ماعارف ...

العواف عليكم

بقالى فترة عايزة اكتب حاجة عن كلام الاطفال

اللى بيغلطوا فيه ومش بيعرفوا يقولوه

وانا صغننة ماما قالتلى

انى كنت اروبة ومش بغلط غير فى كلمتين بس

رمضان كنت بقولها مرضان هههههههههه

واسكندرية كنت بقولها استنكرية ههههههه

المهم .. مالقيتش حد مشجعنى كل ما اسال حد

من اصحابى يقولولى احنافاكرييين

ده من زمن هههههههه

محسسنى ان احنا عندنا 70 سنة

********

امبارح بقه لقيت هلال جه وطلع ع المكتب

وراح قاعد فوق الدفاتر اقوله قوم يقولى لأ

وبععدين قلتله مخصماك

وسكت قعدت اشتغل بحسسه بالذنب

لقيته فجأة ماسك دفتر

وبيقولى حبيبة قلب هلال ( انا يعنى هههه )

بصى ليييييييف ..

فأنا استغربت ليف ايه اللى هيجيب ليف هنا

لقيته بيقولى اهو

بصيت ههههههههههههه لقيته

بيشاور على الفيل

ههههههههههههههه

خلانى مت من الضحك

اقوله اسمه فيل يقولى ليف

قعدنا نهاتى مع بعض وبعدين

خلانى اقول لييييييف المجرم ويضحك ويقولى لخبطتك

ههههههههههه

***********

النهاردة لقيت مدرسة ماسكة

بنوتة وقاعدة تقولها قولى ح

والبنت تقول ح تقولها

قولى خ بقه تقول ح ههههه مافيش فايدة

وشوية لقيت هلال جاى يقولى حيييييييييييييه

اخدت جايزة

بقوله ايه حييييييييه دى

اكتشفت انه مابيعرفش يقول هــ

يخرب عقلك سالته اسمك ايه

لقيته بيقول حلال ههههههههههههههه

ماخدتش بالى خالص اول ماجه عندنا لانه كان عامل مؤدب

وصوته واطى دلوقتى بقه اتفرجوا عليه

*********

اه هلال بقه لما تيجى تقوله اعمل حاجة ومايعرفش يعملها

يقولك ماعارف هههه بس بتطلع منه عثولة اوى

طبعا منطوقة غير وهى مكتوبة

**********

نسيت فى حاجات تانى كنت عايزة

احكيها بس نسيتها

لما افتكر هابقى اجى اقول

ان شاء الله

6 ابريل يوم مش عادى فى شارعنا ..

