احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الأحد، مارس 20، 2011

يوم 19 مارس 2011

من عمايل ايد .... мαησηα بالظبط الساعة 6:07 م

البوست ده طويل جدااااااااااااا


سالخير عليكم

يوم جديد مصر فيه حرة مستقلة

اولا بعتذر ع انفعالى ف البوست اللى فات بس كنت مشحونة معنويا

المهم

انا روحت الاستفتاء واتمنى ان الكل يكون راح

ماكنتش مصدقة نفسى اصلا انى اخدت الموافقة وهاروح

وكنت هازعل اوى اوى لو ماكنتش روحت الحمد لله بقيت ايجابية فعلا وقولا الحمد لله

هاكى بقه ايه اللى حصل

تــــــردد .. نعم ام لأ

قبل ما اروح كنت مترددة جدا يمكن لانى مش قرأت كويس

 يمكن لانى زى زى كتير غيرى مش فاهمين كويس سياسة

انا بتوه ف الحوارات الجامدة دى وده جهل منى واعترف بذلك

لكن مابحبهاش للاسف السياسة دى انا وهى مش اصحاب

ولانى ماحاولتش افهمها قبل كده مش عارفة افهمها دلوقتى

اتكلم مع اختى اقتنع بـ لأ

اتكلم مع اصحابى ف منهم نعم وفى منهم لأ

لغبطة وتردد مالهموش حل

المهم دعيت بالليل قولت يارب اللى فيه الخي وجهنى ليه

صحيت قبل ما اروح الاستفتاء لقيت فاتيما عاملة البوست ومسمياه استفتى قلبك

فقررت انى لما اروح هناك اكيد ربنا وقلبى هيوجهونى للصح

صليت تانى ودعيت انى اهتدى للصح

اول ماوصلت ذهلت من كمية الميكروباصات

اللى محملة ستات منقبات كلهن دون استثناء تبع جماعة الاخوان

ذهلت من كمية الشباب اللى ماسكين الناس العاديين بقه اللى مش اخوان

بيعلموهم ازاى يتعاملوا مع البطاقة بانهم يعلموا ع العلامة الخضرا

ذهلت من كمية الرجالة اللى اعرفهم كويس ماهم جيراننا وامعارفنا كلهم

بس مش من سكا ن شارعنا استلمونى انا وماما من اول مادخلنا

وبيحاولوا يقنعونا اننا نحط نعم لخير هذه البلاد

ذهلت من كمية الشوكولاتات والبونبنونى والمناديل والعصاير

 اللى بتتوزع ع الاطفال والناس لانهم عارفين كويس اوى ان

الحاجات دى هتخلى الاهالى دول كلهم يقولوا نعم

وذهلت اكتر لما شوفت الراجل بتاع الجيش واقف جنبهم

عاااااااااااادى جدااااااا ولا كانه شايف حاجة

بلدنا دى من اكبر نقاط تمركز الاخوان ف الغربية كلها :(

لذلك ماذهلتش لما دخلت جوه واول ماقولت نا هاحط لأ

لقيت واحدة بس بتقولى حبيبتى تعالى اقفى جنبى انا بتعامل اسؤا

 معاملة من ساعة ماجيت لانى هاقول لأ

اخيرا لقيت حد فاهم مش حافظ

ودخلت جوه اتعملى تحقيق لانى شبهه اختى بالظبط وهى كانت عند الراجل من شوية

بغض النظر عن ام الصورة اللى ف البطاقة اللى مالهاش ملامح

وكمان انا من القاهرة انا وماما والعنوان ف البطاقة ع القاهرة فطبعا تحقق انتى ليه مش الغربية

