احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الخميس، سبتمبر 30، 2010

انا وانا مثقفة :) ..

من عمايل ايد .... мαησηα بالظبط الساعة 7:27 ص 12 داقوا الشاى وقالولى رأيهم



صباحكم سكر

ازيكوا ازيكوا ياللى انا مابجيش عندكوا :( 

انتوا اللى دلعتونى اصلا وانا اتمرعت  :(

بس والله غصبن عنى

كان ف بيتنا عريس 

وقبلها كنت مشغولة  البال

وانا لما بكون مشغولة البال 

مابعرفش اعمل حاجة 

المهم انا جالى تاج  :) 

من ناس عزاز عليا جداااا

اولا جالى من رامى اخى العزيز صاحب مدونة بابى 

ثانيا بسام صاحب مدونة انا الريس 

ثالثا من منون صاحبة مدونة كلمات ف حياتى 

التاج المثقف انا سميته كده هههههههههه 

اخيرا هجاوب عليه 

ونقول بسم الله


ما هي كتب الطفولة التي بقيت عالقة في ذهنك؟

اكيد اكيد العشق الازلى ميكى  وماجد

وباسم وفلاش وزوووم



من أهم الكتاب الذين قرأت لهم؟

اهم من ناحية ايه  ماهما كلهم حلوين بصراحة

قرأت للناس الكبيرة والناس اللى لسه بتبدا ف الكتابة

انيس منصور واحسان عبد القدوس 

ويوسف السباعى ومفيد فوزى

وبردو   عمر طاهر واحمد العسيلى  واشرف توفيق 

وخالد الخميسى واحمد مهنى وهيثم دبور

كل اللى قرات لهم مهمين لانه اثروا فيا وافادونى



من هم الكُتاب الذين قررت أن لا تقرأ لهم مجددا؟

احم احم نجيب محفوظ خنق اهلى ههههههههه


في صحراء قاحلة ، أي الكتب تحمل معك؟

طبعا دون منازع ماوراء الطبيعة للدكتور احمد خالد توفيق

اه بعشقها دى ف كل سفرياتى حتى لو غطسانة ف المية 


ما هو الكاتب الذي لم تقرأ له أبدا وتتمنى قراءة كتبه ؟

منى درويش :))))) 

 بهزر بهزر الله 

احمد العايدى و وليد طاهر وعباس العقاد ويحيي حقى وبهاء طاهر



ما هي قائمة كتبك المفضلة؟

انا كده هاكتب اغلب الكتب اللى قرأتها لان انا الكتاب اللى مابيعجبنيش 

برميه من ايدى 

نقول بسم الله الرحمن الرحيم 

الرحيق المختوم .. صفى الرحمن المباركفورى

الذكور والاناث فوارق واختلافات  .. ده كتاب مترجم

اتنين اتنين .. انيس منصور

حضرة المحترم .. نجيب محفوظ

مذكرات شابة غاضبة .. انيس منصور

الذين عادوا الى السماء .. انيس منصور

الذين هبطوا من السماء .. انيس منصور

زوجة احمد .. احسان عبد القدوس

شكلها باظت .. عمر طاهر

اول مكرر .. هيثم دبور

كتاب مالوش اسم .. احمد العسيلى
 

عزازيل .. يوسف زيدان

رباعيات جاهين .. صلاح جاهين

مشاعر مرهقة .. سارة درويش

زوجى مازال حبيبى .. سارة درويش

موس حلاقة .. شريف شقاريه

رسم قلب .. حسن الحلوجى

حواديت عيل موكوس .. مراد ماهر

سلك شايك .. مراد ماهر

مبسوطة يا مصر .. اشرف توفيق

اغتراب .. احمد مهنى

تاكسى .. خالد الخميسى

مصر فى قطعة جاتوه .. سلسلة مدونات للجيب

مشروع وطن .. سلسلة مدونات للجيب

اناكارينينا .. ليوتولستوى

ارواح شريرة  .. هنرى جيمس

سلسلة ماوراء الطبيعة .. د/ احمد خالد توفيق

حاجات كتير لارسين لوبين

واجثا كريستى
 
شورلوك هولمز 
  
ف حاجات تانية بس انا مش فاكراها للاسف :(

المقامات محفوظة للكتاب طبعا  .. انا كنت اللى بفتكره بحط اسمه 



ما هي الكتب التي تقرأها الأن؟

كنت بدات ف قنديل ام هاشم لـــ " يحيى حقى "
 
والبحث عن السعادة لــــ " محمد غالية "



