احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الأربعاء، أبريل 20، 2011

الى د . عصام شرف مع خالص تحياتى ....

من عمايل ايد .... мαησηα بالظبط الساعة 6:03 م







انا بحب التوقيت الصيفى ومش عارفة الناس مابتحبوش ليه ؟

ده كفاية ان اليوم بيبقى طويل ومشرق كده 

وبعدين يعنى انا واحدة قانون البيت عندى انى لو خرجت لازمن 

ولابد ارجع المغرب  يعنى  ف التوقيت الشتوى ده عفرتة لليوم 

ولا هالحق اخرج ولا هالحق اقعد معاهم واشبع منهم 

كمان الواحد يسهر ويشبع سهر وينام ويقوم براحته

وف الاخر يلاقى يادوب لسه الضه مأذن 

انما التوقيت الشتوى الواحد يسهر ويجى قوم بقه

يلاقى المغرب هتأذن واليوم خلص :( 

ولما كنت بشتغل كنت بروح الشغل وارجع اصلى وانام واشبع نووووووم 

وبعدين اقوم  الاقى يادوب لسه العصر  مأذن

مبقالوش ساعة الواحد يخلص ويفضى ويقعد يقرأ

ف الروف ع المرجيحة كده ماهو لسه بدرى بقه 

وقت المغربية ده بيبقى بيجنن ف الصيف 

انما التوقيت الشتوى ده الواحد يرجع من الشغل اصلااااااا العصر 

ولا بلحق ارتاح ولا بلحق اقرا ولا بلحق اقعد شوية ع المرجيحة ف الروقان 

وبعدين صدر قرار جمهورى باننا نقعد ع الكمبيوتر لحد المغرب بس

وانا مابلحقش بقه اقعد ف ظل التوقيت الشتوى المهبب ده

عااااااااااااااااا
وبعدين كمان انا عايزة اشتغل وكل مواعيد الشغل متاخرة وطبعا 

قوبلت كل عروض الشغل ده بالرفض من قبل البيت 

ازاااااااااااى ادخل البيت بعد المغرب 

انما ف التوقيت الصيفى هيبقى لسه بدرى  :( 

لا انا احتتتتتتتتتج وبشدة بقه ماليش دعوة انا عايزة التوقيت الصيفى 

الهى يسترك يا دكتور عصام وانت حلو كده وبتاكل فول وطعمية زينا كده عادى يعنى 

ارجوك تعملنا التوقيت الصيفى هو التوقيت الرسمى لمصر 

طيب لو مسترخمينه وسطنوه هههههه

يعنى ولا شتوى ولا صيفى مرجحوه ف النص كده

 ماهو لو ينفع تغير مواقيت الصلاة وتخلى المغرب تأذن 

الساعة عشرة بالليل انا معنديش اى اعتراض هههههه 

انما مش هينفع 

اعمل انا ايه بقه دلوقتى كده ظلم ع فكرة 

وبعدين هتقولى اقنعى باباكى يغير توقيت الدخول للبيت 

هاقولك ده انت

تغير مصر كلها اسهل اه وربنا 

اسألنى ده ابويا بقاله 30 سنة اهو وانا اعرفه اكتر منك 







20 داقوا الشاى وقالولى رأيهم:

فراشة يقول...

السلام عليكم يا منونتى

مش عارفه ليه مبتسمه طول ما انا بقرا وبضحك كمان

هو صحيح انا مبحبش الصيف كله ع بعضه كدا بس ميمنعش اني بحب التوقيت الصيفي مش عشان النهار بيطول انا أصلا كائن ليلي بحب الشمس ستمشي بسرعه :) بس التوقيت الصيفي بيخلي توقيتنا زي السعوديه

باباكي دا عسل طيب هو عنده حق مفيش خروج بعد المغرب
بس ليه مفيش كمبيوتر بعد المغرب :)

سيبك انتي من كل الكلام دا ممكن آجي اتمرجح معاكي شويه ع الروف

ღ أحاسيس آيـــوشـاღ يقول...

