احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الخميس، سبتمبر 30، 2010

انا وانا مثقفة :) ..

من عمايل ايد .... мαησηα بالظبط الساعة 7:27 ص



صباحكم سكر

ازيكوا ازيكوا ياللى انا مابجيش عندكوا :( 

انتوا اللى دلعتونى اصلا وانا اتمرعت  :(

بس والله غصبن عنى

كان ف بيتنا عريس 

وقبلها كنت مشغولة  البال

وانا لما بكون مشغولة البال 

مابعرفش اعمل حاجة 

المهم انا جالى تاج  :) 

من ناس عزاز عليا جداااا

اولا جالى من رامى اخى العزيز صاحب مدونة بابى 

ثانيا بسام صاحب مدونة انا الريس 

ثالثا من منون صاحبة مدونة كلمات ف حياتى 

التاج المثقف انا سميته كده هههههههههه 

اخيرا هجاوب عليه 

ونقول بسم الله


ما هي كتب الطفولة التي بقيت عالقة في ذهنك؟

اكيد اكيد العشق الازلى ميكى  وماجد

وباسم وفلاش وزوووم



من أهم الكتاب الذين قرأت لهم؟

اهم من ناحية ايه  ماهما كلهم حلوين بصراحة

قرأت للناس الكبيرة والناس اللى لسه بتبدا ف الكتابة

انيس منصور واحسان عبد القدوس 

ويوسف السباعى ومفيد فوزى

وبردو   عمر طاهر واحمد العسيلى  واشرف توفيق 

وخالد الخميسى واحمد مهنى وهيثم دبور

كل اللى قرات لهم مهمين لانه اثروا فيا وافادونى



من هم الكُتاب الذين قررت أن لا تقرأ لهم مجددا؟

احم احم نجيب محفوظ خنق اهلى ههههههههه


في صحراء قاحلة ، أي الكتب تحمل معك؟

طبعا دون منازع ماوراء الطبيعة للدكتور احمد خالد توفيق

اه بعشقها دى ف كل سفرياتى حتى لو غطسانة ف المية 


ما هو الكاتب الذي لم تقرأ له أبدا وتتمنى قراءة كتبه ؟

منى درويش :))))) 

 بهزر بهزر الله 

احمد العايدى و وليد طاهر وعباس العقاد ويحيي حقى وبهاء طاهر



ما هي قائمة كتبك المفضلة؟

انا كده هاكتب اغلب الكتب اللى قرأتها لان انا الكتاب اللى مابيعجبنيش 

برميه من ايدى 

نقول بسم الله الرحمن الرحيم 

الرحيق المختوم .. صفى الرحمن المباركفورى

الذكور والاناث فوارق واختلافات  .. ده كتاب مترجم

اتنين اتنين .. انيس منصور

حضرة المحترم .. نجيب محفوظ

مذكرات شابة غاضبة .. انيس منصور

الذين عادوا الى السماء .. انيس منصور

الذين هبطوا من السماء .. انيس منصور

زوجة احمد .. احسان عبد القدوس

شكلها باظت .. عمر طاهر

اول مكرر .. هيثم دبور

كتاب مالوش اسم .. احمد العسيلى
 

عزازيل .. يوسف زيدان

رباعيات جاهين .. صلاح جاهين

مشاعر مرهقة .. سارة درويش

زوجى مازال حبيبى .. سارة درويش

موس حلاقة .. شريف شقاريه

رسم قلب .. حسن الحلوجى

حواديت عيل موكوس .. مراد ماهر

سلك شايك .. مراد ماهر

مبسوطة يا مصر .. اشرف توفيق

اغتراب .. احمد مهنى

تاكسى .. خالد الخميسى

مصر فى قطعة جاتوه .. سلسلة مدونات للجيب

مشروع وطن .. سلسلة مدونات للجيب

اناكارينينا .. ليوتولستوى

ارواح شريرة  .. هنرى جيمس

سلسلة ماوراء الطبيعة .. د/ احمد خالد توفيق

حاجات كتير لارسين لوبين

واجثا كريستى
 
شورلوك هولمز 
  
ف حاجات تانية بس انا مش فاكراها للاسف :(

المقامات محفوظة للكتاب طبعا  .. انا كنت اللى بفتكره بحط اسمه 



ما هي الكتب التي تقرأها الأن؟

كنت بدات ف قنديل ام هاشم لـــ " يحيى حقى "
 
والبحث عن السعادة لــــ " محمد غالية "