6 ابريل يوم مكنش عادى

المهتمين بالسياسة واحوال البلد بيعتبروه يوم اضراب

و يوم اعتقد بيحاولوا يعملوه يوم الاضراب الرسمى

ولو الحكومة عجبها الحال ممكن تعمله اجازة

او من ضمن الاعياد الرسمية لمصر

انا والناس اللى ساكنين فى شارعنا مش مهتمين بالسياسة

بس بردو يوم 6 ابريل مكنش يوم عادى

يوم 6 ابريل نور الدنيا كلها

الدكتور عبد الرحمن جمال

اللى هيبقى اشهر دكتور صيدلى فى مصر


الدكتور اللى كان حلم لمامته وباباه

وفى وقت من الاوقات كان حلم مستحيل تحقيقه

وخلاص كان هيبقى امر مسلم بيه ان ام عبد الرحمن

و عمو جمال جوزها مش مكتوب لهم

ان يبقى ليهم ولاد

بس صدق رسول الله صلى الله عليه وسلم لما قال

ان الدعاء من ضمن الاسباب اللى بتغير القدر

وكانت دعوتناكلنا احنا جرانهم فى الشارع

ودعوة باباه ومامته فى كل وقت وفى كل صلاة

مستجابة بفضل الله والحمد لله ربنا رزقهم باجمل عبد الرحمن ربنا خلقه

ماشاء الله عليه عثول وصغنن

عمرى فى حياتى ماشفت فرحة زى فرحة باباه ومامته

شيلته بين ايديا وبوسته وجسمى ساعتها قشعر

ودعيتلهم من قلبى ان ربنا يبارك فيه ويحفظه ويهديه ليهم

ياريت اللى يقرأ البوست ده يدعيلهم بان ربنا يحميه ليهم ويحفظه

ويدعى كمان لكل محتاج ربنا يرزقه وما يحرم حد ابداااااا من النعمة الجميلة دى

اللهم امييييييييييييييييييين

وعلشان كده يوم 6 ابريل مش يوم عادى بالنسبة لشارعنا

ويوم عمره ما هيتنسى

وده سبب يخلينى اقول ان السنة دى حلوة وكلها فرح باذن الله

وزدت تفاؤل اكتر منا كنت متفائلة مافضلش غير انى اتجوز بقه ههههههههههههههههه

كل المعجزات السنة دى اتحققت الا معجزة جوازى حاجة غريبة هههههههه

عوووووووووو ام عين مخلوعة .. سفاحة الاطفال

سالخييييييييير عليكوا يا احلى ناس

شو اخباركم .. ان شاء الله تكونوا رايقين :9:

النهاردة حصلت حاجة غريبة جداااااا ضحكتنى اوى

من اسبوع كنت لابسة اللينسز فى الشغل وتعبتنى بسبب التراب

وحاولت اخلعها فى المكتب معرفتش بسبب ان الاضاءة ضعيفة وهى اصلا

تاهت جوه عينى :8: .. المهم

فرحت اخلعها فى فصل كان فيه نور كويس وطبعا قدام الاولاد

هما لقونى بطلعها من عينى تنحوا وعنيهم برقت هههههههههههه :12:

وانا بقول اخيرا ووببص للعدسة بشوف فيها ايه اللى تعبنى

وقعت عينى عليهم وهما مبرقييييييين فقلتلهم شوفوا انا خلعت عينى

واللى مش هيسكت هاخلعله عينه زى كده بالظبط

العيال طبعا سكتم بكتم وياعينى تنحوا اكتر :3:

هههههههههههه

الاغرب بقه لقيت واحد ابن واحدة صاحبتى اسمه محمد

راح لمامته وحلف ماهو رايح الحضانة تانى علشان ميس منى صاحبتك :11:

هتخلعلى عينى وبقاله اسبوع بيحلم بكوابيس هههههههههههههههههههه

انا سمعت كده فطست على روحى من الضحك تخيلوا العيال بيقولوا عليا ايه

اكيد بيقولوا امنا الغولة او ام شوال او ام عين مخلوعة ههههههههههههه :9:

عجبتنى فكرة انى مرعببببة عوووووووووووو ههههههههههه

وبجد ماصدقتش ان فى اطفال لسه بتخاف وساعتها افتكرتنى وانا صغنونة

كنت بخاااااااااف من ........ مش هاقولكم الا لما تقولولى كل واحد كان بيخاف من ايه وهو صغير

ويحكى حكايته عن الموضوع ده مستنياكم :)

وخافوا ع عيالكم منى :12:




عووووووووووووووووووووووووو

مـــع الايام ...

مع الايام .. هانسى كلام اتقالى

وانا لسه بدور ليا على فرصة علشان انساه

وادى الايام عدوا وجه بكره وجه بعدوا ..

بعيد عنه وانا بردو بقلبى معاه ..

بقالى زمان بخاف احكى..

بدارى دمعتى فى ضحكى ..

ولو احساسى كان ملكى هاغير فيه ..

بقالى زمان وانا بهرب وبسأل ليه..

وبستغرب بحبه كل ما باجرب احب عليه ..

بجد مافيش فايدة علشان افضل على الحال ده ..

وهو ياقلبى انا من ده عليا بايه..

معدش خلاص ينفع نقرب تانى او نرجع..

طيب اضحك ليه على نفسى واقرب ليه ..

بقالى زمان بخاف احكى بدارى دمعتى فى ضحكى

ولو احساسى كان ملكى هاغير فيه

بقالى زمان وانا بهرب ..

وبسأل ليه وبستغرب ..

بحبه كل ما باجرب احب عليه ..

انا مش هابقى دكتورة ...

