احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الجمعة، أغسطس 07، 2015

مصر بتفرح 6 أغسطس 2015

من عمايل ايد .... мαησηα بالظبط الساعة 1:34 ص 0 داقوا الشاى وقالولى رأيهم


طيب انا عمالة اشغل نفسي وبقول مش لازم احكي بس ماينفعش بأي حال م الأحوال ما أحكيش اللي حصل 

انا هاحكي لعدة اسباب:
* الناس بتوع كل حاجة بتحكيها ع الفيسبوك الله يباركلكوا اركنولي ع جنب انا مش كل حاجة بحكيها بس ده لازم يتحكي لازم الكل 
يعرف اني عرفت احمي نفسي الحمد لله.

علشان اختي وصاحبتي وقريبتي متخافش من حاجة اسمها "الفضيحة" ماتتكسفش تشتم وتضرب حد فكر يمد ايده عليها.

1- انا عمري ماتخيلت ف حياتي اني هاقدر اضرب راجل ومش اي راجل ده بغل اطول مني واتخن مني باختصار لو كان مسكني من قفايا كان هيفعصني 

اوعي تصدقي ان الكترة تغلب الشجاعة انا كنت شجاعة وع حق هو كان مجرد بغل غلطان ومذهول ومش متخيل ان واحدة بنت ناس وباين عليها انها هبلة وغلبانة وطيبة وهتخاف من الفضيحة هتعمل فيه كده.

اللي يفكر يأذيكي أأذيه بكل قوتك أأذيه اوعي تسكتي.

2- انا مش بتفشخر باللي عملته انا اخدت حقي اللي محدش كان هيجبهولي ولا مكسوفة هو قسمًا بالله مالمسني ولو كان لمسني وعزة جلال الله كنت جبت رقبته نصين

انا عارفة ان فيه بنات كتير ممكن تخاف تعمل اللي انا عملته بس انا بردو ناس كتير عارفني والبنات دول لما هيشوفوا اللي عملته هيفتكروه وهيتشجعوا

اوعي تخبي انك اتصرفتي صح وانك ضربتي بغل زي ده .

3- لما حد يتحرش بيكي ماتضربيهوش بالقلم القلم مش بيقعد خلاص دقيقتين ووجعه هيروح ولا تتكلي ان فيه حد هيضربهولك علقة موت لا اضربيه انتي باي حاجة تسيب اثر ف وشه

عارفة ليه علشان اللمامة ده اهله اكيد مش عارفين انه كده اصحابه اكيد مش عارفين انه كده 
لما يبقى يروح البيت ووشه ازرق ومتشحور يبقى دكر وابن دكر من ضهر دكر لو قدر يقول مين عمل فيه كده

 اللي هيسأله هيقوله اتخبطت او خناقة لكن لما يتخمد مايوعى يقوم ويصحى يلاقي وشه وارم ومزرق ويجي يغسله م العماص هيوجعه 

والوجع اوعي تفتكري انه هينساه اقسم بالله ماهينساه هيعلم فيه علشان انتي علمتي عليه فعلا.

عارفين هو دلوقتي قاعد وشه وارم ومزرق وعمالة جملتي " جرى ايه يا بن الوسخة انت فاكر نفسك دكر" بتررررررررررررن ف ودان اللي خلفوه

4- الصبح كنت بتكلم مع واحدة صديقتي عن #مصر_بتفرح وبقولها ايه اللي يفرح قالتلي حاجة هتجيب خير للبلد 

قولتلها انا بالنسبة لي الخير ده لازم اشوفه .. انا اتعينت؟ انتي اتعينتي ؟ اخويا اتعين؟ 

اتجوزنا ؟ اشتغلنا شغل عدل من غير مايجي واحد مصري او مش مصري  لمجرد ان ربنا كرمه من فضله وبقه معاه قرشين يطفحك 

الكوتة ويذلنا بالجنيه اللي بيدوهولنا وهو واخد حقه من دمي ولحمي ومجهودي وكمان يشتمك ويتأمر ويقولك ارفدك واجيب 10 

