احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الأربعاء، فبراير 25، 2009

وكان اللقاء ..

من عمايل ايد .... мαησηα بالظبط الساعة 12:29 ص 0 داقوا الشاى وقالولى رأيهم



واسبوع قبلها مابنامش .. تفكير مابيبطلش فى دماغى

وتساؤل بيلح جوايا يعنى ايه اول ماتشوفيه هترتاحى

يعنى ايه اول ماتشوفيه هتحسى


انك ده اللى كنتى هتموتى من الفضول وتعرفيه

ياترى اسمه ايه .. ياترى شكله ايه .. ياترى والالاف من ياترى

وكان اللقاء ..

وزى اى اتنين قعدنا واتكلمنا .. وبعد مرور ساعة

حسيت انى مرتاحة .. ارتياح غريب ..

.. وساعتها بس ادركت معنى كلمة سكينة

ان روحك تسكن وتهدى وترتاح ..

وساعتها ادركت ان لازم قبل الرحمة يكون فى مودة

وقبل المودة لازم يكون فى سكينة ..

سبحانك يارب ..


***

احاسيس بنوتة مخطوبة





الأربعاء، فبراير 18، 2009

انا بصلى ..

من عمايل ايد .... мαησηα بالظبط الساعة 10:12 م 0 داقوا الشاى وقالولى رأيهم




ريتاج وريناد بنوتين تؤام بس زى السكر

لمضين ومش بيخافوا من

حاجة وصغنين فى السن تقريبا عندهم سنتين ونص

باباهم ظابط ومطلعه لمضين جدا وجريئين اوى

وبما انى بحب اللماضة واى شيئ يمت للماضة

بصلة من قريب او بعيد

لما بيكونوا موجودين باقعد اتلامض معاهم واعاكسهم

وصاحبتنا سماء بقه الغيرة بتاكل فيها

علشان تكسب صداقته وتقدر تفتح معاهم حوار

زيهم زى كل الجنس اللطيف لازم تمدح فى جمالهم

وياريت لو تقولهم الله المانكير ده جميل اوى مين حطهولى

تلاقى ابتسامة رائعة نورت وشوشهم وتفردلك صوابعها وتقولك

آنا سونة هى اللى حطتهولى تقولها طيب انا عايز احط تقولك

لأ خليك كده ايديك وحشة

الاخت سماء سمعت الحوار لقيتها مسكت ايد ريتاج

وبتقولها ورينى كده

امممممممممم وايه يعنى منا عندى زيه واحلى منه بردو

وبتهز دماغها زى ماكنا بنعمل زمان واحنا صغيرين

انا طبعا ماتوقعتش اللى بيحصل ببصلها باستغراب

وعجبنى بصراحة انى اغيظها اكتر

فقلتلها طيب مابتحطيش ليه يا اختى

قالتلى اصل انا بصلى

مقدرتش اعمل حاجة غير انى اخدها فى حضنى

وابوسها واقولها ربنا يبارك فيكى ويحميكى ويحفظك يارب

كل يوم بتخلينى احبها اكتر من اليوم اللى قبله

واتمنى ان بنتى تكون زيها

ادعولى ان ربنا يرزقنى ببنوتة زى سماء بالظبط



الثلاثاء، فبراير 17، 2009

انه حقا َحيوان مفترى ...

من عمايل ايد .... мαησηα بالظبط الساعة 10:10 م 0 داقوا الشاى وقالولى رأيهم


بعت واحد يجيبلى ماكيتات لميكى ماوس وميمى

علشان حفلة عيد الام

علشان هنجيب ناس يلبسوها زى الحفلات اللى بتبقى فى الملاهى وكده

المهم استغلاهم راح لقى الماكيت ب 500 جنيه

قال ده غالى

راح جايبلى نمر وزرافة وحمار

( على اساس ان العيال عندى مايعرفوش شكل الحمار ايه )

بس مش ماكيتات هى حيوانت مجسمة كده ومبطنة من الاخر كده

اللى بتتحط فى المكتبات فى البيوت ديكورات يعنى

طبعا مش هاسقى فيهم قلت نعملهم شخصيات فى مسرح الاراجوز

المهم كل الولاد بيخافوا من النمر

لانه فاتح بقه كده وسنانه

باينة شكله مرعب بالنسبة لطفل

المهم لميت الولاد اخر اليوم وقعدتهم حواليا

وقعدت اعرفهم النمر ده ايه

قلتلهم انه من الحيوانات المفترسة وانه بياكل الحيوانات الضعيفة

وممكن ياكل الانسان لما يكون صغنن

ومش بيسمع كلام ماما وبابا

ولا كلام الميس

بعد ماخلصت شوية حكاوى لا بأس بها

جيت بسالهم النمر من الحيوانات الا اييييييييية ياولاد

لقيت محمود بمنتهى البراءة بيقولى الحيوانات المفترية

طبعا مع ذهول الولاد ومنظرهم من الخضة انى مسكت النمر

اللى بياكل الناس واجابة محمود الجهنمية

ماقدرتش امسك نفسى من الضحك

ومش قادرة انطق قعدت افهم فيهم

انه حيوان مفترس مافيش فايدة

هو مفترى لانه بياكل الحيوانات الضعيفة

وكانت النهاية باستسلامى وايمانى القاطع

بان النمر من الحيوانات

المفترية ههههههههه



الاثنين، فبراير 16، 2009

مصاص الدماغ ...