كالعادة وربنا مايحرمنى منها عادة

قعدنا ندردش النهاردة مع بعض لحد ما الباص يجى

ونرووووووح

لقيتها بتقولى ميس منى عارفة انا لما اكبر هابقى استاذة

مش هابقى دكتورة

وهاقعد الاطفال ساكتين زيك كده ولما اضربهم هاضربهم بالراحة

اخدتها فى حضنى بجد البنت دى مش ممكن

فبقولها ليه حبيبتى مش هتبقى دكتورة

قالتلى الدكتورة بتدى حقنة بتوجع الاطفال هههههههههههههههه

قلتلها طيب ما انتى بتحبى دكتور ياسر مش هو عثل زى ما انتى بتقولى

اطلعى زيه دكتورة عثل

قالتلى لأ .. انا بحبه بس بحبك انتى اكتر وهاطلع استاذة زيك

والله بجد انا قعدت حضناها وابوس فيها لدرجة انها قالتلى كفاية عايزة اقولك حاجة

ضحكت وقلتلها قولى .. قالتلى هو انا هامشى من الحضانة امتى ؟

قلتلها لما يوسف يكبر شوية ( يوسف اخوها الصغنن )

قالتلى وهى بتتنهد كده .. اممممم وهاروح المدرسة قلتلها ان شاء الله

قالتلى هناك بردو فى ميس منى بس شكلها وحش اوووووووووى

استغربت انها بتقول كده فقلتلها ازاى شكلها وحش

قالتلى بتضرب الاطفال جامد بتقطعهم من الضرب

خليها هى تيجى هنا وانتى تعالى معايا المدرسة

قلتلها ياريت يا سماء .. بس كلمة ياريت ما بتعمر بييييت ..

وللاسف الباص جه وروحنا

بنتى حبيبتى .. دايما رافعة راسى ...

حبيبة قلبى وعنيا اول ماشافتنى الصبح

لقيتها جريت عليا واديتنى حضن كبيييييييييييير

وقالتلى كل سنة وانتى طيبة يا ميس منى

انا كنت تعبانة وماليش مزاج والله اروح وكان عندى احباط

لانهم قالولى مش جريئة ومش هتعرف تقول قدام الناس الحديث

وهتخاف زى السنة اللى فاتت

بس لما شفتها جت بدرى زيها زى اطفال العرض فرحت وحسيت انها

مش هتكسفنى

وهى رقيقة وصوتها هادى وكل ما اقولها سمعى يا سماء

تقوم تنكسف وتقول بصوت اهدى كمان من صوتها

وشيرين تقولى يا ربببببببببى عليكى حرام يا منى

دى حفلة وقدام ناس محترمة مش هزار ولا قدام الاطفال

وانا شوية وهعيط اقولها يابنتى ماهى زى العسل اهى

تقولى لأ .. انا هاحفظ زين

وخليكى انتى فى سماء انا مش هحفظها ولو طلعت فى الحفلة هتبقى ع مسئوليتك

واسمعلها وهى تقولى والله ما تخافى يا حبيبتى انا بحبك ومش هاكسفك

اول ما قالتلى كده بجد حسيت انى نفسى اوى

اخدها من باباها وماماتها اقولهم ماينفعش تسيبوهالى

حسيت انى مش عايزة حاجة من الدنيا الا سماء

****

وجه باباها ومامتها وباباها يقولها سماء

هتقولى حلو علشان نتفسح وهى تقوله

يابابا ما تقلقش انا هاقول زى ما انت حفظتنى

ويقولها انا عارف بنتى حبيبتى دايما رافعة راسى

مامتها اعصابها كانت بايظة مش قادرة تنطق ههههههههه

****

وحانت اللحظة الحاسمة

وطلعت اجمل بنوتة على المسرح وقالت الحديث الشريف

والبنت ماشاء الله عليها

صوتها معرفش بقى قوى وواضح جدااااااااااا

لدرجة انها اول ماخلصت لقيت الناس بيخطفوها منى

ويشدوها وانا اقولهم ايه بنتى ابعدواااااا

واخدتها فى حضنى وانا بدمع والله من فرحتى بيها

ربنا يحميها ويحفظها ويكرمها واشوفها احلى وارق بنوتة شفتها فى حياتى

****

والحمد لله خدت العين التمام وهى بتتفسح وقعت

واتخبطت خبطة جامدة اصلا المرجيحة فكت وهى عليها وكات هتروح فيها

وسخنت وتعبت

اعوذ بالله من عين الحساد

الحمد لله انها جت ع قد كده

****

اه نسيت اقول انها الوحيدة اللى جابتلى هدية عيد الام

جابتلى ساعة رقيقة اوى حبيبة قلبى ربنا يحميها يارب

وافـــــــــــــــتكــــــــــــــــــرت ...