امممم انا بكره توقيت الصيف دا بشكل
بس علشان خاطرك نعمل اعتصام ونطلب منهم مش يغيروه هو احنا عندنا كام منونة

MR.PRESIDENT يقول...

يا حجة دي إرادة شعب

يا احنا الدولة الوحيدة إحنا والصهاينة اللي بنفلك كل سنه ليها دلالات كتير تاني حاجة أقولك حاجة حلواااااا
غيري ساعات اليبت علي التوقيت اللي انتي عايزاه وخلي حد يكلمك كدا بس
واطلبي جهاز الأمن الوطني وقولي لهم مش عاجب فلان ده حكومة الثورة .
ولا أقولك خلاث عشان عمي الحاج الوالد مش يضربني ، لأني بحرض علي البيت .
دي مشكلة داخلية ونطلب من جميع الفئات الموجودة في البيت الأجتماع والاتفاق علي خارطة طريق وأطالب بتشكيل حكومة اتلاف وطني . وأن يتصدر المجلس روح السيد قراره . ويلا عشان بدأت اهيس

mena يقول...

على فكرة انا زعلانه منك اوى

حضرة الظابط يقول...

احم احم
سلامو عليكو

ازيك يا منونة عاملة ايه
يارب تكوني كويسة وبخير
معاكي انسان عادي سابقا وحضرة الظابط حاليا

مع احترامي يعني لكل اللي انتي كتبتيه بس انا بحب الشتا وكل اللي يجي منه بمطره بتوقيتاته بقي بسلطاته بكل ما فيه
وكنت بتخنق جدا لما يغيرو التوقيت
فانتي حاولي تتأقلمي مع الوضع بقي


سلامو عليكو

мαησηα يقول...

منمنتى ..

وعليكم السلام يا حبيبتى

هههههه وهو المطلوب اثباته يا منمنتى

انا بردو كائن ليلى بس ف حاجات للاسف لازم تتعمل بالنهار علشان التوقيت المحلى لبيتنا :(

ولزمن بقه يبقى النهار طويل

عثل ؟!! ده انتى اللى عثل وربنا مايغلى عليكى لو عايزاه ابعتهولك وتبعتيلى دادك ماشى هههههههه

علشان دادى بيعتبر الكمبيوتر راجل غريب ف البيت ههههه اه وربنا فازاى تقعدى عليه باليل وهو نايم دى مصيبة سودة


تعالى حبيبتى والله تنورينى اهو الروف بقه مهجور دلوقتى :(

мαησηα يقول...

ايوشتى ..

:( كل الناس بتكرهه علشان مش فارق معاها يا ايوشتى انما انا فارق معايا بجد عاااااااااااااااااا

ماشى اعملوا الهى يستركم يا اختى ومايوقعكم ف حوجة لحد ابداااااا

мαησηα يقول...

بسام ..

عاااااااااااااااااااااااااا
منا عارفة كل ده للاسف عاااااااا

ماهو ماينفعش اغير ساعات البيت للاسف

انت ادعيلى اغير البيت كله هههههههه

والله لو عملت ايه عملنهاها الثورة دى قبل كده وبردو مافيش اى امل ف اى تغيير :((

мαησηα يقول...

منونتى .. حبيبتى ليه زعلانة منى

انا مش عارفة يا حبيبتى ولو غلطت ف حقك سامحينى اكيد غصب عنى

انا عملت بس ايه يا دى النيلة عليا :(

ميرام يقول...

ههههههههههههههههههههههههههههه
أول مرة أحس بأهميته
(:

мαησηα يقول...

عبدو ..

يانهار اسووووووووووح

عايزة اقولك انى اترعبت بجد

اول ماشوفت حضرة الظابط

حمدلله ع سلامتك ياباشا

انا بخير الحمد لله انت اخبارك ايه والله وحشتنا يا ابنى


ههههههههههههه
حاضر امرى لله يا باشا

كد ه انت بقيت باشا رسمى فهمى نظمى

мαησηα يقول...