من عمايل ايد .... мαησηα بالظبط الساعة 10:02 م 2 داقوا الشاى وقالولى رأيهم


فجأة لقيت نفسى مسئولة عن 250 طفل

ربنا وحده اللى يعلم يعنى ايه تكون قاعد لوحدك

مع 250 جن صغير

وبشقاوتهم لوحدى وازاى اخليهم قاعدين

من غير ما يعملوا دوشة

وكل واحد يروح فى الباص بتاعه من غير لغبطة

عايزة ااقول انى طلعت عينى على ما بس

قعدوا كل واحد فى مكانه

وقدرت بعد معاناة انى اسيطر على الوضع

واذ فجأتاَ الاقى شيئ طوله 35 سم

علشان مااظلموش ممكن

يكون 40 سم يشق صفوف الاطفال

واتشعلق فى رقبتى وبيقول هاااااااااااااااااع مصاص الدماغ

هامص دماغك هااااااااااااااااااااااااع

انا انفجرت من الضحك البيه زيزو اصغر ولد عندنا فى الحضانة

والاستاذ شاف انى شريرة علشان مقعداهم مكتومين فحب يخلص

عالم الاطفال من شرى ههههههههههههه

بس كانت طالعة منه زى العسل

انا مصاص الدمااااااااااااااااغ هاااااااااااااااع

ياحبييبى انزل يقولى انا مش حبيبك هااااااااع انا مصاص الدماغ

طيب خلاص حقك عليا يا زيزو انزل ماسكنى

من رقبتى وانا

اصلا بغير انا مش زيزو انا اتحولت

ماشاء الله كمان اتحولت

يقولى اه بقيت من المتحوليييييييييييين هااااااااااااااااااااااع

واخيرا نزل علشان يتحول ويرجع زيزو

ورجع بيبتسم ابتسامته السكرة دى

ويقولى ميس هو الباص جه

بمنتهى البراءة نسيت اقولكم انه

نزل لما قلتله انزل بدل ما هاديلك حقنة ههههههههههههه

سألت مامته تانى يوم هى صحبتى عن كل اللى حصل ده تقولى

ايوة نسيت اقولك انه بيتحول لمصاص دماغ لما بيكون عامل

حاجة غلط او لما يكون حاسس انى اتنرفزت اوى عليه علشان يضحكنى

بصراحة انا مت من الضحك وطبعا احباب الله اما صدقوا انى

تحت ايدى مصاص الدماغ راحوا هجموا عليا وقعدوا يبوسوا فيا

اللى انقذنى ان الباص جه

وقدرت اسيطر على الباقين لحد ما الباص يروح ويرجع تانى

كل ده علشان اتفرج على فيلم مصاصى الدماء

والمتحولون وهو سمعها مصاص الدماغ

( لان مامته حولت التليفزيون وقالت لا ده فيلم مصاصى دماء

يدوبك دخلت المطبخ كان الاستاذ جاب الفيلم وقعد يتفرج )

مش الدماء وشافهم بياكلوا

من الرقبة فاقتنع انهم مصاصوا الدماغ

نفسى اعرف حاجة واحدة قرأ الترجمة ازاى

وعرف انهم بيتحولوا ده اللى هيجننى

بس قلت يمكن يكون تعويض عن غباء

اخوه الكبير وعدم شطارته فى الحضانة

فربنا عوض مامته بطفل مثقف بيترجم انجليزى على طول




الأحد، فبراير 15، 2009

اتعلمت ارسم بيت ..

من عمايل ايد .... мαησηα بالظبط الساعة 10:27 م 0 داقوا الشاى وقالولى رأيهم


" عارفة يا ميس منى انا اتعلمت ايه النهاردة "

مسكت ايدى فى ايديها وايديها التانية
شايلة شنطتى وفوق كتفها شنطتها

وخارجة فرحانة جداااااااااا انها مروحة معايا

واحلى ابتسامة منورة وشها .. وباجمل صوت لقيتها بتقولى

" عارفة يا ميس منى انا اتعلمت ايه النهاردة ..
اتعلمت اكتب a كابيتل وسمول

واتعلمت ارسم بيت "

وكنا من شوية قاعدين بنرسم وعلمتها ترسم البيت

استغربت اوى انها قبل مابتمشى من الحضانة
بتراجع نفسها هى اتعلمت ايه فيها

سألت مامتها انتى علمتيها كده قالتلى
لأ والله هى بتيجى كل يوم تقولى
ياماما انا اتعلمت كذا وكذا فى الحضانة

وتنزل عند جدتها تلعب مع اولاد عمها وتطلع تقول انا اتعلمت كذا

وقبل ماتنام تقول يابابا انا اتعلمت كذا وكذا النهاردة ..

