احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الخميس، يناير 14، 2010

انا بقيت كده ..

من عمايل ايد .... мαησηα بالظبط الساعة 1:06 ص



انا بقيت كده .. اللى هو ازاى يعنى اللى هو مش عايزة الناس 

مش عايزة اى حد 

وانا رايحة الشغل الصبح باخدها مشى 

من البيت لحد الشغل من ع الترعة كده وسط الزرع 

الطريق يخوف وخطر بس انا قلبى جامد بمشى 

من هناك علشان مش عايزة اشوف الناس 

مش عايزة اشوف كل طنطات اللى هما جيرانى 

مش عايزة اسلم عليهم رافضة الناس 

خالتو بتتصل مابردش عليها مش عايزة اكلمها 

عمو بيتصل مش برد عليه 

عمتو تتصل بردو مابردش 

خالو بردو مافيش فايدة

 ************

زمان لما جت سنة 2000 اتفقت انا واصحابى اننا لما تيجى سنة 2010 

نتقابل ونشوف وصلنا لاية 

اتصلوا بيا واتجمعوا وقعدوا يتحايلوا عليا

يابنتى تعالى ده يوم جمعة كلنا اجازة 

ونشوف بعض بقالنا  سنين مشفناش بعض 

مقضينها تليفونات ..  وانا ماليش نفس اروح 

يمكن اكون لانى الوحيدة اللى زى منا الجديد

عندى هو انى اشتغلت وده مش جديد اوى يعنى

هو مش ده السبب بس انا قلت لنفسى كده

  انما السبب انى مش عايزة اشوف الناس ولا اكلمهم 

====================

صاحبتى اللى بجد بموت فيها سافرت السعودية وقعدت سنة 

ورجعت مصر وسافرت تانى من غير ما اشوفها

ولا اروح اسلم عليها تتصل مابردش تبعتلى مسجات

انتى وحشانى ردى عليا حتى ماكلفتش نفسى

ارد عليها المسج اقولها انى كويسة ماتقلقيش

منتهى قلة الزوق بس مش عايزة اعمل كده مش عايزة اكلمها

===================

صاحبتى التانية اخر مازهقت اتصلت ع تليفون ماما تقولها منونا مالها 

مابتردش ليه ؟ 

عايزة اجيلها خليها ترد عليا تتفق معايا ع ميعاد ماردتش مش عايزاها تيجى 
  
بموت فيها وف اولادها وهما يكلمونى خالتو عازين نشوفك بس بجد مش عايزة اشوف حد 

=====================

صاحبتى التانية اما صدقت خطوبتها جت علشان ابقى معاها ف اللحظة دى 

مارحتش وزعلت وقالتلى هيبقى اخر يوم اعرفك فيه ورغم انها 

بجد بعتبرها اختى واكتر ماروحتش واعتذرت وهى سكتت بس ماسابتنيش

ولسه لحد اللحظة دى بتتصل ببص للتليفون 

وحتى ماكلفتش نفسى ابعتلها مسج

او اردلها الرنة 
 

================

كل يوم الصبح كنت لازم اصبح ع كل اصحابى برنة ع الموبايل

كل اصحابى حوالى 360 اسم لازم اصبح عليهم اصحابى وعيلتى

مابقتش بعمل كده مابقتش بلمس الموبايل حتى لو حد رن ببص وخلاص 

 ===============

فااتحة ايميلى بقالى اسبوع اونلاين ودى مش عادتى 

شايفة الناس داخلين خارجين واحشنى اوى نفسى اكلمهم 

مابكلمهمش مش عايزة اكلمهم وخلاص طيب ليه معرفش  


 ===================

شوية شوية بدأت اخسر كل الناس .. كله بدأ يفهم انى مش عايزاهم

مع انهم والله وبجد بحسد نفسى عليهم بيدادوا فيا زى العيال الصغيرة 

محدش ضايقنى محدش عملى حاجة اذتنى اوى يعنى للدرجة دى 

معرفش انا جرالى ايه حاسة انى استكفيت من الناس  

ليه بقه انا بقيت كده ؟؟ حد عنده تفسير للحالة دى ؟؟ 

لانى بجد بجد قرفت من نفسى وزهقت وعايزة حل للى انا فيه ده 

عاااااااااااااااااااااااااااااااااااااااااااااااااااااااااااااااااااااااا
   

   


 

17 داقوا الشاى وقالولى رأيهم:

Arsenal Way يقول...