ميرام ..

يا مرحبا يا مرحباااا

هههههههههههههه شوفتى يا بنتى والله ف ناس كتير مظلومة ازاى

mena يقول...

المشكلة انك معملتيش معملتيش اى حاجه حتى مش بتفكر تسألى عليا ولا مرة وانا متعوده ان قلبك الجميل ده بيحب كل الناس ولا انا مش من الناس اللى تحبيهم ولا غابو عنك تسألى عليهم ليا حق بقى ازعل ولا مليش

Antika يقول...

ايوة بقى بقى
انا بـ اطالب بالتوقيت الصيفى ولنفس الاسباب :( !!

م. حجاز يقول...

هههههههههههههه

ضحكتينى يامنونة والله
بس على فكرة ما ينفعش الراجل السكرة عصام شر ده يرجع فى كلامه احنا ما نرضهالوش بردك

بس انا عندى فكرة صغيرة ممكن شيخ الازهر يطلع يقول تم تحريك جميع اوقات الصلاة واحد صلاه الى الامام
يعنى العشار تبقى مكان الفجر والمغرب مكان العشا متهيألى كده باباكى مالوش حجة
شيخ الازهر هو اللى قال وفى رقبته
وبكده نوبجى قدرنا نطلع بساعتين زيادة وتخرجى براحتك باه
:)

ابراهيم رزق يقول...

انا مش بحب التوقيت الصيفى لكن طالما انتى بتحبيه ممكن نكلم عصام بيه انا باكل عن التابعى كتير و ممكن اقابله او عربية الفول اللى قدام الشغل ممكن يكون بيشترى منها
عندى اقتراح اخر نغير الاسامى مفيهاش حاجة لو سمينا العصر مغرب و المغرب عصر اشمعنا كل حاجة بيغيروا اسمها و امن الدولة بقى اسمه الامن الوطنى

خالص تحياتى

мαησηα يقول...

منون حبييبتى

يعز عليا زعلك يا منون بس انا حاولت اكتر من مرة اعمل كومينت عندك ف المدونة ومش عرفت اوصل معرفش انتى موقفة الكومينتات ولا ايه ؟

والله ابداااااا بس حبيبتى انا اغلب الوقت بلاقيكى موجودةانا مش متابعة بلوجر هنا الناس اللى بسال عنهم بشوفهم ع الفيس بوك وبرف انهم مش موجودين

انما انا وانتى التواصل الوحيد بينا هى المدونة وانتى ع طول بالنسبة لى موجودة حتى لما غيبتى انا كنت غايبة فمعرفتش

مش تزعلى منى ولو عندك حساب ع الفيسبوك ابعتيهولى ف كومينت واضيفك ونقدر نبقى متواصلين اكتر من كده

ليكى حق عندى بس انا عارفة ان قلبك حلو وهتسامحينى يا قمرة انتى

والله ربنا عالم بحبك قد ايه وعز عليا زعلك جداااااا :(

мαησηα يقول...

منمن ..

:(((((((((((((( مخلاص بقه انتى جيتى متاخرة يا منمن

خلاص صوتى لوحدى ضاع وسط الامة ود عصام مانفذليش طلبى ولا سمع توسلاتى

мαησηα يقول...

محمد حجاز ..

عااااااااااااااااااا

مخلاص بقه كلامى كان قبل قراره

ههههههههههههه طيب ايدك ع عنوان بيته او ايميله او الفيسبوك بتاعه وانا اضغط عليه ههههههه

мαησηα يقول...

ابراهيم رزق ..


هههههههههههههه كلمه الهى يباركلك يا خويا ف صحتك وعافيتك ورزقك قول امين

امممممم ممكن تصدق فكرتك حلوة وربنا

اوك نعم للتغيير بس اوعى نكون بنعك كده ولا ايه ؟ تبقى مصيبة

 

ೋ واحــد شـاى ♨ Template by Ipietoon Blogger Template | Gift Idea