غيرك ؟؟؟

قولتلها قريبي وقريبك وغيرهم الشباب اللي مرمين بره مصر ولا حد حاسس بيهم ولا حد عارف هما بيحصل فيهم ايه وبيتذلوا قد ايه واللي الامر بيوصل ببعضهم انه بيرجع لحضن امه ف صندوق 

او امه تسيب الدنيا وهي روحها فيه ونفسها تشوفه علشان يعرف يتجوز .. رجعوا بلدهم؟ 

قولتلها فيه شرطة تحميكي من واحد عاطل خطف شنطتك وجري فيه شرطة تحميكي من واحد اتحرش بيكي 

قالتلي كل ده هيحصل #السيسي عنده كرامة ومش هيقبل ده عننا قولتلها انا بقه فرحتي متأجلة لما اشوف الخير ده ألمسه يوصلني 

اناااااااااااااااااااااا مش يروح للمرتاحين

لما ما اشوفش قدامي واحد كفيل بيقول لواحد مهندس امه وابوه طفحوا الكوتة ف تعليمه وهو بيقوله عندي اوضة فوق السطح ومرتبة ع الارض ابقى نام عليها 

لما مانبقاش رخاااااص ابقى افرح 

#مصر_بتفرح وانا بصرخ ومحدش لحقني #مصر_بتفرح وعملت حسابها ان الاخوان مايفجروش حاجة علشان بس اليوم مايبقاش مرتبط ف ذكرى المصريين بحاجة وحشة 

مش علشان يحمونا وماعملتش حسابها اني انا كأنسانة بتهااااااان لمجرد اني بنت وهاسكت علشان انا عارفة ان محدش هيجيبلي حقي

 علشان اصلا هما سايبينها زريبة مافيش أمن مافيش اي حاجة ولا اي حد يثبت حالة مافيش اي حد حتى استنجد بيه وع شرط انا 

كنت ف شارع جامعة الدول العربية  بالظبط قدام ش البطل أحمد يعني مش ف حتة مهجورة .

#مصر_بتفرح وأنا بتهان 

اللي حصل ك الآتي :

نزلت روحت مشوار كان ضروري ولازم أروحه للأسف الساعة 6 نزلت .. 

ركبت ميكروباص .. الميكروباص كله فاضي 

جه واحد خنزير قعد جنبي ماسك ف إيده ملف أصفر وشايل جاكيت شتوي 

أيوة انا عارفة بقول ايه "جاكيت شتوي"

كان بيكلم حد ف التليفون وبيقول اه انا نزلت اجيب الاشعة بس لقيتهم قافلين وراجع اهو 

قولت يابت يمكن يكون عيان بس فكرة انه شايل جاكيت شتوي مش قادرة استوعبها 

ريحته عرق يقرف 

كان مستعجل ان الميكروباص يطلع باي شكل 

الميكروباص طلع .. طلعت الاجرة اديتهاله حسيت انه مرتبك كان هيقع الجنيه  ع الكرسي جنبي 

بس الحمد لله ما وقعش  حاول ال ايه يطلع الاجرة بس لاني الحمد لله اصغر حجما منه كنت بعيد عنه ف معرفش يتلزق فيا 

انا بقعد واحط شنطتي ع رجلي ف اي مكان بروحه معرفش ليه بس انا اتعودت ع كده

الجاكيت وقع ع الشنطة وايدي وانا مقروفة منه ومن ريحته فرفعت الجاكيت

قام رافع ايده نزل الجاكيت تاني ع ايدي و الشنطة .. طنشت قولت انا لو رفعته هيفتكر نفسه راجل وبيتعاكس ولا حاجة ولا يقولك بتتمحك 

اتصلت بسارة اسالها عايزة ايه اجيبه وانا جاية لقيته اتلهوج وارتبك اكتر لما افتكر اني نازلة خلاص 

شوية بدأت احس ان فيه حاجة بتتمشي ع الشنطة  انا كنت دايخة من الحر فمركزتش قولت دي مجرد دوخة 

شوية لقيت الموضوع زاد حسيت بقه فعلا ان فيه حاجة بتمشي ع الشنطة او بمعنى اصح بتحاول توصل لي أنا  

شوية واللي ورانا قال انا نازل قوم البغل اللي جنبي لازق فيا تاني  ال ايه بيعدي اللي نازل بعدت نفسي بس خلاص

