احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

السبت، فبراير 05، 2011

كفـــــــاية بقى ...

من عمايل ايد .... мαησηα بالظبط الساعة 9:31 م






اتخيل منظرك الان وانت جالس تضع قدمك اليمنى ع اليسرى وتقول لجمال 
" انت السبب يا كلب يا ابن الكلب مكنا بنسرق ف الخفا محدش حاسسس بينا 
انت واصحابك البايظين ادى اخرة اللى يمشى ورا العيال "


كمان اتخيل منظرك وانت فرحان وسعيد بما يردده الببغاوات الذين يملؤن 
مصر للاسف ويرددون خلف اتباعك مايلى من كلمات :
  •  الاجندات الخارجية
  • الرئيس كرامته من كرامتنا
  • الزعيم انه زعيم امة
  • استقرار مصر وامنها هيضيع لو تنحى الرئيس
  • انتوا مش فاهمين حاجة الدستور ماينفعش يتغير الا بعد ما الرئيس يمشى
  • ده ابوكم هترضوا يتعمل ف ابوكم كده

كمان
 
اتخيل منظرك وانت تعلم مايقوم به اتباعك ودلاديلك 
بمنتهى الهبل وقلة احترام او حتى تأثر باللى حصل للناس
وانت بتقرا كومينت لواحدة بتقول يااااااااااى كارفور اتحرق
ولا السوبرماركت اللى جنبنا سرقوه
ولا الابشع اللى بتقول ميدان التحرير باظ هانزل اتمشى انا ازاى دلوقتى

واتخيل منظرك وانت بمنتهى العند وقلة الضمير شايف  ماتزعم انهم ابنائك بيتسحلوا وبيتجروا ع الارض
وانت شايف من هرست رأسه المدمرات ومن مات بحجر
وكانه من بنى صهيون
وانت تتشفى وتقول الكلاب علشان يبقوا يتعلموا الادب

اتخيل منظرك وانت بلا رحمة ترى اطفال السرطان لا يكملون علاجهم بسبب قلة الاعدادت ويتوالوا موتا الواحد تلو الاخر 
وف نفس الوقت سيادتك او من يتبعونك 
او من خولت لهم اتباع سياسة اشغلوا الشباب بيتفاوضوا 
مع مدرب اجنبى بالمليارات او من ينظموا 
المهرجانات السينيمائية انا لست ضد الترفيهة 
ولكن انا ضد التدمير الغير مباشر للافكار والعقول
والابشع اليوم ان اكتشف ان ثروة سيادتك لا تقل عن 70 مليار دولار 

 اتخيل منظرك وكلابك يصيحون باعلى اصواتهم انه صاحب
نصر اكتوبر انه صاحب الضربة الجوية 
سيادتك النصر كان لان الكل تعامل بحكمة وعقل وبتخطيط مش بضربتك الجوية
حينها اتساءل وماذا اذن كان يفعل خالى الشهيد ف الصاعقة حين استشهد اثناء الضربة الجوية المنسوبة اليك وغيره من الشهداء ف جميع قطاعات الجيش

سيادة الرئيس الم يحن ان نتخلى قليلا عن الانانية ونراعى
هذا البلد الحبيب الذى تزعم انك افنيت عمرك فداء له 

سيادة الرئيس الم يحن قلبك ولو لحظة حين رأيت صور
الغارقين فى العبارة فى وسط المحيط 

سيادة الرئيس الم تجرب نار  خطفة الموت حين اختطف
حفيدك من بين احضانك 
لماذا اذن لم تقم بواجبك كمسؤل عن هذا الوطن وراعى له 
وعاقبت من تسببوا ف حرق قلب ام خطف ابنها من بين احضانها 
 ( خالد سعيد وغيره كثيرون  ) ولا ساعتها كان كلب وراح ؟؟

الم ترى اطفالنا وقد ملئت المستشفيات بهم مرضى امراض
لم نكن نتخيل مجرد خيال ان يمرض بها من هم قد شبعوا من الدنيا 

الم ترى بعينك كم من اطفال تيتموا بسبب موت عائلهم
بمرض الفشل الكلوى وفيروس سى والكبد الوبائى بسبب تلوث مياة الشرب

الم تدمع عينك ولم يفطر قلبك على الشاب الذى مثل بجثته
ف لبنان واخيرا بعد مرور عام تظهر برائته اى قتل ظلم 

باى حق تطلب منا ان نرحمك وانت لم ترحمنا يوما 
ما خلال رحلة من العذاب والذل والاهانة 

باى حق تطلب منا ان نعزلك بكرامة وانت لم تحفظ لنا كرامتنا يوما ما 

باى حق يطلب اتباعك ان تخرج معزز مكرم وبشرف من فعلا افنوا اعمارهم ف خدمة بلادهم 

باى حق تطلب منا الانسحاب والخنوع والتراجع عما بداناه من ثورة غضب انت السبب الاول فيها 

سيدى الرئيس الم تسمع قديما ان كثرة الضغط تولد الانفجار 

ضغطتنا 30 عاما فانفجرنا ولن تستطيع تحمل تبعات 
هذا الانفجار ولن تستطيع ايقافه ايضا 

هل تتخيل انت منظرنا حين ترحل عنا 

هل تتخيل مقدار فرحتنا بانتصارنا على الذل والعبودية
اللى واخدين شكل شيك شوية عن شكلهم زمان 

هل تتخيل مقدار فرحة كل ام مكلومة بنار ابنها
اللى خطفوا من بين ايديها احد اسبابك 

ارجوك انت بقه كفاية لحد كده كفاية عند وانانية 
 كفاية نهب ف اموالنا تحت بند انجازاتك

كفاية بقى ارحم من ف الارض يرحمك
من فى السماء ويمكن تلاقى حد يرحمك فى مصر

سيادة الرئيس فاقد الشئ لا يعطيه 

لم ترحمنا يوما فلن نرحمك 

لم تكرمنا وتعزنا فلن نكرمك ونعزك 

واخيرا هنيئا لك انجازاتك وانتصاراتك 

وهنئيا لنا الخلا ص منك 


مواطنة مصرية حرة لا ترضى الظلم ، الذل والهوان

منى درويش


14 داقوا الشاى وقالولى رأيهم:

Unknown يقول...

