحيّ الفخر والفرحة .. 

تقتسم معي فرحتها بنجاحها، أو فرحتها بفكرة جنونية "




ببقى فرحاااااااااااااانة بيها

زى فرحة الحبيب اللى لاقى حبيبه بعد غياب :)







احياناً تكون طفلة بقلب برئ ، 

بسذاجة لا متناهية ..









 واحياناً اشعر انها عجوز فى الثمانين ،



 تفهم كل هذه الدنيا حتى زهدتها !!


بتعلم منها حاجات كتيييييييييير .. وبتوقف جنبى بحكمة وقوة

كأنها هى أختى الكبيرة مش العكس
 







“ أميرة قلبى وسارته ..

وحدكِ تمنحينني الأعياد .. أحبك  ♥

و لكِ وحدكِ أعتذر لأني لم أكن أبداً .. بالروعة التي تستحقينها !!!









" مابتشبيهيش على الكلام :)))) ... "
 
لأ مش هو :))))))))))))))

مش عارفة اعملك عيد ميلاد حلو زى اللى بتعملوهولى كل مرة :(

بس حسيت كلامك ده اوى اللى انتى كتبتيه على لسان السمراء التى ترهقها مشاعرها :)

قلت اما اغش منك شوية :)











المهم بقه كل سنة وانتى اختى وبنتى وصديقتى الصدوقة

ويارخمة صحيتى من النوم ومعرفتش اعملك اللى فى دماغى

طول عمرك كده بتلغبطيلى خططى :)

بس بردو ربنا مايحرمنيش منك ابدااااا

ومن موقعى هذوها احب اهدي لك هذه الكادوهاية:)

اخبطى هنا :)

هنا هنا يعنى :)





وكنتى عايزة فستان فرايحى

خوووووووووووووووووووووووووووودى :)







وكمان فى حاجة بصى بصى 










دول الناس اللى بيحبوكى

كلهم نفسهم يعملولك كده

قلب كبيييييييير قد قلبك

وملون بالوان الفرحة اللى بتلونى بيها حياة كل اللى تعرفيهم ♥

واولهم انا ♥
 

وكفاية بقه كده سيبينى انام علشان اعرف اعملك كادوهايتك الصبح

الجهاز طلع عينى :( 







اسيب هنا بقه واروح اعملها اللى نفسى فيه ف

الحرملك  ♥








لسه لسه اليوم ما خلصش :) 



الجمعة، مارس 09، 2012

زوواتى احلى عروسة ♥♥

من عمايل ايد .... мαησηα بالظبط الساعة 7:40 م 12 داقوا الشاى وقالولى رأيهم








 يا اهل بلوجر الكراااااااااااااااااااااااااااااااااااام 

طق طق طق طق 

اليكم هذا النبأ الهااااااااااااااااااااااااااااااااام 

انه فى يوم الخميس الموافق 8 مارس 2012 

تمت خطوبة زوواتى واختى اللى بموت فيها 

اجدع بنوتة فى مصر كلها 

كيارا هانم مولان :) 

كان نفسى اكون معاكى يا زوواتى واقرص ركبتك بنفسى

 علشان اقرصها بزمة ههههههه 

بس  انتى عارفة بقه 

بصى بصى انا اصلا طاااااااااااايرة من الفرحة والله وانتى عارفة 

ربنا يسعدك ويهنيكى حبيبتى وتفرحى على طول على طول 

وتنجزى بقه وتجيبيلى زوواتى صغنونة اهريها حب ♥


♥♥♥♥♥♥


انا شكلى هغير رأى فى 2012 

دلوقتى  عندنا تلات عرايس وعريس 

رانيا ليس فقيرا من يحب 

ميرا .. امرأة بعقل رجل 

وزوواتى ... كيارا مولان 

والعريس محمود فاوى .. صاحب قصر الرياسة  .. وديوان ذكريات فارس مهزوم 


الف مليون مبروك ليهم كلهم  .. ربنا يسعدهم ويهنيهم يارب 

يلا عايزين كمان خلينا كل يوم نفرح بقه شدوا حيلكم 

عايزين نقول للفرح هل من مزيد :)

♥♥♥♥♥

تصبحوا على فرحة ياااااارب 





الأربعاء، مارس 07، 2012

مذهلة ....

