احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الأحد، أبريل 04، 2010

زوجــــــــة احــــــمد ...

من عمايل ايد .... мαησηα بالظبط الساعة 11:22 م




انا  يعنى

هههههههه 

انا جييييييييييييييييييييييييييييييييييت 

بس بردو ان شاء الله هابقى انا 

امممممم

اخينا اللى بيقول يا دى احمد اللى واكل دماغك ده 

اصل والله بردو انا لقيت الكتاب ده داخل عليا 

وانا قاعدة افكر انا جوزى هيبقى مين ؟؟ 

ههههههههههههه 

هى رسايل كده بتيجى من ربنا سبحان الله 

علشان انا بنت حلال ونيتى خير وطيبة 

واشارك ف الاثاث ههههههههههه 

مش فاهمين طيب براحة ..اصبر يا بو على اصبر هاقول اهو  :)

زوجة احمد هو كتاب  للرائع احسان عبد القدوس 

اقل مايقال عن الكتاب ده انه تحفة تحفة تحفة 

تحفة غالية لمن يريد حياة زوجية سعيدة 

باختصار هو حياتى كما اتمنى ان احياها بعد الزواج 

تؤ ..تؤ اللمض اللى بيقول ايون احلام بنات بقه وحكاية من حكايات الف ليلة وليلة 

تؤ  يالمض

هى حياة زوجية  فيها مشاكل ومشاكل جامدة مش هوينة مالية ونفسية 

لكن الحلول المقدمة من الكاتب حلول منطقية عقلانية 

متميزة 

الكتاب بيحكى عن سيدة تزوجت من احمد 

هى كانت الحمد لله من اثرياء القوم هو كان شخص عادى لكن 

مافيه من اخلاق وصفات جميلة وطباع حلوة جعلته فتى احلامها 

 وحبها الوحيد 

الجميل ان اللى كاتب الكتاب راجل ف قادر بمنتهى البساطة


 يوصل لاى بنت او زوجة حديثة الزواج تفكير زوجها 

فى كل مرحلة خصوصا انه رجل وعاش كل الاحاسيس دى 

كمان هو واصف حقيقى مشاعر المراة ف كل مشكلة وكل حاجة حلوة هى حست بيها 

الاجمل والاجمل انه عامل الكتاب ده مخصوص لبنته 

او معتبره هدية ليها يعنى من الاخر الراجل ده عامل لكل زوجين خلاصة من اكسير النجاح 

ف الحياة الزوجية اكسير مميز وسليم مية ف المية خصوصا انها نصايح لبنته 

نصيحة من اختكم اى حد ناوى يدخل دنيا


 او


 دخلها ومش حاسس انه مظبط نفسه فيها يقرأ اكتاب ده 

وينوبكم ثواب تدعولى 

وينوبكم ثواب اللى يشتريه يجيبلى نسخة :)) 

بما انى هابقى زوجة احمد ان شاء الله هههههه 

ولانى  مش لاقياه  ف البلد  الفقر دى

بس خلاص .. 

ادعى يا خويا انت وهيا انا بقدم نصايح ببلاش ولا ايه ؟؟ 







35 داقوا الشاى وقالولى رأيهم:

Unknown يقول...

ربنا يوفقك ويكرمك
ويكفيكي شر المرض
ويرزقك باين الحلال اللي اسمه احمد
اللي يعيش معاكي
واللي يحلي دنياكي
ويرزقك منه الخلفة الصالحة
قادر يا كريم
اللهم امين يارب

احم احم
اظن انا لو واقف علي باب مسجد
وقلت الدعوتين دول كنت لميت حق الشبكة اللي هتجوز بيها
بس يلا مش خسارة فيكي
ههههههه

مرسي ليكي

م. حجاز يقول...

هو لازم احمد بامنونة طب ما يمشيش نصر وبيدلعوه يقولوله ياحمد

الكتاب محاولة جميلة منك ولكن للى عايز ينتحر ويتجوز بأه
هههههههههه

أع ـقل مـ ج ـنـونــة يقول...

ههههههههههه
ماشي يازوجة احمد
الكتاب شكله ممتع اوي بجد
هدور عليه واحاول اشتريه
ميغسي ع البوست ياقمر ^_^

قلم رصاص يقول...

ندعوا الله العظيم رب العرش الكريم ان يرزقك أحمد زوجا صالحا

هه كدا كويس ولا مطلوب ايه تاني؟

ربنا يكرمك

تقبلي مروري وتحيتي

Dr . Rosa يقول...