حياتى وهو مش فيها سنين عدت رضيت بيها

وفاكرلو قابلت عنيه عادى جدا هاعديها

واديك ياللى افتكرت نسيت

قابلتوا الليلة واتهزيت

طب ازاى فى حاجات بتموت

بتيجى الصدفة تحييها

وافتكرت لما جت عينى فى عينه سنينى معاه

وافتكرت وعد كان بينى وبينه زمان خدناه

وافتكرت مسكته فى ايدى وايدى خلاص سايباه

قصادى عيونه محتاره يقرب ولا يتدارى

جه اليوم اللى اشوفه انا فيه

ومانتكلمش يا خسارة

دى صعبه عليا واعمل ايه مافيش فى ايديا شئ تانى

خلاص اهو اسمى شفت عنيه عشان دى بجد وحشانى

وافتكرت لما جت عينى فى عينه سنينى معاه

وافتكرت وعد كان بينى وبينه زمان خدناه

وافتكرت مسكته فى ايدى وايدى خلاص سايباه



*********

والله اللى كتب الاغنية دى

اكيد مليون فى المية عاش الموقف ده

وكلمة صعبة دى شوية

على اللى حسيت بيه لما عشت الموقف ده

انا ع فكرة بجد متضايقة ومخنوقة ونسيت انا كنت هاكتب ايه ؟

مش فاكرة غير انى

افتكرت .. وافتكرت .. وافتكرت ... :(

مــــــــحـــــــــــبـــــــــــطـــــــــــــة

عندى احساس شنيع بالاحباط ..

معرفش ليه الناس فاكرة ان الاخلاق مالهاش اى عازة فى زماننا ده

حاسة انى المفروض اجى زمان ايام

سى السيد وكده يمكن كنت هابقى مبسوطة عن الزمن اللى انا عايشة فيه ده

يا انجازاتك يا 2009 ....

حسيت انى مليت شوية ولبسى اتظبط عليا .. فررررررررررحت


وقلت اكيد انا تخنت كل ما اسال حد يقولى تخنتى ايه اتلهى


فقلت اقطع الشك باليقين ورحت وزنت نفسى



وكانت مفاجأااااااااااااااااة


انا تخنت


وصلت لوزن عمرى ما وصلتله قبل كده



ولا كنت احلم بيه



بقيت 58 كيلو جرااااااام



ياااااااااااهو



والله الاكل والنوم ده بيجيب فايدة بردو



ههههههههههههههههههههه



ويعتبر هذا تانى انجاز احققه فى 2009



والله شكلك فعلا هتبقى سنة كويسة

اضحك لدنيا تسخسخلك .. اه وربنا

اول ما عملت المدونة دى سمتها لحن الفرح

وشافت النور يوم 1 يناير 2009

سميتها كده لانى حبيت اكبس الدنيا واغيظها

واقولها مدمتى مش عايزانى افرح فانا

هاعمل لحن للفرح لنفسى

كنت بكتب ومحدش بيعلق ولا بيدخل عادى

كل الزيارات دى انا اللى زرتها لنفسى هههههههههههه

ولو كنت علقت عند حد كان بيجى يبص ومايعلقش

بس كنت بنبسط


قلت ع الاقل اسجل فيها كل اللى بيحصلى وليه ذكريات حلوة

اكيد هيجى يوم واتجوز وابقى اشارك جوزى ذكرياتى دى

حصلت حاجة مش هاقول عليها غير لما تكمل

ان شاء الله

بس عرفت انى مش هاحتفل بعيد ميلادها بس

لأ هاحتفل بيوم ميلاد تانى اكيد هيبقى عزيز عليا

وبما انى لقيتنى بكلم نفسى فسميتها مع نفسى

وكلى تفاءل ان اكيد حد هيعلقلى عليها فى يوم

وكلى تفاءل انها هتبقى مدونة بنت ناس فى يوم من الايام

يلا خيييييييييييييييير

اعتبرت ده انجاز فى حد ذاته حققته فى 2009

وهو انتصارى على همومى واحزانى

والنظرة التشاؤمية الغبية اللى كانت مسيطرة عليا

والحمد لله فعلا لما بتضحك للدنيا بتسخسخلك ههههههههههه