 هانط من الشباك يعني هاخترق جنب الميكروباص 

نزل اللي نزل وهو مابعدش عني وبدأت ايده حركتها تزيد بيقرب مني اكتر 

رفعت الجاكت لقيت ايده ع الشنطة فعلا 

لقيت نفسي وقفت وقعدت اضرب ف وشه بايدي كت لابسة خاتم بوظتله وشه وكل اللي جاي ع لساني 

"جرى ايه يا ابن الوسخة انت فاكر نفسك دكر " وعمالة اصرخ عايزة بوليس بوليس 

وبصرخ ف سواق الميكروباص انه يركن ع جنب وهو تحت ايدي بس عمال يقول "حرام عليكي حرام عليكي" 

روحت رديت عليه "حرمت عليك عيشتك يا بن ستين كلب يا ابن الوسخة فاكرني ايه وفاكر نفسك ايه .. فاكرينا ايه يا ولاد الوسخة "

وبضرب فيه انا كل ده لوحدي وببص من شباك الميكروباص بدور ع بوليس باي شكل 

راكب معايا 3 رجالة وباقي الميكروباص ستات قسمًا بالله ما في حد اتحرك من مكانه 

ولا حتى نطق كله ساكت السواق بيتمطوح بالميكروباص وهو بيتفرج ع الضرب والتاني بيصرخ وانا بضرب وبشتم وبصرخ 

بقول لسواق الميكروباص وصلني ع القسم وبضرب بردو ف البغل اللي تحت ايدي اترعب ومارضيش قعدت اشوط فيه برجلي 

وبضرب ف وشه لحد ما رميته م الميكروباص وهو ماشي .


بعد ما رميته لقيت السواق بيقولي يخربيتك قولته بتقول ايه ماسمعتش قالي اتفضلي اقعدي 

قعدت مكاني ابص بقه الاقي ورايا بالظبط 2 دكورة اه يا ولاد الوسخة يعني محدش عمل حاجة سايبني متصدراله لوحدي 

لقيت الستات بيقولوا  احسن جدعة 

بعد شوية لقيت واحدة بتقولي "معلش" قولتلها ماتقوليليش معلش هو مالمسنيش الحمد لله انا اخدت حقي لو مكنتش اخدت حقي كنتي واسيني 

قالتلي صح جدعة وربنا علشان يلموا نفسهم 

اللي استفزني اول ما الميكروباص وقف كل الناس جريت منه حسسوني اني انا اللي غلطانة ازاي اضربه كده 

محدش فيهم فكر اصلا ازاي واحد ف عز الحر ده شايل جاكيت شتوي هما بس شافوا اني ممكن اكون انا اللي زودتها وهو مجاش جنبي 

الغريب انه هو نفسه ما انكرش هو بس الضرب كان واجعه كان بيقول بس حرام عليكي حرام عليكي محدش فيهم فكر ف كل ده 

بردو انا اللي طلعت غلطانة ولازم اسيبه ينهش ف لحمي علشان هما ينبسطوا 

حتى اللي قالولي معلش كانوا مرعوبين مني وخايفين كأني مجنونة اينعم انا فعلا اتجننت

فين بقه الشرطة النسائية؟ فاتحين الجناين وعاملين اردغانة ومافيش امن مافيش حد يحمي البنات من التحرش 

ع فكرة انا كنت لابسة فستان واسع جدا ومش من النوع اللي بيلزق ف الجسم وكمان مش حاطة ميكب اب 

مافيش اي حاجة ممكن تخلي غريزة كلب معفن تتحرك علشان ولاد التيت اللي هيطلعوا يقولوا دي كانت لافتة نظره 

بلبسها او بمكياجها الاوفر ولا شعرة باينه من شعري ولا حتة باينة من جسمي من اي حتة 

ولا انا من النوع اللي بيمشي يترقص ويتقصع  يعني مافيش اي مبرر غير انه توسم فيا اني بنت ناس وهخاف م الفضيحة ف هو هينهشني ويقوم من سكات 

 الخميس 6/ 8 / 2015  للاسف يا حكومة وللاسف يا سيسي اتحط ف ذاكرتي انه يوم اسود اتعرضت فيه لمهانة لايمكن انساها 

