مش لاقية لها عنوان ..

كل سنة وانتوا طيبين بمناسبة يوم عاشورا

امبارح والنهاردة وفى كل مناسبة دينية

تلاقى شعب الشحاتين كلهم بيلفوا ويدورا على الابواب

وبيشحتوا لما كرهوا الواحد فى عيشته

امبارح فى الشغل واحدة شحاته دخلت وقعدت بقه

انا مرات فلان العلانى وهو عيان ومرمى فى المستشفى بمرض كذا وكذا

بنتى عندها امراض كذا وكذا وكذا ومحتاجة عملية علشان معرفش ايه وايه ؟؟

ماشى يعنى انتى سيادتك صحيتى من النوم النهاردة فجأة كده لقيتى كل بلاوى الدنيا عمدك

لا اله الا الله .. ليه كده ليه بيستغلوا اى مناسبة دينية ويبقوا زى التتار على البيوت

وعشرات من امثالها بقه عايزة اقولكم بيبقى الموضوع واخد تلات ايام

ماقبل المناسبة ويوميها وبعدها ..

سبحان الله يعنى هى البنى ادمين متبقاش عطوفة غير فى المناسبات الدينية

اللى غاظنى بقه المدرسات اللى معايا قعدوا يقولولى انتى قلبك حجر انتى قلبك جامد

انتى مافيش اى احسايس عندك .. طيب بالله عليكوا دى حاجة حد يعقلها

وبعدين معلش انا شفت حالات ممكن تموت من الجوع ولا انهم يروحوا يزعجوا الناس بالمنظر ده

معرفش انا شايفة انى عقلانية شوية وواقعية مش بفكر بقلبى وبصراحة نفسى نقف كلنا واقفة صح

ونخليهم يبطلوا يعملوا كده ..

المحتاج مابيروحش يطلب بيبقى عنده حياااااااااااااااااااااااء ياناس

انا بصراحة اى شحات بيقف قدامى والله لو هو ايه بيموت قدامى مابتهزش

لانى واثقة انه بيكدب .. وان ليهم اساليبهم الخاصة فى انهم يقنعوك بالبؤس

كمان معلش انتى واحدة ست واقفة قدامى بكامل صحتك تعالى اشتغلى عندنا

دادة للاطفال احنا محتاجين دادة .. وهتروحى بيتك معززة مكرمة الساعة 2 الضهر

وتروحى تشوفى بيتك واولادك .. تقولك لأ عايزة تاخد فلوس ع الجاهز وخلاص

طيب دى تستاهل بقه .. وغيرها والله رجالة وبابا يقولهم تعالوا اشتغلوا يقولوا

لأ انا ايه اللى يبهدلنى .. ينفع بقه تعطف على الناس دى ..

وفى الاخر يقولولى انتى قلبك حجر ..بالله عليكوا لو انا غلط حد يقولى انتى اكبر غلطانة

ولوصح قولولى ايه الحل اللى نقدر نقنع بيه الناس دول

ان العمل عبادة وان الشغل اكرم لهم من اللى بيعملوا ده

..لعل وعسى الواحد يقدر يغير حاجة ويعمل حاجة مفيدة فى دنيته