اللي بعت الدعوة ؟

رامى .. مدونة بابى 

بسام .. مدونة انا الريس 

فراشة ..  مدونة كلمات من حياتى



أرسل الدعوة لمدون واحد على الأقل من أجل مشاركتنا في القراءة؟

هادبس فيها مامتى ريم

مدونة رسايل بلا بريد 

اصلك يا مامتى بتنورى بلوجر كله 

بصراحة بوجودك 

*****

عايزة اقول ميرسى بجد لكل اللى اهدونى التاج 

ميرسى علشان استنتونى كتير اوى

وميرسى علشان خلتونى اشوف نفسى قرأت قد ايه ف حياتى 


صباحكم سكر سنترافيش 

بحبكم اوى 


12 داقوا الشاى وقالولى رأيهم:

adel يقول...

نجيب محفوظ خنقك !!!
ماعلينا

شهووووده يقول...

صباحك عسل ياجميل

Noha Saleh يقول...

عاوزة اقولك حاجات كتير
اولا عاوزة اعرف سلسلة ماوراء الطبيعة دى بتتكلم عن ايه
وكتاب مالوش اسم بتاع احمد العسيلى انا لمحته مرة فى دار الشروق وهشتريه لما انزل ان شاء الله
رواية اناكارنينا انا بحبها جدا
اجاباتك حلوة وماشاء الله فيها كتب كتير جدا

richardCatheart يقول...

لالالالالا مثقفه مثقفه ياعنى

Phoenix يقول...

هو فى اسئلة مش موجوده ولا ده تاج تاني للكتب
:\

بس سيبك انت
طول عمرك مثقف ياقمر
^_*

مبروك لاخوك كتييييير و عقبالك انت و سارة
:)

ELMOSTAFZ يقول...

مبروك التاج ،وعقبال تاج المحبة :)
تحياتي لحضرتك...

MR.PRESIDENT يقول...

بعد السلام والتحية
أما بعد
من رئيس الجمهورية

حمد الله علي السلامه يا راجع من السفر
مكتبتك ماشاء وان كنت لا أطيق انيس منصور يمكن لشخصه رغم أن كتابته رائعة وانا لا استطيع الفصل بين الشخص والكتابة .

كتاب تاكسي رائع وانا كارنينا لتلستوي واجاثا كرسيتي .

ربنا يكرمك ويسعدك ويوفقك .. ويريح بالك .. وينصرك علي مين يعاديكي :)
دعوة جدتي أو بالاحري ستي .

م. حجاز يقول...

ياسلام عليكى فى موضوع بحبكم والله فكرتينى بهانى شاكر
:)

وبعدين انا بس بستغرب انتى قريتى الكتب دى كلها بانت الايه انا بحسد بس اصلى ماقريتش نصهم

اه ماتنسيش باركيلى للعريس اخوكى وربنا يباركله يارب ويسعده فى حياته المستقبليه

لـــولا وزهـــراء يقول...

مــــــنونا


باين انك مثقفه بجد .. بجد

على فكره انا بدات قراءه لعباس العقاد من اولى ثانوى وكنت متعقده من اول كتاب قراته له كان اسمه ساعات بين الكتب وبجد كنت مش فاهمه اى حاجه ....

الكتب اللى بتقرايه بتدل على شخصيتك زمان كنت قرات جمله بتقول قل لى ماذا تقرا اقول لك من انت ؟؟؟

باين انك شخصيه ولا بلاش اقول خلى الكلام بينى وبينك مش امام الجمهور
فى انتظار انى اقرا كتاب يحمل توقيعك لانك ما شاء الله عندك حس جميه واسلوب راقى واكتر من رائع

فى حفظ الله


زهراء

ستيتة حسب الله الحمش يقول...

صباحك ومساؤك عسل يا منونة

انا متعجبتش غير لموضوع نجيب محفوظ
قرأتي رادوبيس؟
على العموم لولا اختلاف الأذواق لبار الكتاب والفنانين :)
جميل التاج على احلى راس بتحب الشاي :)

همس الاحباب يقول...

ههههههه
وانا بقول البنتى دى مالها
دلوقتى عرفت كل حاجة
دى اخرة الثقافة يا بنتى
تسلم الايادى وحمدلله على السلامة

Ramy يقول...

أختنا العزيزة منى

(:

مساءك سنترافيش (:

لا شكر على واجب

(:

التاج دة تحت مشروع دبسنى شكرا

و بعدييييين دى كلها كتب قرتيها

انا مش بأحسد

انا بنق بس (:

يالى بقى للتاج اللى بعده (:

 

ೋ واحــد شـاى ♨ Template by Ipietoon Blogger Template | Gift Idea