ومش انا لوحدي ده البيه عايش من اول اليوم عمال ينهش ف دي وينهش ف دي وينهش ف دي بس انا ختمت له اليوم بدري يا كبدي

هاتلي حقي منه ومن غيره ومن غيره ومن غيره وساعتها هافرح ومصر كلها هتفرح 

خليني أمشي ف بلدي وانا مش خايفة ومش مرعوبة امشي ف اي وقت وف اي يوم عيد ومش عيد 

وساعتها انا هافرح ومصر كلها هتفرح 

#أمسك_متحرش  #شير #مصر_بتفرح #عايزة_حقي #6_أغسطس_2015 #بنت_بـ100راجل














الأربعاء، مارس 05، 2014

بوح

من عمايل ايد .... мαησηα بالظبط الساعة 1:02 ص 3 داقوا الشاى وقالولى رأيهم





حاجتين بجد بيستفزوني فيا اوي 

_ اول حاجة لما بكون تعبانة مش بيبان عليا التعب تلاقيني حلوة كده وزي الفل ووشي زي فلقة القمر .. بس ببقى زي الخراج لو دوست ع اي حتة فيا ممكن  "انز"   وجع وده بيخلي اللي حواليا بعيدا عن اسرتي يقولوا  ماهي زي القردة اهي مش عيانة ولا حاجة .. مش عارفة الصراحة ده حلو ولا وحش  بس ف اعتقادي انه وحش لانه فيه ناس كتير ويمكن كل الناس بتحكم ع البني ادم بشكله من بره ايه
مش مهم هو جواه حاسس ايه :( 

وده شئ مؤلم .. اوي 

_ تاني حاجة لما بكون ف عزا بدخل اعزي الناس وانا الابتسامة ع خلقتي من هنا لهنا كأني رايحة فرح مثلاااااا هههههههههههههه اه والله ومش بعرف امسك نفسي من الضحك وممكن اهزر  .. لما كبرت بقيت بهرب من العزا مش بحب اروح خصوصا لو علاقتي باللي رايحة اعزيه ده قوية .. 

*ده حصل ف عزا جدي شخصيا وكنت بعشقه ولما مات اصحابي جم يعزوني لقوني بهزر وبضحك وانا ع الفيسبوك والمدونة حزينة حزن وكئيبة اكتئاب افتكروني  مش حزينة وبمثل 

*انا مابحبش اشوف حد حزين حتى لو بكرهه .. والله مش بعرف لازم اهزر لازم ابتسم لازم اضحك .. انا ساعات وانا ف اي مصيبة تخصني تلاقيني بعيط وفجأة افتكر حاجة حصلت تفصيلة مثلا بسيطة تضحكني اقوم اضحك وسط العياط 

*انا بحس ان انا روحي ف الناس .. ف الحياة اللي حواليا حتى لو انا مش عايشاها 
فببتسم غصب عني :( 

خلقة ربنا بقه .. وله ف خلقه شؤن

السبت، مارس 01، 2014

أول سنة لـــ " عُمر" الهنا

من عمايل ايد .... мαησηα بالظبط الساعة 1:01 ص 5 داقوا الشاى وقالولى رأيهم



النهاردة

 "عُــــــــــــــــمــــــــــر

بقه عنده

♥♥♥ ســــ 1 ــــنة ♥♥♥


Mohammed Darwish كل سنة وانتوا طيبين وبخير وعمر فرحة قلبكوا يارب انت ومامته

 للاسف مكنتش موجودة يوم ما اتولد معاهم والاروبة سارة هي اللي كانت هناك 




ــ وعمر يعني فرحة كده ملهاش وصف .. يعني طبطبة ربنا علينا كلنا


يعني حياتي وقلبي وعقلي .. يعني بحبه اكترررررررر من عيالي 


عمر يعني لما ابقى محتاجه حضن يرجعني للدنيا الاقيه بيدهوني من غير ما اطلبه منه

 عمر يعني فرحة اول ضحكة .. 

 يعني فرحة اول سِنة .. 

