احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الاثنين، فبراير 07، 2011

اسباب الثورة ..

من عمايل ايد .... мαησηα بالظبط الساعة 9:15 م


درسنا النهاردة يا اولاد عن ثورة  25 يناير 2011

التعريف بالثورة : 

فى يوم اسود ماطلعتلوش شمس مصر اتحسدت  من ذووى العيون الصفرا المدورة
والعين يا حبة قلبى جت ف الزعيم محمد حسنى مبارك
وده لانه ماسمعش كلام مفتى الجمهورية وماكنش  بيخلى سوزى ترقية كل يوم 
اصله زعيم همام شايل البلد على قلبه مابينامش الليل ولا لاقى ياكل يا كبدى 
فداء للوطن مصر الغالية .وياما قالوله ياريس هتتحسد والله يقولهم بلا حسد بلا كلام فاضى.
جت نفس كده بينه وبين الـــ 83 مليون نسمة وقتها كانت مصر صغيرة يا ولاد .

الاسباب الحقيقية للثورة :
  1. اصدقاء السوق ( السوء ) اللى بنحذركم منهم ليل ونهار اللى اتلموا على جمال ابن الزعيم وبوظوا اخلاقه يا كبد امه .
  2. الحرية والديموقراطية اللى الشعب المصرى كان واخدها  آنذاك واثبتت فشلها كنظام تبنى عليه الدول مصائرها.
  3.  وباء اسمه الاجندات الخارجية اجتاح مصر ف هذا الوقت .
  4. الاحزاب السياسية اللى ماكنش فيهم نفر يعرف حاجة عن الثورة اساسا واستهبلوا وعملوا انهم هما اللى منظمينها.
  5. الانترنت العدو اللدود الخفى الشيطان  الذى غزا بيوت مصر بيت بيت .
  6. خيرى رمضان المذيع الرائع وانجازاته من خلال برنامج كانوا يذيعوه زمان اسمه مصر النهاردة .
  7. مرتضى منصور اللى كان بيدعو للثورة دى وكتب كتابين الله يباركله من 8 سنين واخيرا الناس سمعت لكلامه .
  8. محمد صبحى وده فنان كان قدير عمل يوميات ونيس ودى بقه اللى فجرت الثورة بجد .
     ولسه جارى اكتشاف الاسباب الحقيقة لما تكمل هابقى اعمل ابديت للاسباب دى 

    نيجى بقه للاسباب الظاهرية :
    1.  شباب اثبتوا ان مش كل الرجاله ماتت وخلصت فى حرب اكتوبر .
    2.  شباب عندهم ميزات - ( نخوة ورجولة وكرامة احساس بالمسؤلية  ) - اتضح انها لم تختفى بعد من المجتمع المصرى ف عصر مبارك العظيم .
    3.  شباب بيحبوا مصر بجد .
    4.  شباب زهقوا من الكلام وقالوا جه الوقت نعمل مش بس نتكلم .
    5.  شباب زى الورد مايعرفوش كلمة  ( وانا مالى  ).
    6. شباب رافض انه يتذل ويتهان  ف بلد الكرامة.
    7. شباب رفض انه يتسرق عينى عينك ويسكت .
    8. شباب ضحى بعمره علشان غيره يعيش كويس او بمعنى اصح يعيش زى البنى ادمين .
    9. شباب كنت اتمنى انى اكون منهم.

      والحصة الجاية نكمل تاريخ مصر ف عصر مبارك الاعظم 

      كانت معكم ميس منونا 


      2 داقوا الشاى وقالولى رأيهم:

      لـــولا وزهـــراء يقول...

      ميس ميس ميس ممكن واحد شاي بمعلقة سكر واحدة بالنعناع لو مافيش نعناع مشيها قرنفل ...

      "الاحزاب السياسية اللى ماكنش فيهم نفر يعرف حاجة عن الثورة اساسا واستهبلوا وعملوا انهم هما اللى منظمينها"

      دي اكتر حاجة كانت هتجنني الايام اللي فاتت كل واحد جاي ع الجاهز وعايز ياخد حتة من التورتة ياخدها بالدم بقا ياخدها بالرصاص ميهمش الاهم عنده السلطة في الثورة دي سقطط من نظري رموز كتير كانوا عايزين حتة ...لكنها كانت ثورة منورة كشفت لنا فساااد طاااغي في البلد ادلدل لسانا واحنا بنقول عليه وبقوا دلوقتي كبش الفدا دلوقتي !! االلان !!! كما قال رب العزة ولله المثل الاعلى لفرعون حينما غرق ونطق بالشهادة بعد اااااااااايه
      دا احنا لسانا بقى مترين قدام وريقنا نشف أألان!!!

      لولا

      мαησηα يقول...

      لولا ..

      ازيك يا قمر

      اتفضلى يا بنوتة كل السكر والشاى اللى انتى عايزاهم

      هههههه ده احنا بكينا بكا وضحكنا ضحك اياميهايلا الله ينتقم منهم مطرح ماراحوا كلهم

      ربنا بس يتم علينا النصر والفرحة ونفضل ع طول زى ما احنا كده محافظين ع جمال مصر بعد الثورة

       

      ೋ واحــد شـاى ♨ Template by Ipietoon Blogger Template | Gift Idea