بسم الله

إيه ده كله يا منونا

بصي بشكل عام واضح إنك سبتي نفسك لحد ما وصلتي للمرحله دي

و الله العظيم أنا مريت بالفتره دي في حياتي و إنتي دلوقتي في مفترق طرق .. يا إما تكملي وتخسري كل الناس

يا إما بهدوء ترجعي واحده واحده لكل اللي بتحبيهم

إتغلبي على مشاعرك السلبيه .. في ناس بتتمنى يبقى عندها ربع أصحابك .. مضيعش سعادتك بإيدك

الحياه متبقاش حياه من غير ناس نهمهم و يهمونا

أرجوكي .. بالله عليك خليكي إيجابيه و إتصلي بصحباتك و قابليهم و إحكيلهم و إبكي معاهم .. عايز أقولك كلام كتير بس مش عايز أطول عليكي ..

ربنا يسعدكـ يارب و يكتبلك الخير

قلم رصاص يقول...

هههههههههههههههههههههههههه

والله انا كرهت بنات الكوره الأرضية من كتر الاكتئاب اللي معيشينا فيه

ايه ده .. كل بنات المدونات مالهن اليومين دول .. كلهن بالاجماع شايلين الهم
حاجة تجنن ههههههههههههههههه

وبالنسبه لحالتك ياست منونا ..انتي بتدلعي اه والله بقولك كده .. حد طايل يبقى اصدقاء وناس تحبه بالشكل الجميل ده ويكون ده رد فعله..انا مش هلومك لأنك اكيد مش راضيه عن الحالة دي بدليل انك كتبتي البوست

بس والله الحياه عجيبه اوي فعلا .. الواحد يبقى خلاص متخيل ان كل شيئ انتهى من كتر الكأبه والقرف .. وفجأة تلاقيها اتحلت من فوق فووووووووووف فوووووووووووف اوي
من عند ربنا

بإذن الله خير

يلا سلامو عليكم

Ahmed Fayez يقول...


المثل بيقول الجنة من غير ناس ما تنداس
بس ممكن نحرّفه و نخليه الدنيا من غير ناس ما تنعاش.

على الرغم من كل حاجة إلا إن الإنسان هيظل نفس المخلوق الاجتماعي اللي مايقدرش يعيش لوحده.

كان فيه فيلم لتوم هانكس اسمه Cast away .. وقعت طيارته و بقى على جزيرة لوحده .. تخيلي موقفك ده ..
الوجود بين الناس و الصبر على أذاهم أفضل من اعتزالهم.

ماتقلقيش دي حالة و هتروح.

Aиgel يقول...

مساء الخير يا حبيبتي
منونة ووربنا وربنا أن في حاجات كنتي بتقوليها بالنيابة عني
بس طبعاً أنا بجد ميردنيش أشوفك كده خالص يا حبيبتي

بصي يا منونة يا قلبي الحالة دي والله بمر بيها للأسف

بس تعرفي لما قلتي عن صاحبتك اللي في السعودية حسيتك انك صاحبتي بجد
عشان اللي عملتيه ده هو اللي هي عملته معايا :(

ما علينا
بجد بجد طول ما في ناس بتحبك أوي تخسريهم حتى لو هتكلميهم وتقولي لهم انك تعبانة شويه نفساية ومش حابة تتكلمي دلوقتي لكن متقطعيش أزي كده معاهم عشان ميجيش اليوم الليتلاقي كل اللي حواليكي بعدوا عنك :(


وربنا يهدي لك نفسك ويريح قلبك ويسعدك دوماً وأبداً ويفك كرب ويحنن قلبك بقى ع اللي بيحبوكي ويبعد عنك الشيطان (: آمين يارب أنتي واللي في بالي D:

والنبي يا منونة خلي بالك من نفسك وعايزاكي تبقي كويسه دايماً يارب

أختك

Angel love

Mahmoud البطراوى يقول...

اسهل طريق للانتحار انك تستمرى كده

غير معرف يقول...

صلى على النبى وروقى ومافيش اى حاجه مستاهله ان الانسان يزعل علشانها

انا عارف لما بيكون الواحد مخنوق او مكتئب بيكون فى ىاصعب لحظات حياته وبيشوف الدنيا كلها سوداء

بس فى حاجات حلوه كتير

الصحاب اللى بيحبوكى اوعى تخسريهم علشان مش هيتعوضو تانى وخصوصآ لو بقالهم زمن وكمان لو حساه انهم مش بتوع مصلحتهم وبيحبوكى علشان نفسك مش علشان حاجه تانيه

خدى راحه يومين ولو تقدرى تأجزى من الشغل كمان وتريحى اعصابك وترجعى احسن من الاول ان شاء الله

وربنا يهديلك نفسك ويصبرك.

blue-wave يقول...

اللى انتى فيه اسمه حالة زهق عامه
حلها
تغيير المود
معرفة حد جديد
الذهاب الى مكان جديد
اى تغيير والسلام

P A S H A يقول...