يعني فرحتي اللي بتبقى مش نافعة تتوصف لما ياخد بأيدي ويتسند عليا علشان يمشي 

يا الله .. يا الله .. يا الله ع ده احساس 

يعني الشقاوة اللذيذة اللي واخدها مني .. يعني الجنان والهيبرة لما بنكون سوا 

يعني بابا .. اللي بتبقى منه سكر .. 

يعني عياطه لما انزل واسيبه ... يعني مسكته فيا كأني انا اللي أمه مش عمته 

عمر  باختصار يعني "حياتي "  ♥



ربنا يحميه ويبارك فيه وينبته نبات حسن يارب .. ويجعله قرة عين وقلب باباه ومامته


♥***** ♥ ***** ♥ ***** ♥

* واد يا عمر اوعى لما تكبر وتقرأ البوست ده تتريق عليا وديني اقرصك ساعتها  

ابوك وعمتك ياماااااااا اتعملهم قبلك اعياد ميلاد هنا 

اصل هنا انا بعتبره ارشيف لحياتي من بعدي ♥

♥♥♥

* عمورتي حبيبي معلش هنأجل عيد ميلادك اسبوع لان عمتك منونة اللي هي انا عيانة واحتمال تودع 

كان دور برد بعيد عنك منتشر اياميها في مصر بس كان فيه خطورة لانه كان ممكن يقلب لانفلوزا الخنازير 

ماعلينا المهم كل سنة وانت حبيبي ♥

الأحد، أكتوبر 13، 2013

نجمة السما

من عمايل ايد .... мαησηα بالظبط الساعة 2:28 ص 2 داقوا الشاى وقالولى رأيهم





وعلى مدار شهر كل شوية حد يقول كيكي ويررررررررررص رررررررررص

 من الحاجات الحلوة اللي فيكي واللي مش بتخلص 

خلصوها  خلصوا كل كلام ممكن يتقال .. الباقي يتحس ويتشاف  

بس محدش قالك ان انتي نجمة السما اللي فووووووووووق

 اللي تبصيلها وقت الخنقة تفرحي وتقولي يارب انا بحبك .. 

النجمة اللي فوق بتنور وسط كل الضلمة اللي حواليكي .. 

انتي بالنسبة لي النجمة دي ... النجمة اللي بتقع عليا وانا بتمنى امنية ..

 وساعتها باب السما بيكون مفتوح .. وربنا يتقبل والاقيكي معايا  

انتي النجمة دي اللي دايما بتلمع ودايما مبسوطة حتى لو هي مش كده من جواها

بسس علشاني بتبقى بتلمع ومبسوطة 

كيكي نجمة السما .. هدية ربنا ليا .. يعني اول واحدة اتصل بيها وانا منهارة وترد عليا وهي نايمة وتتخض عليا

 وتسيب اللي ف ايدها وتجيلي جرررررري 

كيكي نجمة السما .. اللي ف عز ماهي تعبانة تنزل تلف معايا وتقولي انا عايزة اعمل شوبينج

 علشان بس انا اخرج 

كيكي نجمة السما .. اللي عمرها ما طلبتني ولا احتاجتني و لقيتني 

ومع ذلك عمرها ما قالتلي كده ولا فكرت ف كده اصلا 

كيكي نجمة السما .. يعني "منكاش" الفرحة ف حياتي انا وكل اللي حواليها 

كيكي يارب انت عارفها ... ايون هي دي اللي كملت "24" سنة النهاردة 

حبها يارب واجبر بخاطرها وارزقها الفرحة من حيث لا تدري ولا تحتسب ..

