احساس مافيش .. :D

سالخير عليكم يا اهل بلوجر الكرام 

وحشتونى ووحشنى الرغى معاكم وحداكم 

بس هى الظروف اللعينة 

ومنها لله بقه اللى كانت السبب 

المهم من يومين كنت بتكلم مع اختى عن الناس

اللى صعبان عليها المخلوع واللى وراه 

فبتقولى انا نفسى اعرف صعبان عليهم ازاى ؟

طيب يعنى صعبان عليهم هو

ومش صعبان عليهم الاطفال

اللى ماتو بسبب نظامه وفساده

ده بس الاطفال  شوف كام شاب 

وكام ام وكام وكام وكام ..  

وقعدنا اتناقشنا واتكلمنا المهم اكتشفت ف الاخر انه 

انا الاحساس اللى من ناحيته بالنسبة لى احساس جديد 

لا هو احساس كره ولا حب 

ولا اعجاب ولا انتقاد

  

الاحساس بيه وبيهم هو احساس  " مافيش "  

احساس جديد انا اخترعته هو احنا

كلنا عارفينه بس بتعريف تانى اللى هو مش فارق معايا 

حقيقى والاحساس ده بردو نفس الاحساس اللى عند الناس

اللى غاوية تهاجم شباب الثورة والمعتصمين الى الان ف التحرير 

ان حد مايكونش فارق معاك ده شئ عادى لكن اللى مش عادى بجد

ان ازاى اصلا انت شايف واحد بيضحى بوقته وصحته 

اللى لايمكن لا يمكن حاجة ف الدنيا 

تعوضها ونايم ف عز البرد علشان انت تعيش كويس

وانت يبقى مش فارق معاك 

ده اللى لحد النهاردة مش قادرة اتخيله

مش قادرة اتصور الناس اللى شايفة احمد شفيق

ده حد محترم جدا

ايه يا جماعة هو انتوا خلاص مبقاش 

عندكم قدرة ع التمييز بقه كمان عقل مافيش 

وكمان تفكير مافيش كله كده مافيش 

دى حاجة بالعقل يعنى واحد مابيعرفش يتكلم كلمتين ع بعض 

كل كلامه سهوكة وقرف وفوق ده كله مستهتر ايون كون انه يستهتر بثورة شعب كامل 

يبقى مستهتر ومش مكانه الصح ده اللى اتحط فيه هو

كل اللى جاى عليه اصبروا علينا لحد امتى هنصبر وهنسكت 

عايزين يرجعونا تانى مخروصين ومانتكلمش ولا نقول لأ 

ارجوكم بجد كفاية بقه ظلم وكفاية بقه تقللوا من شباب 

اتصدمتوا انتوا فيه لما لقيتوه فاهم كل حاجة

وقادر انه يغير ويمسح الظلم باستيكة 

خلوا عندكم شوية رحمة وفهم وعقل 

وبطلوا بقه احساس مافيش اللى  قرفتونا بيه 30 سنة 

صحيح صدقت يا نجيب محفوظ حين قلت 

إن الثورات يدبّرها الدهاة وينفذها الشجعان ثم يكسبها الجبناء"

  ثرثرة فوق النيل