احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الجمعة، ديسمبر 25، 2009

سالخييييييييير ..

من عمايل ايد .... мαησηα بالظبط الساعة 11:17 م

سالخيييييييييير عليكوا جميعاااااا 

يارب تكونوا بخييير 

انا جييييت وجايبة معايا التاج اللى كان جايلى من انجل " احلى بونبوناية

عايزة اقولكم انى بحب اوى التاجات دى 

والتاج ده هيبقى ليه معزة ومكانة ف قلبى

اول تاج شبه الحب الاول كده هههههههههههههه

ميرسى يا احلى انجل ع التاج الجميل ده 

واليكم اجابات التاج


س1: أنتِ مين بقى؟
 
منونا .. وبس 

س2: هل أنتِ متزوجة ؟ وهل عندكِ أولاد؟
 
من بؤك لباب السما يا خويا .. ويرزقنى بالذرية الصالحة كده ان شاء الله
ماتفكرنيش لسه مادخلتش دونيا 

س3: ماذا تفعلين بوقت فراغك ؟
 
والله هو مبقاش فيه وقت فراغ .. لكن ف حالة حدوث ذلك وانه
 لانادر الحدوث بقيت بنام بصراحة لانى بحب النوم والنوم بيحبنى
واقرأ لو كنت مصحصحة كده وفايقة 

س4: هل لديكِ هوايات؟ وهل تمارسينها ؟
 
كان عندى هواية الرسم وبطلتها مابقاش ليا خلق
لكن لسة محتفظة بهواية القرأة بحب القراة جدااااااا


س5: هل تحبي؟ومن بقلبك الآن؟
 
احم .. ليه الاحراج ده
ايون بحب .. اللى بقلبى حبيبى هع
وهو مش الشاب الحليوه اللى شاب فقرى قال عليه ده على فكرة هههههه 

س6: لو لم تجدي من تحبي فماذا ستفعلين ؟
 
هاعمل ايه يعنى كنت قاعدة مستنياه
وكل ماتعجبنى صفة ف حد كنت بدعى ربنا انها تبقى فيه
والحمد لله ربنا كرمنى ورزقنى


س7: عندما تكونين في موقف اتخاذ القرار..تخالفين الجماعة.. أم تشركين معك الآخرين ؟
 
يعنى قصدك انى ممكن اخد قرار وخلاص عكس الجماعة لمجرد انى اخالفهم
لأ طبعا .. باخد القرار الصح سواء معاهم او مخالف ليهم 

س8: هل تتعاملين بواقعيه؟
 
هو انا خيالية اه .. بس بحب اوى خيالى
ده احققه وبحاول ع قد ما اقدر احققه
مدام هو ينفع يتحقق وهيبقى واقع جميل ليه لأ

س9: ما هو الشيء الذي فعلته وندمت عليه طول عمرك ؟
 
مابتعلمش وبادى الامان للناس لانى بحبهم يعنى
مثلا اديت امان لكتير اوى من اصحابى والحمد لله
اتقابل الامان ده بالخيانة والكدب وبجد مش نافع بقه خلاص أأمن لحد 

س10: هل تصارحين غيرك بالحقيقة ؟ أم تقولين له ما يريد سماعه؟
 
انا بحدف طوب سيادتك ههههههه بس
بقيت احاول اهون واخفف من الكلمة قبل ما تطلع
وساعات لما ممكن احس ان راى بصراحة هيتسبب
ف الم ومش هيفيد مابقولوش او بتوه ههههههه
لحد مالاقى الحاية هديت اطس بقه ههههههههه 

س11: صفِ إنسان يمكن أن تحبيه عمرك كله ؟
 
هادئ ,طيب, صبوووووووور ,متسامح ,كريم ,حونين ,ذكى
,شيك ,دمه خفيف ,متفائل ,طموح ,قوى الارادة, صريح
سريع البديهة, اروب ,اجتماعى,
 ودماغه تاكل دماغى اصل انا مش سهل حد ياكل دماغى
بيحب الشوكولاته
بيحب الكمبيوتر وبيحب القراءة
يجيد التعامل مع انثى برج السرطان ويستحملها ويستحمل جنانها
يشارك ف الاساس ويقدس الحياة الزوجية ههههههههههههههههه
قبل ده كله طبعا يكون حد حاطط ربنا ف الاول وبعدين الناس