من عمايل ايد .... мαησηα بالظبط الساعة 8:58 م 6 داقوا الشاى وقالولى رأيهم





تقتلهم ملائكية قلبها  ...  فهى كما غناها محمد عبده مذهلة !!! 

بخط ايدى انا  :)






اسمعوا دى هتدعم الموقف شوية :)




♥♥

فاتيما .. انتى المذهلة :) 




الثلاثاء، فبراير 28، 2012

:(

من عمايل ايد .... мαησηα بالظبط الساعة 9:47 م 6 داقوا الشاى وقالولى رأيهم








(إسالوا نساء الأرض عن ألم تغيير الحكايات وأبطال الحكايات وطقوس الحكايات
عندما تتغير ملامح حكاياتنا 
نضطر لتغيير ملامح أحلامنا 
والعبث في أدق تفاصيلها التي تعاملنا معها على أنها نحت لن يزول ولن يتغير ! 
لكن النحت حين تملأه رمال الخذلان يتغير ويبهت ويزول! 

!!!!!!♥!!!!!!!♥!!!!!!!♥!!!!!!

الانتقال من حكاية لحكاية
يعني فرمتتنا!
يعني مسحنا داخليا! 
يعني إلقاء جزءا كبيرا منا في سلة المحذوفات 
وتكرار الحذف بعد الحذف بعد الحذف!


شهرزاد الخليج 

♥♥♥♥♥♥♥♥

هود ده فعلا اللى انا حساه دلوقتى ... 

انا تعبت تعبت اوى .. 

يارب  لا تغير علينا الحال الا لأحسنه 


♥♥♥♥♥♥♥♥




الثلاثاء، فبراير 21، 2012

حصاد الصبر...

من عمايل ايد .... мαησηα بالظبط الساعة 5:22 م 12 داقوا الشاى وقالولى رأيهم





سالخيييييييير عليكوا

يارب تكونوا كلكم بخير

من ساعة ونص كنت  منفردة برائعة من روائع بريد الجمعة

كتاب حصاد الصبر للرائع العظيم عبد الوهاب مطاوع

ساعة ونص ببكى وبتمنى من قلبى ان ربنا يعوضنى حصاد صبرى خير

وبتمنى من ربنا انه يجى بقه دورى فى طابور الحاصلين بجدارة على جوائز السماء

ساعة ونص ببكى وبحرقة على الراجل العظيم بحق

الراجل اللى معجون بالحكمة والحنان والعقل والايمان مرة واحدة

ساعة ونص ببكى وانا بفتكر ان كل يوم جمعة كنا بنتخانق اناواخواتى 

على الجرنال ونخبيه من بعض  علشان نقرأ

اجمل حاجة كانت فى جريدة حكومية منافقة الا وهو بريد الجمعة

ساعة ونص وانا بسأل ليه واحد زى الراجل ده كان فى يوم من الايام

 سبب فى قوة ايمانى وسبب فى صبرى لحد دلوقتى على حاجات كتير... يموت

وليه جدو الراجل المحترم ده  الحكيم صاحب العقل والحكمة والدماغ الموزنة .. يموت

وليه جلال عامر... الراجل اللى لخص همنا فى ضحك ..  يموت

وليه ابراهيم الفقى  اللى ادانا امل كبير فى حياتنا اللى ربط بين السنة والقران

 فى حياتنا العملية من غير ما يكرهنا فى اتباعهم .. يموت

وليه بابا بسكوتة عمو نصر  الراجل اللطيب الجميل صاحب اجمل ابتسامة قلب .. يموت

وليه خالتو الطيبة الحنونةاللى كانت عوض امى عن اذى الدنيا ..  تموت ؟؟

اللهم لا اعتراض  ..

 واللهم لا نسالك رد القضاء ولكن نسألك اللطف فيه 

وانا لله وانا اليه راجعون 

لكن صحيح ليه كل الناس الحلوة بترووووووح 

ومابيفضلش غير الوحشين اللى عايشين بس يوجعونا

 ويقتلوا اى امل حلو فى الناس 

واى طريق لحياة جميلة جديدة نضيفة بيهدوه


توصلت فى النهاية الى ان اذا احب الله عبدا احب لقائه ..  