 زي ماهي بتحبني وانا بحبها .. وزي ماهي سبب فرحتي ف الدنيا دي 

كل سنة وانتي احلى واغلى نجمة ف الدنيا 

واول " بـــــــــــــحبك" ف الــ " 24" مني انا 

انا واثقة ان محدش قالها قبلي 


السبت، يوليو 20، 2013

كلام نسوان

من عمايل ايد .... мαησηα بالظبط الساعة 12:52 م 4 داقوا الشاى وقالولى رأيهم




أول هام : كل سنة وانتوا طيبين وحلوين وقلوبكم عامرة بالخير 

ثاني هام : وحشتوني بغباوة :) بس مش عارفة كل ما أجي أكتب بوست 

تحصل حاجة تطيره من دماغي 

ماعلينا المهم إني جيت 

مش هاتكلم كالعادة في السياسة مش علشان أنا رايقة أو مش في دماغي البلد 

بس علشان أنا هنا باجي أروق دماغي :) مش طالبة وَش سياسة 

عنوان البوست غريب .. الحقيقة هو مش كلام نسوان هو كلام حريمي

يعني على لسان الإناث

 بس أنا إختارت اسم تجاري هههههه 



علشان الناس تيجي للمدونة تقرأه أنا عايزة ناس كتير تقرأه وتتوجع 

آه تتوجع .. البوست عن "وجع القوارير" 

كلام .. او كلمتين تلاتة بالكتير سطر .. بس فيه وجع السنين 

ده للي بيحس يعني :) 

وحشكوا رغيي صح هههه .. خلاص ياللي بتقول انجزي هانجز اهووو بس ماتزؤقش كده... الله





=============

ــ عارفة ما بقتش أحس معاه بأمان .. فبالتالي مابقتش قادرة أفرح ولا أفرحه.

***********

ــ عارف قبل ما تحصل المشكلة دي كان أي حد يشوفني يقولي "يا بخته"

أه يا بخته اللي مفرحك أوي كده .. دلوقتي بقوا بيقولولي إرجعي إفرحي تاني عيونك

 "إنطفت".


***********

ــ مافيش في حياتي فرحة بتكمل .


*******

 ــ بقالي يومين بصرخ جوايا إن المبادى مبتتجزأش..

و عملت حاجة مش ضد مبادئي و لا عكسها… و لكن نزلتني من نظر نفسي قوي …


***************
ــ # انا أسف.

*ﺃسف ؟! ليه هو إنت دوست على رجلي من ﻏﻳﺮ ﻣﺎﺗﻘﺼﺪ !

,, ده انت يادوب دوست علـى قلبي وخليته ميثقشّ في حد تاني ,,مش محتاجه أسف يعني.

********************

ــ واجهته وقالي " مثنى وثلاث ورباع" الشرع محللي أربعة مدام هاعدل بينهم 

قلتله عدل ؟! أي عدل اللي انت بتتكلم فيه ده ؟

أول يوم في رمضان والعيد وكل المناسبات هتبقى مع مين فينا معاايا ولا معاها ؟!

 في عز البرد وانا محتاجالك تدفيني .. هتبقى معاها ولا معايا ؟! 

في عز الحر وانا محتاجالك تبقى جنبي نسهر سوا نخرج سوا .. هتبقى معايا ولا معاها ؟!

أي عدل ده اللي بيخليك معاها 11 شهر في السنة ومعايا شهر واحد بس في السنة ؟!!

أي عدل ده اللي خلاك تستفرد بقلبي لوحدك وتحطها هي شريكة معايا 

في قلبك واحاسيسك وانفاسك وحنيتك ؟!

أي عدل اللي خلاك تحطني وتحطها قدام الأمر الواقع

 هي تقبلني كـ "ضرة" وانا أقبلها كـ "ضرة" ؟!! 

فين حقي وحقها ؟ فيك كامل ..؟!!! زي ما انت واخد حقك مننا وفينا بالكامل ؟!!

*******************

ــ #هو احنا ليه كده ؟

* ازاي يعني؟

#يعني كده .. مش بنعرف نفرح .. هي الفرحة دي شكلها ايه ؟ طيب طعمها ايه؟ 

طيب هي كل الناس دي زينا ولا احنا بس اللي كده  ؟!!

*...............................................................


***********

ــ لما كان بيعدي علينا يوم حلو كنت بفرح لاني ببني معاك ذكريات حلوة

 نفتكرها مع بعض بس اكتشفت اني كنتت ببني وجع افتكره لوحدي!


****************

ــ عارف .. مابقتش بثق فيك زي الأول .. وانا مكنتش عايزة اعيش معاك كده..

ماكنتش عايزة احساس الشك يدخل اصلاً .. مسيطر عليا مش مخليني عارفة افرح ولا أفرحك 

مش قادرة .. ومش عارفة .. مش مسمحاك !!