س12: متى يقسو قلبك ؟
 
لما بزعل .. يعنى لو زعلت من حد بتبقى سنته جاااااااااز اى والنعمة
مش بنسى اللى زعلنى منه ومش بعرف اسامح بسرعة 

س13: هل يمكن أن تحبي أحد من المدونين؟
 
ليه لأ كلهم اللى اعرفهم يعنى  صراحة 
شخصياتهم بتعجبنى ودماغهم تعجبنى جدااااا 

س14: وهل يمكن أن يكون شريك حياتك؟
 
كل حاجة قسمة ونصيب لعل وعسى يكون سبب
دخولى التدوين هو جوازى من احدهم
بس ربنا يكون ف عونه بصراحة لانه اكيد زعل الست
الحاجة ف يوم ماطلعتلوش شمس ههههه


س15: ماذا تعنى لكِ المرأة أو الرجل؟
 
ايه الاسئلة الجامدة دى
احم .. احم ..
المراة هى لؤلؤة يابخت اللى يقدر يحتويها ويفهمها
الرجل .. دائما الطفل المدلل لامه وبعدها زوجته 

س16: في زمن البحث عن المادة ..عن ماذا تبحثِ أنتِ ؟
 
الامان وراحة البال والهدؤ النفسى 

س17: متى تعرفي أنكِ تحبي ؟

لما لقيتنى بقيت مروضة ههههههه
فجاة بقيت كده حد تقدر تتعامل معاه هههههههه



 .س18: ما هي الشخصية التي أثرت بحياتك ؟
 
حد كشخص اعرفه شخصيا جدو الله يرحمه ويغفر له
لو كشخصية من المشهورين ف سيدنا عمر بن الخطاب
و د. احمد خالد توفيق او تحديدا دكتور رفعت اسماعيل اه وربنا هههههههه 

س19: هل يوجد من ترينه سعيدا في الدنيا ولماذا ؟
 
لا مافيش حد سعيد .. هاقولك ليه كل واحد مننا 
اكيد ناقصه حاجة ممكن يلاقيها عند غيره
فيفتكر ان غيره ده سعيد فى حين ان غيره 
هو كمان ناقصه حاجة شايفها ف غيره تانى وهكذا
الانسان خلق كده مابيشبعش ولا بيرضى
والسعادة بمنتهى البساطة هى الرضا


س20: ما هي درجة صراحتك ؟
 
صريحة بنسبة 95%  وللاسف احيانا بجرح الناس بصراحتى 

س21: وما هي المواقف التي يمكن أن تكذبي فيها ؟
 
لما اخاف من شخص .. ولو كنت بكدبتى دى هامنع حدوث مشكلة
اقولكم ع سر زمان انا كنت بكدب وكنت بتفقس 
ف لحظتها بس كان مزاج عندى اكدب ههههههه
دلوقتى كبرت بقه وبطلت اكدب الحمد لله لو حسيت بخوف
او خوفت اعمل مشكلة ببعد عن الموقف والبنى ادم
كل المسببات اللى ممكن تخلينى اكدب 

س22: هل يتغير الحب بعد الزواج؟
 
اه بيتغير زيه زى اى حاجة قبل وبعد
بيبقى احلى قبل الجواز واقوى بعد الجواز
حتى لو زادت المشاكل فهى بتزيد لانه الحب كبر وزاد
نظرية غريبة ماعلينا اعتبروها نظرية منونا
زى نظرية اى حد يعنى من المشاهير دول ههههههههه


س23: فيما تفكري الآن ؟

مستقبلى 

س24: لو لم تعيشي بمدينتك؟ فأي مدينة أخرى تفضليها ؟
 
انهى مدينة فيهم .. بص انا اتولدت ف حتة وطفولتى ف حتة وشبابى ف حتة
غربة طول الوقت عايشة ف غربة
نفسى حقيقى اعيش ف دبى والله من زمان اوى وانا نفسى اعيش هناك

س25: أول من يأتي ببالك لتحكي له أسرارك ؟
 
اختى 

س26: من هو ألد أعدائك ؟
 
الخيانة والكدب 

س27: من هو صديقك ؟
 
ناس كتير محدش بعينه

س28: لو ربنا خلق الدنيا كلها زيك .. لمن تقولِ هذه العبارة ؟
 
مامتى انها امراة رائعة رائعة بدون نقاش .