فعلا الكتاب اكتر من روووووووووووووعه
قريته قبل كده زمان
تصدقى فكرتيني اجيبه اقراه تانى

تسلمى على ذوقك الراقى
وربنا يوعدك بأحمد اللى فى بالك

Kiara يقول...

يارب يتحقق اللي في بالي *_*

أحمد الصعيدي يقول...

http://www.4shared.com/file/33305478/1944abbe/____.html?s=1



أي خدمة يا منونا يلا حلي الكتاب


يارب تكوني مبسوطة

السلام عليكم

Sweet Violet يقول...

امممممممممم
أحمد
امال هتسمى ابنك ايه بقى لو جوزك احمد
لالالالالالالالا اعتراااااااض ياامى هتسمعى احلى كلام على الاسامى صدقينى و انا اول واحدة هتكلم بقى
((:

ربنا يااااارب يكعبلك فيه بس مايكنش احمد بقى هه بس
ضد و براحتى بقى
^_^

sony2000 يقول...

بجد شكرا علي نصيحه الكتاب
وييييااااااااااااااااااااااااارب
يارب
يوفقك فحياتك العمليه والعلميه
اللهم امين:)

سمع هوص (Abo 3li) يقول...

منا صابر اهوووون.... وانا فتحت بؤي ولا اتكلمت... ولا هوا افتري وخلااااااااااااص... ههههههههههه...

اوعدك اني هدور عليه... وهقرااه... مش علشان لا سمح الله هتجوز ولا حاجة... لأ علشان نشوف الراجل ده كان قايل ايه لبنته... واهو ينفع برضو كمان سبع سنين... يدينا ويديكي طولة العمر...

غير معرف يقول...

يااااااااااااارب
خد من قلبى وسر يارب
يرزقك باحمد ابن حلال

محمد التركى يقول...

الأخت زوجه أحمد
على أساس ما سوف يكون يعنى

والله ياستى كلامك جميل بس للأسف فيها تفاؤل وأحلام وأوهام
لأن ببساطه الحياه مش مسأله رياضيه بسيطه ينفع التنبأ بحلها
أو وضع برهان ليها
تؤ تؤ تؤ أنا أسف
بس هيا ديه الحقيقه المؤلمه اللى ميعرفهاش العزاب أوا اللى مدخلوش دنيا

على فكره أنا مش متجوز ولا حاجه علشان متقوليش ده متجوز ومراته مطلعه عينه وجى يقرفنا معاه
لالالا خالص والله
أنا كنت خاطب ومحصلش نصيب والحمد لله
لأنى شفت المرار وأنا خاطب أمال لو أتجوزتها كان هيجرى ايه
والله أنا كنت فاكر الأول كده زايك أن كل مشكله بين زوجين ليها حل
بس للأسف ده مش صح
هقولك مشكله لسه طاظه حصلت مع واحد صاحبى هو ومراته وقوليلى يعمل ايه؟؟؟
صحبى متجوز بقاله 6 شهور عريس جديد ياعنى ومراته من ثالث يوم والخلافات اشتغلت وكنت بهديه وأقوله ناقصات عقل ودين
أما المشكله ديه فبدون تعليق
من غير أطاله مراته حامل فى شهرها الخامس وزى عادتها صحبى حظرها من حاجه متعملهاش وكسرت كلامه وعملتها بالعند فيه راح متخانق معاها زى العاده وسبلها السرير ونام فى الصالون
قام الصبح على سريخ وعياط لقها بتتمرغ فى الأرض من المغص
خدها وجرى على الدكتور
تخيلى عملت ايه سفت شريط برشام بتحاول تنتحر علشان أتعركت معاه
والجنين كان فى خطر
طيب والنبى يعمل ايه معاها
جاوبى على المشكله ديه
وأوعى تقوليلى أشترى الكتاب بتاع زوجه حماده ده وأدهوله هديه

تقبلى مرورى ومرسى على الشاى الجميل
ودى وحبى وتقديرى للمتفائله دائمآ

Tarkieb يقول...

ههههه انت عشان قريتى كتاب عن احمد خلاص حبيتي الاسم ...عندك حق ماهو انت لو كنت عشتي في حتتنا كنت كرهتى ام الاسم ده ....اي واحدة تكليميها تقولك احمد ولو طولتي معها اكتر تقولك احمد يا عمر ...ولوطولتي اكتر ربنا يستر بقى....