******************

ــ انا عايزة ابقى "ماما"  :)) أتاري الأمومة دي مش سهلة

عارفة الأمومة تضحية بتبدأ من أول يوم خطوبة مش من أول يوم ولادة 

علشان كده أنا مستحملة وهاستحمل ..

*********

ــ عارفة كل أحلامنا اللي كنا بنحلمها سوا ونقول هنعملها

 مع أزواجنا علشان حرام نصاحب ؟!

كل ده ما بيحصلش .. وبيتحول وجع .. وجع وبس!!

**************

ــ ما بيفهمش التلميحات..ما بيفهمش الكلمات..ما بيفهمش الإشارات..

ما بيفهمش التناقضات..ما بيفهمش أي حاجة خالص!!


************

ــ من كُتر مـا بنبقي حافظين ردود أفعالهم و أنفـعـالتهم حتي في 

زعلهم بيبقي نفســنــا فـي مرة يخيبوا ظننـا

ويـعملوا رد فعل غير اللـي كـُـل مرة بيبقوا مُـصممين يوجعونا بيــِه.

***************

 ــ عارفة انتي إحساس إنه يوحشك حد مات  „ أيوه هو ده كده بالظبط ! :"(


**************

مش عارفة عايزاه يقرأ اللي بكتبه دة ولا لأ

 بس سواء قرأه او لا فهو فايته اللي في الدرافتس

ماعشتش في حياتي غير ال 40 يوم دول

عيشت حب من بتاع احلامي حب بيدي للروح 

حب رجعني لنفسي بس رجعني عشان يوجعني

الحدوتة ماكانتش كبيرة بس مريحة 

بحبها و بحب تفاصيلها و بحبه 

قلبي بيدق ليه و كل حاجة ناقصاه بس انا باجي عند مرحلة

 طاقتي بتخلص مابأعرفش امسك في الحبل اللي بيربطني بحد

 و بأسيبني اقع منه لو هو عمل جهد و لحقني طاقتي دي بتتجدد

 مالحقنيش بأقع و بتتكسر كل حاجة

 و هو مش بس ساب هو قطع الحبل و نطره و رماه 

اليوم اللي قبل ما يسبني فيه كنت بأحكيلها قد ايه انا مبسوطة

 و اني طايرة كانت متضايقة عشان هي مابتحبوش 

لحد دلوقتي مافهمتش السبب ماستوعبتوش و مش هأدور اني افهم

كل اللي شاف صورتنا قالي انتوا حلوين اوي ليه حصل كدة

أسفُه علي الطريقة وجعني اكتر ..

 وجعني لانه مش فاهم ان النتيجة هي اللي مؤلمة مش الطريقة

بغير منهم عشان هما بيقدروا يكونوا معاه في اي وقت

بحاول انسي و بحاول انشغل بالمذاكرة و باللي حواليا

 بس بلاقي روحي لسة واقفة عند يوم معين و لحظة معينة و مش قادرة تتخطاه

***************

ــ ولا حاجة .. غير إني دلوقتي محتاجاه جنبي !!


**************

ــ عارف ايه اللي وجعني أكتر إني ماتخيلتش ابدًا إن فيه حد غيري 

قعد معاك و إنت تحكيله أحلامك ويسمعك 

غيري أنا !!

***********

ــ انا اصلاً مش عايزة أشوفه ولا أكلمه .. أصله هيكدب تاني 

وانا مابحبوش يكدب .. علشان هاكرهه وانا مش عايزة اكرهه

 انا بحبه !!

**********

ــ عارفة اصعب وقت بيعدي عليا بعد ما اليوم يخلص بكل مشاكله والتحركات اللي فيه .. 

اقعد لوحدي وابقى عارفة انه معاها 

بيضحكوا وبيتكلموا مع بعض وانا بسمع جملة واحدة بس 

" الرقم الذي طلبته غير متاح او ربما يكون مغلقًا" !!

