احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الأربعاء، مارس 05، 2014

بوح

من عمايل ايد .... мαησηα بالظبط الساعة 1:02 ص 3 داقوا الشاى وقالولى رأيهم





حاجتين بجد بيستفزوني فيا اوي 

_ اول حاجة لما بكون تعبانة مش بيبان عليا التعب تلاقيني حلوة كده وزي الفل ووشي زي فلقة القمر .. بس ببقى زي الخراج لو دوست ع اي حتة فيا ممكن  "انز"   وجع وده بيخلي اللي حواليا بعيدا عن اسرتي يقولوا  ماهي زي القردة اهي مش عيانة ولا حاجة .. مش عارفة الصراحة ده حلو ولا وحش  بس ف اعتقادي انه وحش لانه فيه ناس كتير ويمكن كل الناس بتحكم ع البني ادم بشكله من بره ايه
مش مهم هو جواه حاسس ايه :( 

وده شئ مؤلم .. اوي 

_ تاني حاجة لما بكون ف عزا بدخل اعزي الناس وانا الابتسامة ع خلقتي من هنا لهنا كأني رايحة فرح مثلاااااا هههههههههههههه اه والله ومش بعرف امسك نفسي من الضحك وممكن اهزر  .. لما كبرت بقيت بهرب من العزا مش بحب اروح خصوصا لو علاقتي باللي رايحة اعزيه ده قوية .. 

*ده حصل ف عزا جدي شخصيا وكنت بعشقه ولما مات اصحابي جم يعزوني لقوني بهزر وبضحك وانا ع الفيسبوك والمدونة حزينة حزن وكئيبة اكتئاب افتكروني  مش حزينة وبمثل 

*انا مابحبش اشوف حد حزين حتى لو بكرهه .. والله مش بعرف لازم اهزر لازم ابتسم لازم اضحك .. انا ساعات وانا ف اي مصيبة تخصني تلاقيني بعيط وفجأة افتكر حاجة حصلت تفصيلة مثلا بسيطة تضحكني اقوم اضحك وسط العياط 

*انا بحس ان انا روحي ف الناس .. ف الحياة اللي حواليا حتى لو انا مش عايشاها 
فببتسم غصب عني :( 

خلقة ربنا بقه .. وله ف خلقه شؤن

السبت، مارس 01، 2014

أول سنة لـــ " عُمر" الهنا

من عمايل ايد .... мαησηα بالظبط الساعة 1:01 ص 5 داقوا الشاى وقالولى رأيهم



النهاردة

 "عُــــــــــــــــمــــــــــر

بقه عنده

♥♥♥ ســــ 1 ــــنة ♥♥♥


Mohammed Darwish كل سنة وانتوا طيبين وبخير وعمر فرحة قلبكوا يارب انت ومامته

 للاسف مكنتش موجودة يوم ما اتولد معاهم والاروبة سارة هي اللي كانت هناك 




ــ وعمر يعني فرحة كده ملهاش وصف .. يعني طبطبة ربنا علينا كلنا


يعني حياتي وقلبي وعقلي .. يعني بحبه اكترررررررر من عيالي 


عمر يعني لما ابقى محتاجه حضن يرجعني للدنيا الاقيه بيدهوني من غير ما اطلبه منه

 عمر يعني فرحة اول ضحكة .. 

 يعني فرحة اول سِنة .. 

يعني فرحتي اللي بتبقى مش نافعة تتوصف لما ياخد بأيدي ويتسند عليا علشان يمشي 

يا الله .. يا الله .. يا الله ع ده احساس 

يعني الشقاوة اللذيذة اللي واخدها مني .. يعني الجنان والهيبرة لما بنكون سوا 

يعني بابا .. اللي بتبقى منه سكر .. 

يعني عياطه لما انزل واسيبه ... يعني مسكته فيا كأني انا اللي أمه مش عمته 

عمر  باختصار يعني "حياتي "  ♥



ربنا يحميه ويبارك فيه وينبته نبات حسن يارب .. ويجعله قرة عين وقلب باباه ومامته


♥***** ♥ ***** ♥ ***** ♥

* واد يا عمر اوعى لما تكبر وتقرأ البوست ده تتريق عليا وديني اقرصك ساعتها  

ابوك وعمتك ياماااااااا اتعملهم قبلك اعياد ميلاد هنا 

اصل هنا انا بعتبره ارشيف لحياتي من بعدي ♥

♥♥♥

* عمورتي حبيبي معلش هنأجل عيد ميلادك اسبوع لان عمتك منونة اللي هي انا عيانة واحتمال تودع 