اللي بعت الدعوة ؟

رامى .. مدونة بابى 

بسام .. مدونة انا الريس 

فراشة ..  مدونة كلمات من حياتى



أرسل الدعوة لمدون واحد على الأقل من أجل مشاركتنا في القراءة؟

هادبس فيها مامتى ريم

مدونة رسايل بلا بريد 

اصلك يا مامتى بتنورى بلوجر كله 

بصراحة بوجودك 

*****

عايزة اقول ميرسى بجد لكل اللى اهدونى التاج 

ميرسى علشان استنتونى كتير اوى

وميرسى علشان خلتونى اشوف نفسى قرأت قد ايه ف حياتى 


صباحكم سكر سنترافيش 

بحبكم اوى 


الثلاثاء، سبتمبر 28، 2010

فاكر ..

من عمايل ايد .... мαησηα بالظبط الساعة 1:39 ص 21 داقوا الشاى وقالولى رأيهم





فاكر لما قولتلى وحشتينى والدنيا مالهاش طعم من غيرك  .. 

كنت بتكدب وانا صدقتك

فاكر .. لما قولتلى بحبك قولتلى انا قد الكلمة دى ومش هاسيبك تضيعى منى 

وانا صدقتك 

طيب فاكر لما قولتلى انا شايف فيكى حلم حياتى 

ونفسى اكمل معاكى حياتى وتبقى ام عيالى 

كنت بتقول كلام وخلاص وانا صدقتك 

فاكر لما بمنتهى البساطة نسيت كل كلامك اللى فوق ده 

وكنت مبسوط بنفسك اوى  

لما افتكرت انك كسرتنى ووجعتنى واثبت لنفسك رجولتك 

وافتكرت ان مافيش بنت تعصى عليك 

فاكر انا كنت عاملة ازاى ؟ 

طبعا مش فاكر .. لا اصلا انت ما اهتمتش تعرف  ..

طبعا  ولا همك جرحى ولا وجع قلبى 

جاى دلوقتى  وانت فاكر انه علشان انا طيبة وغلبانة بمنتهى البساطة 

هافتحلك قلبى من تانى واقولك اهلاااااا بيك من تانى 

وكانك ولا جرحتنى ولا وجعتنى 

فاكر انه انا زيى زى اى بنت عادية  انت عرفتها قبلى

ونسيت انى قولتلك ف يوم انى انا مختلفة وانى ماببكيش ع راجل 

اى راجل ف حياتى .. وانت ساعتها كنت فاكرنى بقول كلام وخلاص 

افتكر بقه كويس اوى دلوقتى انى مش عادية 

 واعرف ان انانيتك هى سبب تعاستك ف كل حياتك 

اما انا 

فــ " لست للحب فقط "

 و حياتى من غيرك احلى :)




ملحوظة مهمة جدااااا 

انا برج السرطان والمراة السرطانية لمن لا يعلم 

لما بتتجرح بتتجرح اوى  من اقل حاجة 

يمكن بتفتكرها سامحت وسكتت 

لكن لأ مابترتاحش غير لما تنتقم 

وانتقامها بيبقى وحش اوى

مابتقدر تسامح لانها مش بتبدأ بالاذية ابدا 

ومابتعرفش تبدأ حياة جديدة غير لما تصفى حساباتها 

وانا دلوقتى بصفى حساباتى 

علشان باذن الله هابدا حياة جديدة

وباذن الله هتبقى حياة سعيدة

 محدش يقولى سامحى علشان انا لاغية الكلمة دى من قاموسى

***

مش كل حاجة بكتبها ممكن تكون تخصنى 

بتعرض لحكاية بشوفها من منظورى انا 

وبيطلع البوست 



السبت، سبتمبر 25، 2010

يـــــــــــــارب ..

من عمايل ايد .... мαησηα بالظبط الساعة 5:40 ص





 " اللهم انك تعلم

اني اخترت مصيبة فراقه وهي علي عظيمة

خشية منك .. وخوفا من نارك

فخذه من قلبي .. كما اخذته من عالمي

واكفني شر الحنين اليه "


اللهم امين  


 شهرزاد الخليج                                                    

                                                                            




الثلاثاء، سبتمبر 14، 2010

مجرد عطر ..

من عمايل ايد .... мαησηα بالظبط الساعة 4:06 ص 54 داقوا الشاى وقالولى رأيهم


♥♥   ♥♥   ♥♥


لا زالت رغم الفراق تتعطر بعطره كل ليلة 

عادة ..  سرعان ماستنتهى بحلول عادة اخرى بحياتها 

فهو مجرد عطــــــر 

  هكذا يعتقدون ..