ربنا يعزك يابنتي
انتى و سارة بتقولوا كل اللى عايزة اقوله

الواحد بيقابل ناس ترفع الضغط
ربنا يهدينا و يهديهم

Tears يقول...

رائع اللى كاتباه ده

ربنا يحميكي ...مصر بخير طول ما فيها ناس عقلها حلو كده

мαησηα يقول...

بوبا ..

صباحك كرامة وعزة وامل ف بكرة احلى ان شاء الله

ماهو احنا حبيبتى وغيرنا مصريين بجد فكل كلمة طالعة من قلب كل مصرى بتحسيها بجد

وان كنت انا غير لبقة زى سارة ولا كمان متمكنة زيها

يارب اللهم امين

мαησηα يقول...

تيرز ..

ان شاء الله يارب دايما تكونى تبقى دموعك فرح يارب اللهم امين

وبخير طول ما فيها زيك يا حبيبتى

الله عليكى انتى كمان بجد الله يباركلك

الشاعر الفنان أحمد فتحى فؤاد يقول...

مصر فوق الجميع

رغم أني أبدا لا أويد السباب أبدا في اي لغة للحوار
لكن عارف كمان ان الضغط فعلا يولد الانفجار

ربنا يحمي مصر و يحفظها من كل شر

تحياتي

همس الاحباب يقول...

ايد ده كله
ده انت قلبك كروهات يا معلم
وشايل كتير ومتحمل من الظلم والقهر
هههههههه
لكل ظالم نهاية
ربنا يحفظ مصر من كل سوء
تحياتى

سَارةٌ يقول...

منــونْ ..
مقـدرش غير إني أوافقك فـ كل كلآمك ..
عجبتني أوي .. تخيـلآتك .. :)

يـآرب مصـر تبقى بخير فعلاً .. :)

мαησηα يقول...

استاذ احمد ..

لا انا ماشتمتوش انا هنا عاملة مؤدبة وربنا

دى تخيلات ليا عادى يعنى وبعدين لفظة ابن كلب لا تعد شتيمة دى طقوس اى بيت مصرى لازم تلاقيها فيه :)

يارب اللهم امين يحميها غالية حرة مستقرة

мαησηα يقول...

همس الاحباب ..

خالد الغالى

هههههههههه اه وربنا بص كله بيطلع وينصب عليه هو اللى جاه لنفسه ههههه
يارب تبقى النهاية قريب يارب

мαησηα يقول...

بندوله حبيبتى

وحشتينى جدااااا

انتى سكرة ودايما بتشجعينى كده يا قمر

هتبقى حبيبتى باذن الله هتبقى بخير وزى الفل طول مافيها شباب زى الورد بيضحى علشانها

لــــ زهــــــراء ــــولا يقول...

ازيك يا منمن ... اسفة اني طلعت من البغبغاوات اللي مش بتحبيهم وبردد نفس كلام البغبغاوات دول

لولا ياقمر

мαησηα يقول...

لولا ..
اقسم بالله ماقصدت حد من اصدقائ سواء هنا او على الفيسببوك رغم كثرتهم

ككان قصدى ع الاعلاميين الكبار والفنانين الكبار وغيرهم من الناس اللى المفترض انها فاهمة سياسة

واذا كنتى زعلتى ياستى فا انا بعتذرلك

وتأكدى ان اختلاف الرأى بالنسبة لى لا يفسد للود ابدا بيننا قضية

لــــ زهــــــراء ــــولا يقول...

мαησηα يقول...
لولا ..
اقسم بالله ماقصدت حد من اصدقائ سواء هنا او على الفيسببوك رغم كثرتهم

ككان قصدى ع الاعلاميين الكبار والفنانين الكبار وغيرهم من الناس اللى المفترض انها فاهمة سياسة

واذا كنتى زعلتى ياستى فا انا بعتذرلك

وتأكدى ان اختلاف الرأى بالنسبة لى لا يفسد للود ابدا بيننا قضية

"اولاً انا ارفض اعتذارك ليا مافيش اصلاً داعي انك تعتذري ابداااا ... هكرر كلامي تاني كلنا صوب هدف واحد واكتر من وسيلة لتحقيقة وسيلتي في تحقيق الهدف ليس تنحي مبارك اهم حاجة عندي مصر وامانها انا خايفة من غزو غربي مرعووووبة جدا يا منمن ربنا يستر بقى..ز واكرر واقولك انت اخت غالية وغير مسموح انك تعتذري لحسن اجي اعضك :d"
لولا

мαησηα يقول...

ههههههههههههه خلاص يا لولا

خلاص مصدقاكى يا سكر

 

ೋ واحــد شـاى ♨ Template by Ipietoon Blogger Template | Gift Idea