كان دور برد بعيد عنك منتشر اياميها في مصر بس كان فيه خطورة لانه كان ممكن يقلب لانفلوزا الخنازير 

ماعلينا المهم كل سنة وانت حبيبي ♥

الأحد، أكتوبر 13، 2013

نجمة السما

من عمايل ايد .... мαησηα بالظبط الساعة 2:28 ص 2 داقوا الشاى وقالولى رأيهم





وعلى مدار شهر كل شوية حد يقول كيكي ويررررررررررص رررررررررص

 من الحاجات الحلوة اللي فيكي واللي مش بتخلص 

خلصوها  خلصوا كل كلام ممكن يتقال .. الباقي يتحس ويتشاف  

بس محدش قالك ان انتي نجمة السما اللي فووووووووووق

 اللي تبصيلها وقت الخنقة تفرحي وتقولي يارب انا بحبك .. 

النجمة اللي فوق بتنور وسط كل الضلمة اللي حواليكي .. 

انتي بالنسبة لي النجمة دي ... النجمة اللي بتقع عليا وانا بتمنى امنية ..

 وساعتها باب السما بيكون مفتوح .. وربنا يتقبل والاقيكي معايا  

انتي النجمة دي اللي دايما بتلمع ودايما مبسوطة حتى لو هي مش كده من جواها

بسس علشاني بتبقى بتلمع ومبسوطة 

كيكي نجمة السما .. هدية ربنا ليا .. يعني اول واحدة اتصل بيها وانا منهارة وترد عليا وهي نايمة وتتخض عليا

 وتسيب اللي ف ايدها وتجيلي جرررررري 

كيكي نجمة السما .. اللي ف عز ماهي تعبانة تنزل تلف معايا وتقولي انا عايزة اعمل شوبينج

 علشان بس انا اخرج 

كيكي نجمة السما .. اللي عمرها ما طلبتني ولا احتاجتني و لقيتني 

ومع ذلك عمرها ما قالتلي كده ولا فكرت ف كده اصلا 

كيكي نجمة السما .. يعني "منكاش" الفرحة ف حياتي انا وكل اللي حواليها 

كيكي يارب انت عارفها ... ايون هي دي اللي كملت "24" سنة النهاردة 

حبها يارب واجبر بخاطرها وارزقها الفرحة من حيث لا تدري ولا تحتسب ..

 زي ماهي بتحبني وانا بحبها .. وزي ماهي سبب فرحتي ف الدنيا دي 

كل سنة وانتي احلى واغلى نجمة ف الدنيا 

واول " بـــــــــــــحبك" ف الــ " 24" مني انا 

انا واثقة ان محدش قالها قبلي 


السبت، يوليو 20، 2013

كلام نسوان

من عمايل ايد .... мαησηα بالظبط الساعة 12:52 م 4 داقوا الشاى وقالولى رأيهم




أول هام : كل سنة وانتوا طيبين وحلوين وقلوبكم عامرة بالخير 

ثاني هام : وحشتوني بغباوة :) بس مش عارفة كل ما أجي أكتب بوست 

تحصل حاجة تطيره من دماغي 

ماعلينا المهم إني جيت 

مش هاتكلم كالعادة في السياسة مش علشان أنا رايقة أو مش في دماغي البلد 

بس علشان أنا هنا باجي أروق دماغي :) مش طالبة وَش سياسة 

عنوان البوست غريب .. الحقيقة هو مش كلام نسوان هو كلام حريمي

يعني على لسان الإناث

 بس أنا إختارت اسم تجاري هههههه 



علشان الناس تيجي للمدونة تقرأه أنا عايزة ناس كتير تقرأه وتتوجع 

آه تتوجع .. البوست عن "وجع القوارير" 

كلام .. او كلمتين تلاتة بالكتير سطر .. بس فيه وجع السنين 

ده للي بيحس يعني :) 

وحشكوا رغيي صح هههه .. خلاص ياللي بتقول انجزي هانجز اهووو بس ماتزؤقش كده... الله





=============

ــ عارفة ما بقتش أحس معاه بأمان .. فبالتالي مابقتش قادرة أفرح ولا أفرحه.