صيدلانيه طالعه نازله يقول...

يعنى اللى دخل دنيا و مش متظبط يجيبه
طب و لو متظبطش يا طنط بعد ما اقراه
اعمل فيكى ايه؟
لا و لا حاعمل فيكى حاجه انا حابعتلك الكتاب عقابا ليكى
هههههههههههههههههههههههههههههه

мαησηα يقول...

انسان مش عادى ..

اللهم امييييييييييييييييييين

هههههههههههه

ربنا مايحرمنى منك ابدااااا يا عبدو

ولك مثل مادعوت لى به يارب

تسلملى يارب ويسلملى دعائك يا جميل

мαησηα يقول...

محمد .. هههههههههههه

لا هو لازم احمد يا محمد علشان يبقى لايق عليا

لازم منى واحمد

تسلملى يا محمد والله يا ابنى الجواز

زيه زى اى حاجة محتاج تخطيط صح

احسبه صح تعيشه صح

мαησηα يقول...

ريمو ..

ههههههه يارب يخليكى يارب يسمع من بؤك ربنا

لو لقيتيه اشتريلى نسخة انا مش عارفة الاقيه

نسخة مطبوعة لقيته على النت بس

هنا ف طنطا مش عارفة الاقيه عااااااااااااااااا

ميغسى على مرورك يا ريمو

мαησηα يقول...

قلم ماس ريسنا الهمام ..

اللهم اميييييييييييييييييييييين

ربنا يخليك ياريسنا ويخليك لشعب مصر العظيم

وان شاء الله ربنا هيسمع منك الدعاء

نورتنى واسعدنى جدااا مرورك الطيب يا قلم ماس

мαησηα يقول...

دكتورة روزا ....

ههههههههه اى خدمة يا جميل

يارب اللهم امييييييييييييييييين

تسلميلى انتى يا حبيبتى على مرورك

وكلامك الجميل ده ياقمر نورتينى حبيبتى

мαησηα يقول...

كيارتى .. يارب اللهم اميييييييييين يا كيارتى

мαησηα يقول...

استاذ احمد .. ميرسى يا استاذى

ميرسى تعبتك معايا

ربنا يخليك ويسلم مرورك الطيب

мαησηα يقول...

سويتى ..

ههههههههههه هاسميه ادم

ههههههههه بصى يا سويتى كل اللى يجيبه ربنا

كويس بس يجى يا اوختى انا مش هاعترض

ههههههههه شكلك جايبالى عريس هاتى

وانا هادلعه واقوله يا احمد ههههههههه

ولا تزعلى يا قمر

мαησηα يقول...

سنسن ..

العفو يا حبيبتى على ايه ؟

اى خدمة

يارب يا سنسن اللهم

اميييييييييييييييين

ميرسى يا حبيبتى ربنا مايحرمنى منك ياقمر

мαησηα يقول...

ابو على السكرة ..

ههههههههههه والله انت سكر فعلا

ان شاء الله ونفرح بيك يارب انت

وريييييم ههههههههه

ماتقلقش هيعدوا هوااااااااااااا

мαησηα يقول...

حنونتى ..

ياحبيبتى يا عثل يارب

اللهم اميييييييييين

تسلميلى يا قمرى ومايحرمنى

منك ابداااااااا

мαησηα يقول...

التركى ..

بص ياسيدى وما ستك الا انا ههههههههه

كل الحكاية ان الناس بتفتكر ان فترة الخطوبة دى

فترة حب وتلزيق مشاعر وكلام جنب بعضه وخلاص

فترة لازم يخلصوا فيها كل الحب وكلام الحب

مايعرفوش انها اصلا فترة معمولة علشان كل واحد


مايغمضش عينه عيوب ومميزات الطرف التانى

فترة معمولة علشان كل اتنين يتفقوا حياتهم اللى

جاية هتمشى ازاى

صاحبك من الاول غلط انه معرفش يفهم مراته

اتعلم انت بقه من العيوب والمشاكل اللى

اصحابك واقعين فيها واقعد فكر فيها بحيث

تتفاداها ولو اتعرضت لها تقدر تحلها

ماتزعلش انه ماحصلش نصيب وماتقعدش

تضلم الدنيا ف وش نفسك وتحس ان كل البنات

نسخة طبق الاصل من خطيبتك

وماتتسرعش ف اختياراتك

وان شاء الله ربنا هيكرمك ويرزقك ببنت الحلال

اللى تسعدك يا محمد

ومازلت انا بقول

الزواج حياة تحسبها صح تعيشها صح

ميرسى لمرورك الطيب يا محمد لا حرمنا الله منه

мαησηα يقول...