والحوارات دى

المهم دخلت وصوت بـــ لأ وذهلت من زغرة الراجل الاخوان اللى كان بينظم الدخول للجنة

وزغرته كلها استحلاف انه اول ماهيشوفنى لوحدى ف مكان هيفتحلى سين وجيم ليه اخترت لأ

ومش بعيدة ينورنا بزيارة هههههه ف البيت



احـــــساس


لا يوصف ولا له مثيل وانا داخلة اللجنة وانا ف طريقى اصلا للجنة

ناس كتييييييير جداااااااا هما اينعم كله كانوا من جماعة واحدة

 بس مش مهم المهم ان كان فيه ناس تانية جوه من البلد

ستات كتير جدا اكتر من الرجالة واضح ان الكل ماضحاش باللحظة دى

انا عن نفسى كنت حاسة انى طايرة ع الارض انا حرة وبحط صوتى وعارفة انه مش هيتزور

انا حرة وبساهم ف وضع نظام جديد بلدى هتمشى عليه  نظام هيريحنى ويريح غيرى

نظام مش ف مصلحة حد او مجموعة واحدة من الناس

احساس بالفخر حقيقى بمصريتى


فــــــرحـــــــــة

شوفتها ف عيون كل الناس هناك الناس العادية والناس اللى ف جماعة الاخوان

فرحة الناس العادية باننا رايحين نشارك ف حاجة تخص بلدنا الفرحة دى فرحتنى

فرحة الاخوان كانت فرحة اللى صبر ونال :( ودى زعلتنى جدا ع فكرة


خــــــــوف

ع البلد وع اللى هيحصل فيها شوفت النظرة دى ف عيون كل الناس بردو

ناس راحت حطت نعم وهى خايفة ايه هيحصل لو الاخوان مسكوا البلد

ناس حطت لا وهى عارفة انهم مش الاغلبية وان نعم هى الاغلبية للاسف

ناس رفضت تقول لا لان  شغل جوزها وشغلها متوقف ع كلمة نعم

ناس خافت تقول لا لانها مش عايزة وجع دماغ وكلام بقه ف الشغل عن انها خاينة

ناس خافت تقول لا علشان مايتبصلهاش البصة اللى انا شوفتها لما قولت لا

ولا يتقال لها اللى انا سمعته

ناس خافت تقول لا لحسن تبقى كافرة ولا تبقى مسيحية زى

المسيحين وجيرانهم يتبروا منهم ويقاطعوهم



مـــــــؤلــــــــم

حال بلدنا لسه اللى ماتغيرش

حال الناس اللى لسه بتقول رأيها بناءً ع كمية الخدمات او المجاملات اللى هتكسبها

حال وعقول الناس اللى لسه مابيفكروش غير بس ف مصلحتهم

اللى شوفته جوه المدرسة وقبل دخول اللجنة حقيقى مؤلم :(


حــــــــــلــــــــــم

لسه بحلم باستفتاء نضيف

لسه بحلم بمصر نضيفة

مصر حرة مستقلة قلباً وقالباً 
 

اعتــــــــراض

ليه نعم كانت باللون الاخضر ملون ف البطاقة

ولأ بلون اسود مطفى ؟؟

ليه ماكنتش لأ بردو بلون احمر ملون ف البطاقة

ولا هى علشان مش هى الهدف كانت مطفية علشان اغلب الناس هيبصوا للالوان

لان اغلبهم مش متعلم ؟؟

ده من اهم الاسباب اللى خلتنى اقول لأ

لانى اتأكدت ان الحكاية دى فيها ان

ليه مافيش عدل ف الالوان ؟؟


" ماما .. ماما .. ماما .. انا مش عايزة اخد حقنة خديها انتى انا لأ "

دى صرخة بنوتة وسط الجمع الرهيب من الستات

بنوتة جميلة صغنونة لقت ان كل اللى بيدخل جوة بيخرج معلم صوباعه

زى التطعيم افتكرت انها هتاخد حقنة وهنعلم لها صبوعها

ع قد ماكل اللى حواليها ضحكوا منها سخرية

ع قد ما حزنت انا لسة احنا زى العيال الصغيرة علشان مانغشش بيعلمولنا صوباعنا

رغم اننا مش اطفال لكن نعامل معاملة الاطفال

وده بسبب ضماير البعض الفاسدة

ســـــــــــؤال

هو احنا امتى هنبقى مواطنين بالغين عاقلين بكل ماتحمله هذه الكلمات من معانى ؟؟

هو احنا امتى هيبقى عندنا ضمير ؟

هو احنا امتى هنفكر ف مـــــصــــــــــر .. كلنا نفكر ف مصر ؟

حد عنده جواب ؟؟

4 داقوا الشاى وقالولى رأيهم:

الشاعر الفنان أحمد فتحى فؤاد يقول...

صباح النور

علشان اللي قلتيه ده كان رأيي لا لا لا

و واحد زي اللي بص لك البصه دي لازم يتعلم هو و اللي زيه ان البلد اتغيرت و لازم ينعدم و ينعدموا في ميدان عام

مصر بقت اجمل و لازم نحافظ عليها و ما نقبل أبدا ترجع ورأ يوم واحد

تحياتي لك

لـــولا وزهـــراء يقول...

ناس خافت تقول لا علشان مايتبصلهاش البصة اللى انا شوفتها لما قولت
" انا كمان اتبصلي بصة وحشة قوي واحدة عقدت تغشش الناس وتقول قولوا نعم اوعى حد يقول لأ استفذتني ورحت زعقتلها قولتلها قولي الرأي اللي انتي ترتاحيلوا لكن متحجريش على عقلياتنا ولا حريتنا ... لما دخلت امين اللجنة اللي بيسلمني الورقة قاليي قتهولي ايه قولتله لأ قالي ماما موافقة تعرضيها!!! صرخت في وشة وقلتله انت هتغششني اقول ايه !!! اترعب وقالي بس بس انتي هتوديني في داهية ... الاخوان بيغششوا الناس وبيقولولهم المسلمين هيقولوا... والمسحيين من مصلحتهم ...
والكنيسة بتقول للمسحيين قولوا ....
لان المسلمين هيقولوا...
اتحولت العملية لاستفتاء طائفي مهماش عارفين ان سواء قالوا كدا او كدا الدستور هيتغير برضوا بس في حالة الاخوان ودنك منين يا جحا

لولا حزينة

мαησηα يقول...

الشاعر الفنان احمد فتحى ..

صباح الفل ..

اللى شوفته يا احمد مش مبشر خالص

لسه البلد زى ماهى حاجة بجد تزعل

الناس بجد مغييبين والاسؤ استغلال البعض للحكاية دى

نورتنى يا فندم

мαησηα يقول...

لولا الحزينة ..

زى منونا الحزينة جدااااا

للاسف حصل مع ماما كده يا لولا

واتلموا عليها لما بعدت عنها بس صرخت ف وشهم قالتلهم انا حـــــــــــــرة عجبنى ردها اوى

للاسف مش بيفكروا ف مصر وده اللى معلنى يا لولتى طيب نعمل ايه طيب ؟؟؟

 

ೋ واحــد شـاى ♨ Template by Ipietoon Blogger Template | Gift Idea