وساعتها صبرت على فراق كل دول وغيرهم نوروا 

حياتنا فى يوم من الايام ولحد دلوقتى بينوروها

اما الناس التانية حتى ربنا سبحانه وتعالى مش بيحبه ومأجل لقائهم بيه  

زى بالظبط لما تكون مش حابب حد فى مجلس 

ما فبتاجل سلامك عليه للاخر يمكن يمشى لحد ماتوصله

ورجعت قولت يمكن ربنا من رحمته بيهم سايبهم يمكن 

فى يوم يتوبوا اليه توبة نصيحة ويبقوا ناس كويسين

له فى ذلك حكم

حصاد الصبر .. دى القصة اللى اتسمى الكتاب باسمها 

حكاية تحفة لن تملوا منها

طلعت منها بدعاء  حسيتنى اول مرة اعرفه مع انه ذكر فى الآية 24 من سورة القصص

لكن يبدو انى لست ما وصلتش  فى تدبرى للقرأن لما كنت اعتقد نفسى وصلت له .. .. 

رب إني لما أنزلت إلي من خير فقير


 يقصد به "أي اني في حاجة الي ماتسوقه إلي من خير ورزق   "

مبسوطة انى اتعلمت دعاء  جديد حلو 

يارب الحكاية تعجبكم واحفظوا الدعاء مش هتخسروا حاجة 

اقرؤا الفاتحة لجدى ولجلال عامر ولابراهيم الفقى ولخالتو ولعمو نصروعبد الوهاب مطاوع 



وللشهداء الورد اللى فتح فى جناين مصر 

ربنا يرحمهم ويرحم جميع الاموات

 شكرااااااا ..  خلاص  بقه تقدروا تروحوا :) 



استنوا ... 
ربنا يعوض كل صابر محتسب بجوايز السماء يارب عاجلا وليس اجلا 

وكما قال جدى الله يرحمه 
ربنا يكفيكم شرمكر القلوب 




خلاص امشوا بقه :)





الأحد، فبراير 12، 2012

رحيل البسمة والامل :(

من عمايل ايد .... мαησηα بالظبط الساعة 3:18 م 7 داقوا الشاى وقالولى رأيهم






ورحلت البسمة ايضا لاحقة بالامل 

رحل فارس الامل فى جيلنا المكلوم 

الدكتور ابراهيم الفقى 

ولحق به اليوم فارس البسمة وامير الساخرين 

الساخر جلال عامر 

نسأل الله ان يغفر لهم ويرحمهم وينير قبورهم كما اناروا عقولنا 

وان ينفعهم بعملهم ويجعله فى ميزان حسناتهم كما نفعونا 

ونسأل الله ان يكونوا اخر من نفقد ممن تربت عقولنا على ايديهم 

اللـهـم اجزهم عن الاحسان إحسانا وعن الأساءة عفواً وغفراناً 

اللـهـم انزلهم منزلاً مباركا وانت خير المنزلين

اللـهـم إنهم فى ذمتك وحبل جوارك فقهم فتنة الفبر وعذاب النار

, وانت أهل الوفاء والحق فاغفر لهم وارحمهم انك انت الغفور الرحيم. 

اللـهـم اجعل عن يمينهم نوراً حتي تبعثهم اّمنًين مطمئنين في نور من نورك 

يارب اللهم امين 



الأربعاء، فبراير 08، 2012

missing .....

من عمايل ايد .... мαησηα بالظبط الساعة 8:31 م 4 داقوا الشاى وقالولى رأيهم








سالخير عليكوا  :) 

 والله مش عارفة انا جيت اكتب هنا دلوقتى ليه ؟!!

 ... بس يمكن لانى عايزة افتكرنى 

 اينعم 

 .. افتكرنى زمان كنت ازاى 


اصلى وحشتنى اوى 






السبت، يناير 28، 2012

وحشتنى يا صديقى ...

من عمايل ايد .... мαησηα بالظبط الساعة 11:57 ص 20 داقوا الشاى وقالولى رأيهم





اسبوع يا جدو عدى هوا 

وحشتنى ...