***********

ــ عارف قبل ما تحصل المشكلة دي كان أي حد يشوفني يقولي "يا بخته"

أه يا بخته اللي مفرحك أوي كده .. دلوقتي بقوا بيقولولي إرجعي إفرحي تاني عيونك

 "إنطفت".


***********

ــ مافيش في حياتي فرحة بتكمل .


*******

 ــ بقالي يومين بصرخ جوايا إن المبادى مبتتجزأش..

و عملت حاجة مش ضد مبادئي و لا عكسها… و لكن نزلتني من نظر نفسي قوي …


***************
ــ # انا أسف.

*ﺃسف ؟! ليه هو إنت دوست على رجلي من ﻏﻳﺮ ﻣﺎﺗﻘﺼﺪ !

,, ده انت يادوب دوست علـى قلبي وخليته ميثقشّ في حد تاني ,,مش محتاجه أسف يعني.

********************

ــ واجهته وقالي " مثنى وثلاث ورباع" الشرع محللي أربعة مدام هاعدل بينهم 

قلتله عدل ؟! أي عدل اللي انت بتتكلم فيه ده ؟

أول يوم في رمضان والعيد وكل المناسبات هتبقى مع مين فينا معاايا ولا معاها ؟!

 في عز البرد وانا محتاجالك تدفيني .. هتبقى معاها ولا معايا ؟! 

في عز الحر وانا محتاجالك تبقى جنبي نسهر سوا نخرج سوا .. هتبقى معايا ولا معاها ؟!

أي عدل ده اللي بيخليك معاها 11 شهر في السنة ومعايا شهر واحد بس في السنة ؟!!

أي عدل ده اللي خلاك تستفرد بقلبي لوحدك وتحطها هي شريكة معايا 

في قلبك واحاسيسك وانفاسك وحنيتك ؟!

أي عدل اللي خلاك تحطني وتحطها قدام الأمر الواقع

 هي تقبلني كـ "ضرة" وانا أقبلها كـ "ضرة" ؟!! 

فين حقي وحقها ؟ فيك كامل ..؟!!! زي ما انت واخد حقك مننا وفينا بالكامل ؟!!

*******************

ــ #هو احنا ليه كده ؟

* ازاي يعني؟

#يعني كده .. مش بنعرف نفرح .. هي الفرحة دي شكلها ايه ؟ طيب طعمها ايه؟ 

طيب هي كل الناس دي زينا ولا احنا بس اللي كده  ؟!!

*...............................................................


***********

ــ لما كان بيعدي علينا يوم حلو كنت بفرح لاني ببني معاك ذكريات حلوة

 نفتكرها مع بعض بس اكتشفت اني كنتت ببني وجع افتكره لوحدي!


****************

ــ عارف .. مابقتش بثق فيك زي الأول .. وانا مكنتش عايزة اعيش معاك كده..

ماكنتش عايزة احساس الشك يدخل اصلاً .. مسيطر عليا مش مخليني عارفة افرح ولا أفرحك 

مش قادرة .. ومش عارفة .. مش مسمحاك !!

******************

ــ انا عايزة ابقى "ماما"  :)) أتاري الأمومة دي مش سهلة

عارفة الأمومة تضحية بتبدأ من أول يوم خطوبة مش من أول يوم ولادة 

علشان كده أنا مستحملة وهاستحمل ..

*********

ــ عارفة كل أحلامنا اللي كنا بنحلمها سوا ونقول هنعملها

 مع أزواجنا علشان حرام نصاحب ؟!

كل ده ما بيحصلش .. وبيتحول وجع .. وجع وبس!!

**************

ــ ما بيفهمش التلميحات..ما بيفهمش الكلمات..ما بيفهمش الإشارات..

ما بيفهمش التناقضات..ما بيفهمش أي حاجة خالص!!


************

ــ من كُتر مـا بنبقي حافظين ردود أفعالهم و أنفـعـالتهم حتي في 

زعلهم بيبقي نفســنــا فـي مرة يخيبوا ظننـا

ويـعملوا رد فعل غير اللـي كـُـل مرة بيبقوا مُـصممين يوجعونا بيــِه.