************

ــ مش عايزة اتجوز .. خايفة .. هو مش وحش بس انا خايفة يبقى وحش 

ماهم كلهم بيتحولوا بعد الجواز .. بيبقوا "وحووووووش" 

**************

ــ انا مش زعلانة على نفسي انا زعلانة على الست الغلبانة اللي  قاعدة جوة دي 

زعلانة على فرحتها اللي اتكسرت .. زعلانة على همها اللي اتضاعف بيا تلات اضعاف 

هم احساسها بالذنب ان هي اللي ألحت عليا أوافق عليه .. 

وهم إن هي كانت فرحت إنها إطمئنت عليا في "ضل الراجل"

وهم رجوعي ليها مش زي الأول خاااااالص ... بس ..

 وجعي عليها مش عليا !!

**************

و اسيب الزعل جوايا و اضغط عليه بحزن اكبر
و ارمي فوقيهم شوية زعل كمان متأجلين من ناحية تانية
 و اكتمهم بشوية احباط علي شوية خزلان لحد ما الاقي الوجع بقي جبل
 و صدري اتخنق و مش قادر يستحمله فينفجر
و بعد ما انفجر و افضي كل اللي جوايا ارجع تاني 
كأني بطير لاول مرة و كأني عمري ما عرفت كلمة حزن و اضحك
 و كأن قلبي ماكنش بيتقطع من كتر الوجع و العياط
و ارجع اتمسك بالحياة تاني كأني طفلة لسة بتستوعب مفاتيح فك طلاسم الدنيا
و افضل اعيد الدايرة اللي اتربطت فيها و بحاول اكسرها

**********

 بس خلاص .. كفاية #وجع 

البوست كان في بالي أحلى من كده بكتير .. بس .. ودائمًا بيكون فيه "بس" .. 

الويندوز وقع والنت فاصل وانا مش نايمة كان عندي أمل اشتغل 

بس النت مش مساعدني .. فهبطت كده .. و الفكرة ماعرفتش تـ "نهض"  تاني ههههههه

 وربنا يكفيكوا ويكفينا شر "النهضة".

البوست مش كله كلامي او احساسي فيه حاجات لقطتها من الفيسبوك وفيه من تمبلر 

اوجاع كانت مكتوبة في لحظة الوجع سمحت لنفسي أخدها 

وماكتبتش هي لمين منعًا للاحراج بالنسبة للبعض 

لكن لزم التنويه انها مش من تأليفي .. 

باقي الأوجاع تخيلات مني لمواقف ممكن أكون شوفتها او اتعرضتلها بشكل ما 

وحطيت نفسي مكان البنت أو الست .. وحكيت الوجع زي ماحسيته .. 

وفيه اوجاع سمعتها من صحباتي ..

 "قوارير" انكسروا بلا رحمة ..

 بس علشان متربين وبنات ناس 

هو ده كل ذنبهم في الحياة ..

وجعتوني فكتبته اهداء "لكُن" 


أخيرااااااا  

الوجع بيخف والله بيخف بس لازم نبقى احنا أقوى منه 

والأيام السودة بتيجي بدالها أيام بيضاااااا 

بس ساعتها بنحس بحلاوتها بعد ما دوقنا مرارة الأسود 

"الحمد لله " 

نشد حيلنا تاني ونقف تاني وادينا اتعلمنا وادينا بنقوى 

الضربة بتقوينا وتخلي عودنا ينشف .. 

صوت ضحكتكن " عَجِز"  خلوه يرجع شباب تاني من فضلكن 

صباحكم فل وورد بيضحك :) 



استنوا استنواااااااااااااااااااااااااا إيه ده انتوا نسيتوا ؟ 

من امتى بتمشوا من غير مايكون في دعوة حلوة ليا ؟؟ 

يلا قولوا معايا " ربنا يحفظلي أمي ويباركلي فيها

 ويحفظلي اخواتي ويباركلي فيهم ويحفظلي جوزي ويباركلي فيه 

وعُمـــــــــــــر حبيب القلب الغالي ابن الغالي يحفظهولي ويباركلي فيه " 

قولوا آميييييييييييييييييييين .. لكم مثل ما دعوتم لي به 

ومحدش يقر اللي هيقر هو عارف انه بيته هيولع :))) 

كفاية عليكوا كده النهاردة ... سلااااااام 





 

ೋ واحــد شـاى ♨ Template by Ipietoon Blogger Template | Gift Idea