لكنهم لا يعلمون ان عطره

يبث  بها الحياة  كل ليلة


  ♥♥   ♥♥   ♥♥


منى درويش 

14 / 9 / 2010


الأحد، سبتمبر 12، 2010

♥..♥

من عمايل ايد .... мαησηα بالظبط الساعة 12:42 ص 40 داقوا الشاى وقالولى رأيهم





آيــــلة للسقوط فى حـــــــبك

 


منى درويش  :)              






                                

الجمعة، سبتمبر 10، 2010

ليلة عيد .. الليلة ليلة عيييييييد ..

من عمايل ايد .... мαησηα بالظبط الساعة 1:59 ص 44 داقوا الشاى وقالولى رأيهم





ليلة عيد ليلة عيد الليلة ليلة عيد

زينة و ناس صوت جراس عم بترن بعيد

ليلة عيد ليلة عيد الليلة ليلة عيد

صوت ولاد تياب جداد و بكرا الحب جديد

عم يتلاقوا الأصحاب

بهديه خلف الباب

في سجرة بالدار

و يدوروا ولاد صغار

و السجرة صارت عيد

و العيد اسوارة بأيد

و الأيد تعلق عالسجرة

غنية و عناقيد

يا مغارة كلا بيوت

تلمع متل الياقوت

كيف جبتي عالدار

تلج شرايط و قمار

مين اللي جاي بعيد

عم بيرش مواعيد

يدق بواب الناس و يمشي

و الخير علينا يزيد

**** 

يارب الخير علينا يزيد ونعيش كلنا ونتهنى يارب 

كل سنة وانتوا احلى ناس واطيب ناس واجدع ناس 

والاجمل من ده كله انكوا اخواتى  اللى ربنا بيكافئنى بيكوا  بيكوا 

وان شاء الله تنعاد عليكم الايام الحلوة دى بالخير دايما يارب 

قولوا اميييييييييييييييييييييين مجلجلة كده 

كل سنة وانتوا بخير  


*****

بكرة ف صلاة العيد الدعوات مستجابة

محدش يكسل وادعوا لنا كلنا

*****

تعاااااالوووووو ا هنا انتوا ماااشين رايحين فين ؟

فييييييييييييييييييييييييييييييييييييييييييييين عيديتى 

انا عمالة  اوزع كلام حلو هو ببلاش ده ولا ايه ؟


***

بحبكم اوووووووووووى 






الثلاثاء، سبتمبر 07، 2010

" صباح الخـــــــــــير " ..

من عمايل ايد .... мαησηα بالظبط الساعة 10:54 م 37 داقوا الشاى وقالولى رأيهم










موجوعة أنا بك أيها المجنون

الذي لاتستطيع امرأة فهمه مثلي

موجوعة بحبك

امازلت تتلقى رسائلي بشوق كما كنت تفعل دائما؟

العادة قاتله ومع ذلك نحن أحيانا في حاجة ماسة إليها

في حاجة لأن أمارس معك أبسط الأشياء اليومية

كأن أقول لك  
" صباح الخير "


الرائع  .. واسينى الاعرج



الخميس، سبتمبر 02، 2010

رامى .. بخير

من عمايل ايد .... мαησηα بالظبط الساعة 12:34 ص 25 داقوا الشاى وقالولى رأيهم


سالخير عليكوا 

جاية اقولكم مش تقلقوا يا جماعة 

رامى .. صاحب مدونة بابى

حلو وزى الفل وهيرجع تانى والله

كان بيدلع علينا بس عايز يشوف غلاوته عندنا

كل الحكاية انه  تعب من الاكتئاب اللى كل مايروح مكان يلاقيه 

وانه تعب من انه لقانا كلنا مهتمين 

بالفيسبوك ومحدش رجع يدون تانى 

تعبتوا نفسية الراجل هههههههههه 

حصل خير حصل خييييييييييير 

ممكن بقه كلنا نرجع نهتم تانى بالتدوين ونرجع تانى

مش مكتئبين كنا هنخسر حد مهم جدااااا 

وحد زووووق جدا

وكلنا عارفين رامى مش انا اللى هتكلم عنه

وبعدين مين هيجيبلى شوكولاته يعنى بعد كده هه ؟؟ 


 

ೋ واحــد شـاى ♨ Template by Ipietoon Blogger Template | Gift Idea