***************

 ــ عارفة انتي إحساس إنه يوحشك حد مات  „ أيوه هو ده كده بالظبط ! :"(


**************

مش عارفة عايزاه يقرأ اللي بكتبه دة ولا لأ

 بس سواء قرأه او لا فهو فايته اللي في الدرافتس

ماعشتش في حياتي غير ال 40 يوم دول

عيشت حب من بتاع احلامي حب بيدي للروح 

حب رجعني لنفسي بس رجعني عشان يوجعني

الحدوتة ماكانتش كبيرة بس مريحة 

بحبها و بحب تفاصيلها و بحبه 

قلبي بيدق ليه و كل حاجة ناقصاه بس انا باجي عند مرحلة

 طاقتي بتخلص مابأعرفش امسك في الحبل اللي بيربطني بحد

 و بأسيبني اقع منه لو هو عمل جهد و لحقني طاقتي دي بتتجدد

 مالحقنيش بأقع و بتتكسر كل حاجة

 و هو مش بس ساب هو قطع الحبل و نطره و رماه 

اليوم اللي قبل ما يسبني فيه كنت بأحكيلها قد ايه انا مبسوطة

 و اني طايرة كانت متضايقة عشان هي مابتحبوش 

لحد دلوقتي مافهمتش السبب ماستوعبتوش و مش هأدور اني افهم

كل اللي شاف صورتنا قالي انتوا حلوين اوي ليه حصل كدة

أسفُه علي الطريقة وجعني اكتر ..

 وجعني لانه مش فاهم ان النتيجة هي اللي مؤلمة مش الطريقة

بغير منهم عشان هما بيقدروا يكونوا معاه في اي وقت

بحاول انسي و بحاول انشغل بالمذاكرة و باللي حواليا

 بس بلاقي روحي لسة واقفة عند يوم معين و لحظة معينة و مش قادرة تتخطاه

***************

ــ ولا حاجة .. غير إني دلوقتي محتاجاه جنبي !!


**************

ــ عارف ايه اللي وجعني أكتر إني ماتخيلتش ابدًا إن فيه حد غيري 

قعد معاك و إنت تحكيله أحلامك ويسمعك 

غيري أنا !!

***********

ــ انا اصلاً مش عايزة أشوفه ولا أكلمه .. أصله هيكدب تاني 

وانا مابحبوش يكدب .. علشان هاكرهه وانا مش عايزة اكرهه

 انا بحبه !!

**********

ــ عارفة اصعب وقت بيعدي عليا بعد ما اليوم يخلص بكل مشاكله والتحركات اللي فيه .. 

اقعد لوحدي وابقى عارفة انه معاها 

بيضحكوا وبيتكلموا مع بعض وانا بسمع جملة واحدة بس 

" الرقم الذي طلبته غير متاح او ربما يكون مغلقًا" !!

************

ــ مش عايزة اتجوز .. خايفة .. هو مش وحش بس انا خايفة يبقى وحش 

ماهم كلهم بيتحولوا بعد الجواز .. بيبقوا "وحووووووش" 

**************

ــ انا مش زعلانة على نفسي انا زعلانة على الست الغلبانة اللي  قاعدة جوة دي 

زعلانة على فرحتها اللي اتكسرت .. زعلانة على همها اللي اتضاعف بيا تلات اضعاف 

هم احساسها بالذنب ان هي اللي ألحت عليا أوافق عليه .. 

وهم إن هي كانت فرحت إنها إطمئنت عليا في "ضل الراجل"

وهم رجوعي ليها مش زي الأول خاااااالص ... بس ..

 وجعي عليها مش عليا !!

**************

و اسيب الزعل جوايا و اضغط عليه بحزن اكبر
و ارمي فوقيهم شوية زعل كمان متأجلين من ناحية تانية
 و اكتمهم بشوية احباط علي شوية خزلان لحد ما الاقي الوجع بقي جبل
 و صدري اتخنق و مش قادر يستحمله فينفجر
و بعد ما انفجر و افضي كل اللي جوايا ارجع تاني 
كأني بطير لاول مرة و كأني عمري ما عرفت كلمة حزن و اضحك
 و كأن قلبي ماكنش بيتقطع من كتر الوجع و العياط
و ارجع اتمسك بالحياة تاني كأني طفلة لسة بتستوعب مفاتيح فك طلاسم الدنيا
و افضل اعيد الدايرة اللي اتربطت فيها و بحاول اكسرها

**********

 بس خلاص .. كفاية #وجع 

البوست كان في بالي أحلى من كده بكتير .. بس .. ودائمًا بيكون فيه "بس" .. 

الويندوز وقع والنت فاصل وانا مش نايمة كان عندي أمل اشتغل 

بس النت مش مساعدني .. فهبطت كده .. و الفكرة ماعرفتش تـ "نهض"  تاني ههههههه

 وربنا يكفيكوا ويكفينا شر "النهضة".