رسمت البيت حلو اوى وبسرعة ماشاء الله عليها ربنا يحميها ويحفظها

رسمته قدامها مرة واحدة راحت رسمته بعدى ع طول

فرحت اى انى علمتها حاجة ..

بالليل كلمتنى قلتلها عرفتى ترسمى السمكة

قالتلى ياميس منى انا مش عارفة ارسمها

قلتلها لما تيجى عندى هاعلمك ترسميها
قالتلى وهنلون مع بعض قلتلها اه

قالتلى انا بحبك اوى
( ودى اجمل كلمة بسمعها كل يوم من حبايبى )

قلتلها ليه قالتلى مش عاررفة قلتلها لأ لازم تعرفى
انتى بتعملى اى حاجة ليه ؟

قالتلى علشان انتى ميس منى
( هههههههههههههه وميس منى دى
تعنى الرسم والكلام والغنا

مع بعض وحاجات تانية بحب اعملها معاها )

قلتلها وانا بحبك اوى علشان شايفة فيكى حلم نفسى يتحقق

قالتلى نعم ( وده معناه انها مش فاهمانى )

قلتلها تصبحى على خير اشوفك بكرة

قالتلى حاضر

وحطيت السماعة ونزلت من عينى دمعة
وانا بدعيلها وبقول ربنا يحميكى ويخليكى ليا

ومايحرمنى منك ابدا ويرزقنى ببنوتة زيك اللهم اميييييييييييييييييييين


الفراق بقه عادة ..

من عمايل ايد .... мαησηα بالظبط الساعة 1:02 ص 0 داقوا الشاى وقالولى رأيهم

السبت، فبراير 14، 2009

وبَعُدْنا يا حُبِّي الأوْحَد ...

من عمايل ايد .... мαησηα بالظبط الساعة 1:06 ص 0 داقوا الشاى وقالولى رأيهم


تَرحالُكِ شيءٌ يَتجدَّدْ

ولقاؤكِ حُلمٌ أرصُدُهُ

في أٌفْقٍ تاهَ عنِ المَرصَدْ

يا وجهًا يَسكنُ في قلبي

يا ألفَ حِصارٍ في دَربي

أنتِ الأيامُ بأجمَعِها

أجملُ أُغنِيَةٍ أسمَعُها

وحديقة ُحُبٍّ أزرعُها ..

بمَشاعِرِ شَوقٍ

تَتولَّدْ

قد نَرحلُ يا عُمري الأوحدْ

أو نُصبحُ في يومٍ أبعَدْ

لكني مازِلتُ أُؤكِّدْ

إنْ نَفَدَتْ أنهارُ الدنيا

حبِّي أنهارٌ لا تَنْفَدْ

الخميس، فبراير 12، 2009

احببتك ...

من عمايل ايد .... мαησηα بالظبط الساعة 1:13 ص 1 داقوا الشاى وقالولى رأيهم

الأربعاء، فبراير 11، 2009

حسبنا الله ونعم الوكيل ...

من عمايل ايد .... мαησηα بالظبط الساعة 10:18 م 0 داقوا الشاى وقالولى رأيهم


شوفت دلوقتى ولاول مرة اوبريت
الحلم العربى باين ولا ما اعرف اسمه ايه

طبعا ماكملتوش لانى كان ممكن يجرالى حاجة

نفسى بس اعرف محدش من الناس اللى
فى ايديهم يحلوا القضية دى ده لو ليها حل شاف الاوبريت ده

( ده ع اساس انهم ماشافوش اكتر من كده وع الطبيعة كمان )

الاغرب من كده الجنود الامريكان واليهود سبحان الله

استغربت ازاى بنى ادم فى الدنيا يدخل بيت واحد
مايعرفوش ويبهدله هو واهله بالشكل ده

ازاى تقدر تضرب واحد ماعملكش اى حاجة اى حاجة تذكر

لا اله الا الله .. مقدرش اقول غير ان
دول مش بشر وكمان مختلين عقليا

والله العظيم عمرى ماتخيلت ان فى نفسية بالمنظر

حسبى الله ونعم الوكيل





الثلاثاء، فبراير 10، 2009

ماهمنى ..

من عمايل ايد .... мαησηα بالظبط الساعة 12:43 ص 0 داقوا الشاى وقالولى رأيهم
 

ೋ واحــد شـاى ♨ Template by Ipietoon Blogger Template | Gift Idea