๓คภ๏ภค

- صباح الفل

๓คภ๏ภค

- مساء الخير


๓คภ๏ภค

- صباح الفل
(ده يوم تاني خالص على فكرة )


๓คภ๏ภค

- مساء الخير
(نفس اليوم التاني بس بالليل)


๓คภ๏ภค

فهمتي حاجة ؟؟

ميت صبح .. وميت ليل .. هايعدوا عليكي وأنتِ كده .. لوحـــدك !!

مش هاتشوفي فيهم أي فرق !!

صبح .. ليل .. صبح .. ليل

حاجة كده عامله زي :

شهيق .. زفير .. شهيق .. زفير


مع إن كل صبح غير التاني .. وكل ليل مختلف .

بذمتك !! .. دي تبقى حيــاة ؟؟

روقي وسيبيها على الله .. وغن شاء الله تفرج وتحلو .. إن مع العسر يسرا .. إن مع العسر يسرا . صدق الله العظيم

:))


سلام

мαησηα يقول...

كل ما أقرأ كلامك اقعد اعيط

عارف انا كنت زى البلسم لاصحابى ومش غرور منى لكن بجد

عمرى ما اشتكيت لحد انا فيا ايه ؟

يمكن ده السبب انى قد طفحح الكيل من كتر همومى وهموم اللى حواليا خلاص فااااااااااااااض بيا ومابقتش قادرة اسمع اى حاجة من اى حد

ادعيلى بجد يارب تفتكرنى ف دعواتك وتدعيلى

мαησηα يقول...

ريسنا .. ههههههههه ضحكتنى بجد

كرهت البنات عااااااااا

انتوا ماتقدروش تعيشوا من غيرنا ده احنا

سكر الحياة والله

خلاص خلاص اهون بقيت انا والبنات كويسين علشان خاطرك بس ههههههه

ومعاك حق انا مش بس مش راضية عن نفسى انا مقروفة من نفسى جدااااااااااااا

ادعيلى يا ريس الله يكرمك

мαησηα يقول...

د.احمد .. والله العظيم عارفة انا انى ماقدرش اعيش من غيرهم

ومع ذلك مش قادرة معرفش مالى بجد

بس هى حالة وهتروح ادعيلى ربنا يكرمك

ادعيلى ربنا يصلحلى حالى

мαησηα يقول...

بونبونايتى الجميلة .. ربنا يخليكى ليا بجد

معلش سامحى صاحبتك دى يمكن كانت بتمر بنفس حالتنا دى

ربنا يتقبل منك دعائك ده وبجد ادعيلى ع طول انا نفسى ارجع زى ماكنت

мαησηα يقول...

بطوط .. انا فعلا بنتحر ادعيلى يا محمود

мαησηα يقول...

مستخلص باشا ههههههه شوف الرضا بقه

عليه افضل الصلاة والسلام

المشكلة انى مش زعلانة مافيش حاجة مزعلانى

بس انا فجاة بقيت كده

ياريت كان ينفع اخد اجازة من الشغل ياريت بجد لانى فعلا انا تعبانة

ايون ادعيلى ع طول ربنا يكرمك وينولك

اللى ف بالك

( شوف فايقالك انا ازاى ههههههههه )

мαησηα يقول...

د.عمرو .. فييييييييييينك يعنى لازم اعيط علشان نشوفك ههههههه

والله حساك بتتكلم صح

فعلا محتاجة اخرج وللاسف مش نافع اخرج

بس والله بقه هاعمل احتجاج وهاخرج لانى زهقت

ماتغيبش عننا ياباشا

мαησηα يقول...

شريف باشا .. ونعم بالله

معاك حق ده اللى حصل فعلا بس بردو ماهزنيش محسيتش انى بفقد حاجة غالية اوى

مع انهم والله كل حياتى

صدق الله العظيم وان شاء الله هيبقى مع العسر يسر باذن الله

мαησηα يقول...

انا بجد مكسوفة منكم اوى

انا اسفة انى انتوامش ذنبكوا تشيلوا همى كده

وطولت انا السنة دى ف موضوع الخنقة ده بين كل بوست وبوست خنقة

بس بجد غصب عنى وميرسى بجد بجد ليكوا ولوقفتكم جنبى

ادعولى بجد انا محتاجة دعائكم

انا مابقتش اقرأ قران ولا اصلى الفجر

وحاسة ان ده السبب انى بعاقب نفسى وهو ده اللى جابلى اكتئاب

ادعولى ربنا يهدينى

ويارب عمرى ابدا ما اشوف حد ف الحالة اللى انا فيها دى يارب اللهم امييييييييين

 

ೋ واحــد شـاى ♨ Template by Ipietoon Blogger Template | Gift Idea