البوست مش كله كلامي او احساسي فيه حاجات لقطتها من الفيسبوك وفيه من تمبلر 

اوجاع كانت مكتوبة في لحظة الوجع سمحت لنفسي أخدها 

وماكتبتش هي لمين منعًا للاحراج بالنسبة للبعض 

لكن لزم التنويه انها مش من تأليفي .. 

باقي الأوجاع تخيلات مني لمواقف ممكن أكون شوفتها او اتعرضتلها بشكل ما 

وحطيت نفسي مكان البنت أو الست .. وحكيت الوجع زي ماحسيته .. 

وفيه اوجاع سمعتها من صحباتي ..

 "قوارير" انكسروا بلا رحمة ..

 بس علشان متربين وبنات ناس 

هو ده كل ذنبهم في الحياة ..

وجعتوني فكتبته اهداء "لكُن" 


أخيرااااااا  

الوجع بيخف والله بيخف بس لازم نبقى احنا أقوى منه 

والأيام السودة بتيجي بدالها أيام بيضاااااا 

بس ساعتها بنحس بحلاوتها بعد ما دوقنا مرارة الأسود 

"الحمد لله " 

نشد حيلنا تاني ونقف تاني وادينا اتعلمنا وادينا بنقوى 

الضربة بتقوينا وتخلي عودنا ينشف .. 

صوت ضحكتكن " عَجِز"  خلوه يرجع شباب تاني من فضلكن 

صباحكم فل وورد بيضحك :) 



استنوا استنواااااااااااااااااااااااااا إيه ده انتوا نسيتوا ؟ 

من امتى بتمشوا من غير مايكون في دعوة حلوة ليا ؟؟ 

يلا قولوا معايا " ربنا يحفظلي أمي ويباركلي فيها

 ويحفظلي اخواتي ويباركلي فيهم ويحفظلي جوزي ويباركلي فيه 

وعُمـــــــــــــر حبيب القلب الغالي ابن الغالي يحفظهولي ويباركلي فيه " 

قولوا آميييييييييييييييييييين .. لكم مثل ما دعوتم لي به 

ومحدش يقر اللي هيقر هو عارف انه بيته هيولع :))) 

كفاية عليكوا كده النهاردة ... سلااااااام 





الجمعة، مارس 01، 2013

عــــُـــــــمـــــر محمد درويش ♥ بحبك

من عمايل ايد .... мαησηα بالظبط الساعة 9:00 م 6 داقوا الشاى وقالولى رأيهم


انا بقييييييييييييت عمتوووووووووووووووووو ♥



أول لما أخدت البكالوريوس كنت حاسة بفررررررررررررحة
رهيبة وقلت بس أنا عمري ما هافرح قد اليوم ده 
أصل بعيد عنكوا كنت واخداه بعد عمر طويل هههههههه
وكنت ماشية في الشارع عايزة أمسك كل الناس اقولهم أنا اتخرجت أخيراااااااااااااا

بس رجعت فرحت تاني 
أول ما محمد أخد البكالوريوس فرحت أوي وقلت انا عمري ما هافرح قد اليوم ده 
كنت عايزة امشي في الشارع واصرخ واقول ابني الكبير بقه بشمهندز قد الدنيا بحالها

بس رجعت فرررررررررحت تالت 
اول ماسارة اتخرجت حسيت اني بقه بنوتي خلاص كبرت وبقت اللي نفسها تبقاه
وساعتها اخدت نفس عميق وقلت خلاص  بقه انا كده ارتحت وفرحت خلاص 
وكنت عايزة اقول للعالم كله انا بنوتي بقت صحافية قد الدنيا 
بس رجعت فرحت رابع لما شوفت اخويا عريس مع احلى عروسة في الدنيا 
وكنت عمالة اقول في كل حتة انا اخت العريس انا اخت العريس :)
وقلت بقه مافيش بعد كده فرحة 



بس رجعت فرحت خامس 
لما ربنا رزقني بنصي الحلو أوي وقلت لا انا ماظنش فيه فرحة بعد انك تلاقي حلمك بين ايديك 
وكنت بقول لكل الناس انا ربنا نصفني الحمد لله بنصفي الحلو 
وكانت عيني فيها فرحة بتقول لكل اللي يشوفني انا العروسة :)