تركيبة .. ههههههههههههههههه

مش قادرة بجد ضحكتنى الله يسعدك

هههههههه والله انت مشكلة

تسملى ويسلم مرورك يا تركيبة

мαησηα يقول...

دكتورة علا ..

هههههههههههههه

والله هتتظبط صدقينى صدقينى

نورتينى يا حبيبتى واسعدنى مرورك العطر يا قمر

محمد التركى يقول...

باح الفل والياسمين على الجميله منونه
والله ياستى أنا مش متعقد ولا حاجه وطبعآ أنا مش فاكر البنات كلها زى خطبتى السابقه
لا لالا طبعآ لو بفكر كده أبقى متخلف أكيد
بس ببساطه كتر الحزن يعلم البوكه
ومشكله صحبى أنتى هربتى من السؤال مش أجابه انه كان أختيار غلط من الاول
أنا فى الواقع والحاضر يعمل ايه يطلقها
طيب والله بيقولى لو البيبى كان لقدر الله مات
كنت بعد ما اعالجها هطلقها
شفتى بقى
ربنا يستر

مستنى رأيك فى بوستى الجديد
علشان رأيك يهمنى
لأنه بناء وفيه نقد محترم

صباح الفل مره ثانيه
تحياتى لشخصك الرائع

Unknown يقول...

ربنا يرزقك ويرزق
بنات المسلمين اجمعين
بالزوج الصالح اللى
يكمل لهم نصفهم الأخــر

Unknown يقول...

مبروك الافتتاح
والشكل الجديد
انا لسه كنت
فى الفيس بـوك
وقرأت التنبية

мαησηα يقول...

نورا .. نورتينى يا سكر

الله يبارك فيكى حبيبتى تسلميلى

ويسلم مرورك

الطيب والسريع

نورتينى ومبسوطة اةى انك

جيتى شربتى معايا شاى

يارب يكون بس عجبك

يارب اللهم اميييييييييييييييييييييييين

мαησηα يقول...

محمد التركى .. اهلين يا محمد

لا مش هربت من مشكلة صاحبك بس انا عموما مابحبش اسمع المشكلة من طرف واحد لانه غالبا بيطلع نفسه الملاك البرئ الطاهر اللى يعينى مظلوم

انا بحب لو اتحكمت ف مشكلة اسمع الطرفين ويكونوا ف نفس الوقت كل طرف بيسمع التانى بيحكى ازاى

علشان ما اظلمش حد وخصوصا لما بيكونوا متجوزين وف بينهم بيبى كمان
دى حاجة

تانى حاجة بقه انا مين وايه علشان اتدخل ف حاجة تخصهم ومش مكانها
المشكلة هنا اصلا يا محمد

لان اكيد ف ناس كتير دخلت وقرأت التعليق وانا كنت محتارة انشره ولا لأ

وعلمت عليه مايتنشرش بس انا عندى ماووس حوله ونشرت كله

وللاسف والله انا مش هاقدر افيدك فيها المشكلة دى

سامحنى بس متغاظة اوى من صاحبك ده انه بيحكى كده مشاكله حتى لو انت صديقه الصدوق

وبردو هو سبب رئيسى ف المشكلة انه اكيد مابناش بيته على قواعد سليمة واسس صح

ربنا يهديله زوجته ويكرمه ويعينه على اللى حط نفسه فيه

صباحك شهد يا محمد

وسورى انى اتاخرت عليك لكن انا عندى لغبطة

هاقول عنها قريب ف بوست

Sam Sh يقول...

ربنا يديلك أحمد بتاعك يا ستي
و الكتاب أنا كنت قريت مقتطفات منه و هو فعلا مميز جدا و ممتاز بجد .. إختيارك رائع

تحياتي :)

мαησηα يقول...

سامح .. يارب اللهم امين

تسلملى يا سامح الكتاب فعلا ممتع

مرورك هو الاروع والله نورتنى يا جميل

 

ೋ واحــد شـاى ♨ Template by Ipietoon Blogger Template | Gift Idea