س29: ماذا تكرهِ في الحياة ؟
 
الاستسلام والضعف والطمع والخبث والاستغلاااااااال 

س30: و ماذا تحبِ فيها ؟
 
الخبرة اللى بتديهالى من التجارب اللى بتعرضلها فيها

س31: كيف تواجهي ما يضايقك وماذا تفعلِ عند المفاجآت ؟
 
لو متضايقة بكتئب وبتعب بجد نفسيا جداااااا ..
بس شوية ايام كده بالمساندة والتشجيع بلاقينى بقيت كويس
والله شكيت ف نفسى انى ممكن اكون مريضة نفسيا
مثلا وعايزة الناس تهتم بيا هههههه اه والله
بس فعلا كلام الناس بيفرق ف معنوياتى اوى
لو مفاجاة مطينة بطين بعيط هههههه لو مفاجاة حلوة بظأطط


س32: لو معكِ فلوس أكثر مما تتخيلِ ... فماذا ستفعلين بها ؟
 
هاجيب كل اللى نفسى فيه وبعدين اعمل مشروع كبير جدااااااا 
يجمع جميع التخصصات اللى الناس بتشتغلها
وبعدين اقوم جايبة كل المصريين اللى متغربين بره مصر ف شغل 
والشباب اللى هنا اللى مش عارف يعمل حاجة ف ام البلد دى
واشغلهم معايا واخلى كل واحد بشغله يحقق اللى عايش يحلم بيه
ربنا يرزقنى بس وانا مش هنساكم هابقى اجيبلكم شوكولاته ههههههههههه 

س33: هل الفقر يصنع حباً ؟
 
قصدك ان الفقر ممكن يخلى الواحد مايحبش .. ع فكرة لا فقر ولا غنى ليهم علاقة بكده
الحب هو اللى بيخلينا اغنياء وهو بردو اللى ممكن يخلينا فقراء زى ما احنا
الحب يتحدى الظروف .. والفقر ظرف والغنى بردو ظرف 

س34: ماذا لو وجد الحب في زمن الفقر المادي؟
 
زى ماقلت قبل كده الحب بيتحدى الظروف هيتحدى
الفقر المادى لو انت جواك ارادة بانك تغلبه
لكن لو ضعيف بقه انت مش هتنجح ف التحدى وهتخلى الفقر يغلبك


س35: ما هي أقسى صدمه تعرضتِ لها حتى وقتنا هذا ؟
 
اتسرقت من اعز صديقة عندى .. اتصدمت لانى كنت طول الوقت مدياها امان
مالوش حل وعمرى ماتوقعت ان دى تحديدا تعمل فيا كده
وياريتها سرقت حاجة ليها قيمة 

س36: هل تعلمتِ منها شيء ؟
 
ايون مابسيبش شنطتى ولا موبايلى هههههههه
قصدى مابقتش ادى امان لحد ولا مخلوق
خلاص قفلنا ماسورة الامان ههههههه 

س37: هل أنت على استعداد لتلقى صدمات أخرى ؟

ايوووووووووووون .. وقدها وقدود لا احنا جامدين اوووووى ههههههه 

س38: كيف ترد على من لا تصدقه ؟
 
ههههههههه بتنح ولو بجد بقه خلاص الموضوع طول اوى 
وبقه لوك لوك بقول انت كداب انا مش مصدقاك  

س39: إذا أحببت إنسان ما ...هل تصرح له بحبك ؟
 
ايوووووووووووون .

س40: ماذا تفعل لو لم يتجاوب معك ؟
 
مايقدرش هههههههههههههههه
بصراحة معرفش بس انا اصلى اروبة انا ماقولتش 
الا لما لقيت انى مش هتقابل ب لأ او والله طيب شكرا
اصلى انا بعز منونا اوى فبحبهاش تتكسف يعنى بكنت متاكدة اوى يعنى


س41: هل تؤمن بالمثل القائل: أنا أحب فأنا أعيش ؟
 
اها يس .. ليه بقه لان احنا فعلا لو مش حابين الحياة 
ماكناش فعلا صحينا الصبح م النوم
عارفين حتى لو مش بنحب احنا بندور ع الحب فبنعيش ع الحب 

س42: ما هي القضايا التي تشغل بالك ؟
 
بجد بجد بلدنا عارفين حاساها زى ماتكون سجادة جميلة اوى وغالية جداااااا
بس موجدة ف بيت ناس مش منظمين ومش نضاف
عايزة اخدها عندى انفضها من الوساخة وانظمها بقه
بلدنا عايزة تنضف وبعدين تتنظم صح 