بس رجعت فرررررررررررررررررررررررررررررررررررحت اوي اوي اوي
 لما بقيت عمتو 
انا بقيت عمتوووووووووووووووووو اه وربنا 
لاحلى واجمل فرحة في الدنيا 

عـُــــــــــــــــــــمــــــــــــــــــــــــــــــــر  محمد درويش 
حبيب قلب عمتو وحياة عمتو ونور عيون عمتو 
وكل حاجة حلوة في حياة عمتو 

ربنا يخليك ويبارك فيك ويحميك ويحفظك ويجعلك قرة عين باباك ومامتك 
وينبتك نبات صالح يارب يا حبيبي 



انا بحب سنة 2013 :) 

كل أول شهر فيها شايل فــــــــــــــــــــــــــرحــــــــــــــــــــــــــــــــــــــة حلوة أوي

أنا بحب ربنا أوي 

يارب يارب يارب ألف حمد وشكر ليك يارب 

يارب كمل أفراحنا على خير وأرزقنا الخير كله على قد ما صبرنا :)

يارب يارب يارب ماتحرم حد ابداااااااا من الفرحة اللي بيتمناها 
يارب يارب ارزق كل الناس اللي نفسهم فيه ياااااااااااااااااااااااااااااااااااااااااااارب 



احياة عيالكوا وغلاوة الغالي عندكوا محدش يحسدني 
انا اما صدقت فرحت انا كنت تعبت تعبت من الحزن 
الله يخليكوا قولوا ماشاء الله الله اكبر 

وإلاااااااااااااااااااااا ربنا هيولع في شقة اللي هيحسدني على فكرة هههههه

نسيت اقولكوا وحشتووووووووووني :)



الأحد، سبتمبر 30، 2012

الحمد لله ♥

من عمايل ايد .... мαησηα بالظبط الساعة 12:07 ص 4 داقوا الشاى وقالولى رأيهم




الحمد لله ..

شكـــــــرًا ياحبيبي يارب 

♥♥


على باب الله
راضى بكل حال
على باب الله
عمر ماقلبى شال
ماتعودتش اسيب
لبكره فى يوم مجال
ماتعودتش اشوف
فى الناس غير الجمال
وبسامح مهما قالوا
ولا اشيل لوحتى شالوا



جميل انك تحس يانك راضي عن حياتك ونفسك 

يارب إرضينا كلنا بحياتنا 



الأربعاء، مايو 23، 2012

فــــــــــاطمة ♥

من عمايل ايد .... мαησηα بالظبط الساعة 1:47 ص 13 داقوا الشاى وقالولى رأيهم








دى فاطمة جول :) 

البنت التركية البسيطة حكايتها حكاية 

هابقى ارغيها بعدين 

بس كنت جاية اقول ان كلنا كنون النسوة بتمثلنا فاطمةجول 

كل واحدة مننا  اغتصب حقها ف الحياة بشكل ما

كل واحدة مننا اتعرضت لنفس مشكلتة فاطمة بس بشكل مختلف

مش بالضرورة زى ماحصل ف المسلسل

المهم انها ضاع حقها واتداست بالأقدام علشان المصلحة

اى مصلحة الا مصلحتها

كل واحدة مننا اغتصب حقها ف الفرحة زيها زى فاطمة جول بالظبط 


وكل واحدة مننا 

 محتاجة تحس بالامان محتاجة  الحنية من نصها الحلو 

محتاجة ان نصها الحلو يحسسها بقوتها


 ويقف جنبها لما تكون ضعيفة او مكسورة 

كلنا محتاجين حد نثق فيه 

 " محتاجين الثقة والامان والحنان اكتر مما تطلقون عليه  " الحب 

محتاجين الاهتمام 

محتاجين حاجات بسيطة اوى كلمة او وردة او حتى طبطبة وبس 

ع كتف الواحدة مننا بعد يوم طويل ومتعب 

كلنا فاطمـــــــــة جول 

 عزيزى الرجل ارجوك كن " كريمًا "


 ♥ ♥ 


وعلى رأى المثل كن لى كريمًا

 اكن لك فاطمة جول




وكريم ده هو كمان حكاية بس مش دلوقتى


فللحديث بقية مدام فى العمر بقية :)




♥ 


تصبحوا ع  انتخابات رئاسية لاول مرة ف مصر :)






 

ೋ واحــد شـاى ♨ Template by Ipietoon Blogger Template | Gift Idea