_ صباح الخييييييييييييير يا جدووووووووو 

_ صباح الخير يا حبيبتى ... كل ده نووووووووووم 

_ اوووووووووبا  قال وانا كنت فاكراك هتقف معايا قصاد ماما وتدافع عنى 

_ ادافع عنك ايه انتى واخده حقك وزيادة انتى بتنامى كتير اوى 

_ :(  خلا ص هاصحى بدرى يا جدو 

_ اصلك بتوحشينى ماتزعليش 




عارف انت وحشتنى قد ايه دلوقتى وحشتنى كتير اوى 

مش قادرة اقولك وحشتنى قد ما بحبك 





عارف انا بحبك اوى ليه ؟

علشان انت عملتلى كل حاجة نفسى فيها 

 فاكر لما قولتلك  انا نفسى تخف وتبقى زى الحصان علشان انا عايزاك تحكيلى 

حكايات كتير من بتاعة زمان علشان انا بغير من صحابى لما بيحكوا عن جددودهم ؟

وانت ماهنش عليك تزعلنى 

انت ماخفيتش بس وانت بتطلع ف الروح قعدت تحكيلى علشان انا ما ازعلش 

علشان انا كمان احكى لاصحابى عنك وعن حكاويك 





فاكر لما روحت كلمت صحبتى ورجعت زعلانة ومش قلتلك حاجة 

ولقيتك بتقولى تعالى اقعى جنبى هنا 

قولتلى انتى عارفة انا بحبك ولا لأ ؟

قولتلك عارفة يا جدو وانا بموت فيك 

قولتلى طيب ماتزعليش ربنا يكفيكى شر مكر القلوب !!!!! 

استغربتك اوى قوتلك امين وعيطت 

طبطبت عليا وقولتلى انتى اصلك حلوة اوى

لازم يضايقوكى علشان تبقى زيهم وحشة 

انما انتى هتفضلى طول عمرك حلوة 

قولتلك شكرا يا جدو قولتلى ربنا يطمن قلبك يا حبيبتى 

بوفاتك يا جدو انكشفلى مكر القلوب 

وقررت ابعد عن كل القلوب المكارة 

لانهم مايستهالونيش :) 

انا دلوقتى مش زعلانة يا جدو انت بس وحشتنى !!! 





عارف انا كان نفسى تيجى تقعد معانا من زمان 

مكنتش اعرف انك بتحبنا زى ما احنا بنحبك اوى كده 

معرفش ليه اختارت تيجى دلوقتى بس 


بس كأنك كنت عارف ان اخر رحلتك هتكون فى احضاننا 

انا كان نفسى اشبع منك اوى :( 




انا اسفة انى وجعتك لما رديتلك روحك تانى :( 

والله اسفة انا بس مكنش هاين عليا تسيبنى 

انت كنت مونسنى يا صديقى 

كنت واخد بحسى وكنت بتعلم منك كتير

 اوى ف اليوم الف مرة بتعلمنى حاجات 

انا اسفة اوى مكنش قصدى والله بس فراقك

 صعب عليا اوى ومازال !!!!






شكرا يا جدو انك علمتنى حاجات كتير 

علمتنى انى مهما تعبت مش لازم افقد الامل ف الحياة 

ربنا ادانى حاجات حلوة كتير لازم  احافظ عليها واستعملها صح 

انى حتى لو كنت بموت مش لازم اقول غير


  ياااااااااااااااارب

 ارفع عنى وعن كل المسلمين الالم 

ان الواحد لما بيعيش حلو بيموت حلو 

ان الواحد ماهو الا سيرة وريحة حلوة

ماتطلعش ابدا م القلوب حتى القلوب المكارة 

ان الناس حلوين وونسهم حلو وانك كل ماتعمل حاجة حلوة

هتقعدلك وهيشيلهالك الزمن يطلعهالك ف يوم 

تكون محتاج ايد تطبطب عليك وتمسح وجعك 

ان البنى ادم مش فلوس البنى ادم احساس !!! 

انى انا صح .... لما اعمل للناس حاجات حلوة

هتتردلى فى يوم مش من الناس نفسها  

تؤ من ناس تانية اجدع واحن وعندهم اصل !!! 









مبسوطة  انك جيتنى وطمنتنى عليك  

مبسوطة انك هنا معايا فى كل لحظة وفى كل وقت 

ريحتك لسه هنا فى قلبى وفى بيتنا .

مبسوطة انك لمتنا كلنا من تانى 

مبسوطة انك انت كنت إنصاف ربنا ليا انا وامى واخواتى 

وانا اللى كنت فاكرة الانصاف ده هيجى فى حاجة تانية 








انا رغيت معاك كتير معلش يارب ما اكون صدعت 

بس اكيد دلوقتى صوتى مش بيتعبك

ولا المناهدة معاك بتتعبك 

انا بس كنت عايزة اقولك وحشتنى !!! 






 

ೋ واحــد شـاى ♨ Template by Ipietoon Blogger Template | Gift Idea