انا بصلى ..

ريتاج وريناد بنوتين تؤام بس زى السكر

لمضين ومش بيخافوا من

حاجة وصغنين فى السن تقريبا عندهم سنتين ونص

باباهم ظابط ومطلعه لمضين جدا وجريئين اوى

وبما انى بحب اللماضة واى شيئ يمت للماضة

بصلة من قريب او بعيد

لما بيكونوا موجودين باقعد اتلامض معاهم واعاكسهم

وصاحبتنا سماء بقه الغيرة بتاكل فيها

علشان تكسب صداقته وتقدر تفتح معاهم حوار

زيهم زى كل الجنس اللطيف لازم تمدح فى جمالهم

وياريت لو تقولهم الله المانكير ده جميل اوى مين حطهولى

تلاقى ابتسامة رائعة نورت وشوشهم وتفردلك صوابعها وتقولك

آنا سونة هى اللى حطتهولى تقولها طيب انا عايز احط تقولك

لأ خليك كده ايديك وحشة

الاخت سماء سمعت الحوار لقيتها مسكت ايد ريتاج

وبتقولها ورينى كده

امممممممممم وايه يعنى منا عندى زيه واحلى منه بردو

وبتهز دماغها زى ماكنا بنعمل زمان واحنا صغيرين

انا طبعا ماتوقعتش اللى بيحصل ببصلها باستغراب

وعجبنى بصراحة انى اغيظها اكتر

فقلتلها طيب مابتحطيش ليه يا اختى

قالتلى اصل انا بصلى

مقدرتش اعمل حاجة غير انى اخدها فى حضنى

وابوسها واقولها ربنا يبارك فيكى ويحميكى ويحفظك يارب

كل يوم بتخلينى احبها اكتر من اليوم اللى قبله

واتمنى ان بنتى تكون زيها

ادعولى ان ربنا يرزقنى ببنوتة زى سماء بالظبط