س43: هل تستطيع تحقيق كل أحلامك ؟
 
ايون .. انا طموجة جداااااا واملى ف ربنا كبير
ونفسى  طوييييييييل اوى وصبورة
هاحققهم لو مش كلهم يبقى عالاقل هاحقق حلم واحد منهم
وهحاول ف الباقى وشرف المحاولة يكفينى 

س44: ماذا ترى في نفسك مميزا عن الآخرين ؟
 
بجد ومش غرور والله العظيم .. انا حد دايما مميز ف اى مكان او تجمع بروحه
مع انى مش بتكلم الا اذا اتطلب منى كده
بس دايما كده محطوطة ف خانة المتميزين بايه بقه انا معرفش
بس  لازم اسيب علامة ف بيتك هههههههه قصدى ف دماغ اى حد


س45: من إذا اقترب منك ...هربت منه بعيدا ؟
 
عموما مابحبش حب الامتلاك 
سواء حب اصحاب او حب حبيب وزوج
انا حرة مش علشان بتحبنى تخنقنى مادمت
مابعملش حاجة تغضب ربى ولا تهينك
يبقى ماتخنقنيش ف اصحاب بيخنقوك بالمطاردة 
هههه اه وربناانا ناس كتير بتطاردنى
وساعتها بقفل ودماغى بتبقى دزمة قديمة
وممكن اخسرهم مافيش اى مانع بس ما اخسرش حريتى 

س46: من تقول له : قرب منى قرب ...يا قلبي يا متغرب ؟
 
ماى لف 

س47: إهداء التاج لمن ؟

د.عمرو فاروق( ابو منى )

ههههههه  مدونة شوية احسايس

سويتى مدونة سويت فولييت

كيارامولان

منامينو

رومانسى

الرحالة د. احمد ضياء الدين

حاتم جامع الفراشات

وسلام بقه يارب ما اكونش ازعجتكم

 

9 داقوا الشاى وقالولى رأيهم:

Cute Kitty **sookra يقول...

اولا
مساكى شيكولاته بيضا
ثانيا حرام عليكى تهدينى التاج دا
انا لسه مجاوباه الاسبوع اللى فات
الست انجل بهدتهولى برده
بس ايه وحياتك جاوبته كله بهزار وماعرفوا يدبسونى فى اجابات جد
ههههههههههههههههههههه
ثانيا اجاباتك كلها انا عارفاها ياختى
هه
انا اعرف منونه وعارفه طبعا انها لو اتخنقت منى موش هتقدر تهرب منى ابدا
هههههههههههههههه
وحشانى اجاباتك كلها زى شخصيتك اوى
بت اسكتى موش عارفه اقولك ايه
بس هاقولك هاتى بوسه
ههههههههههههه

Tamer Moghazy يقول...

بصي يا منونا..
انت مش صريحة 95%..
نووووو...ده انت صريحة 9000%..
وده اكتر من النسبة القانونية المسموح بيها (';')
وبعدين خدي بالك ان الحياة بتحتاج اكتر من الـ 5% اللي هي مش صراحة عشان نقدر نتعامل في الحياه.

VÖltaa يقول...

ايه الحلاوة دى

:)

blue-wave يقول...

يا نهارك ابيض:))
انا عمال اقرا وانا مشفق عليكى من طول التاج
الاقى نفسى اول واحد لازم يجاوب عليه؟:)
كدا برضه:))
مااااااااااااااشى مردودالك قرييييييييييب

мαησηα يقول...

مساكى ورد وفل يا سكرتى

اها تم حذفك من التدبيسة ههههههههههه

هاتى بوسة يا قمر

мαησηα يقول...

تيمووو ... هحاول اكون مش صريحة

ولو انى مابقدرش وبتعب تير بسبب

الموضوع ده لكن اهون لسه عايشة

мαησηα يقول...

محمد .. ميرسى تسلم

мαησηα يقول...

ابو منى هههههههههه

ايون ايون اتدبس يلا هههههه

منور وفينك كنت مختفى كده

Tamer Moghazy يقول...

لازم تحاولي تبقى مش صريحة يا منونا لان التعامل بالصراحة الكاملة مع ناس ما سمعتش عنها بيخلينا نفقد كتير وبينتهي الموضوع بعقدة تحتاج لمتخصص (اللي هو انا) (وش خبيث)
(';')

 

ೋ واحــد شـاى ♨ Template by Ipietoon Blogger Template | Gift Idea