احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الاثنين، مايو 10، 2010

مش من حقـــــــــك .. تحديث مهم

من عمايل ايد .... мαησηα بالظبط الساعة 5:53 م







انت ايوة انت ..

ماتبصليش كده لانى مش من حقك

عاجبك هدوئى وطفولتى وبراءة ملامحى .. بس ماتبصليش كده

انا مش من حقك

وانت ايوة انت عايز ليه تقولى كلام حلو وتكتب فيا شعر .. ازاى ؟؟

انا مش من حقك

وانت اللى واقف هناك ايوة انت .. بتستعد تسلم عليا .. وبتسبل بعينيك

فاكر بسلامك ونظرة عيونك هتلمس قلبى .. لا مش هتقدر تلمس قلبى

انا مش من حقك

وانت بتقولى ايه ؟؟

بتقول هتدينى الامان وهتحمينى من غدر الزمان

لا ماتقوليش انا مش من حقك

وانت فاكرنى هاصدق كلامك  المغلف بالحنية وهو كله كدب ف كدب
وانت بتقولى انا مشدودلك وحاسس بيكى

و بتطلب منى اصدقك .. لا مش هاصدقك  

انا مش من حقك

وانت بتدرس كل تفصيلة من تفاصيل حياتى علشان تلاقى ثغرة تدخل لقلبى منها

لا انا مش من حقك

وانت .. ايه بتقول بتغير عليا ؟؟

ليه ؟؟ عايز تحسسنى باجمل احساس ف الدنيا

لا مش هتقدر .. انا مش من حقك

مش من حقك .. لان ده كله حق يملكه انسان واحد

خلقت انا من ضلعه .. هو حقى وانا حقه

روحى هترتاح لما تشوفه .. وساعتها بس

هاحس الامان الحقيقى والهدوء النفسى الحقيقى

ساعتها هتعجبنى اوى غيرته

ومن غير مايقولى بحبك الاقيه بيعمل كل حاجة تخلينى احبه

وساعتها هو بس اللى هيشدنى ليه ومحدش هيقدر ياخدنى منه

لانه بمنتهى البساطة

نصى الحلو .. وفرحة زمانى

وابو اولادى .. وسندى ف اخرتى

 
=================================
يمكن ماتكونش مكتوبة كويس 
معلش انا لسه بقول تاتا ف حكاية الكتابة 
يعنى تقدروا تعتبروها كلام عادى مش نثر ولا شعر
ولا ادب 

المهم الغرض منها 

هى رسالة موجهة لكل انسان بيحاول ياخد 

حاجة مش من حقه 

ولكل انسانة عندها استعداد 

تتجنى على حقوق زوجها سواء " الحالى "

او لو ما اتجوزتش  " المستقبلى "

اتمنى انها تؤدى الغرض وتفوق كل 

نعسان عن الحق 

سلامو عليكو بقه 

================

اه انا اخيراااااااااااااااااا اخيراااااااااااااااااا 

خلصت رد ع التعليقات  ههههههه 

عارفة انها خللت بث معلث بقه 

===============

ادعولى لان المرة دى انا تعبانة اكتر من ا ى مرة

والمشكلة ان الدوا مش جايب نتيجة 

عاااااااااااااااااااااااااااااا


=======  التحديث  ======


نظرا لان كل الناس رأيها انى

قفلت الباب ف وش الناس ومحدش هيقرب لى 

فانا حابة اوضح وجهة نظرى 

بصوا يا جماعة اللى شاف ان كلامى ده قفل الباب ف وشه 

يبقى هو كان جاى يخبط ونيته مش سليمة 

جاى وعايز يتسلى وانا ولله الحمد 

قلتها مرة وبقولها تانى انا

مش بتاعة تسالى يااا لب وكلمتين حلوين

ويفضل يحب لحد مايشبع هو حب

وبعدين يقولى معلش اصل ظروفى

اصل ابويا معترض اصل امى

حلفت ماتدخلنى البيت الا لما اخد مش عارفة مين

انا بجد تعبت من حكاوى البنات

اللى كل يوم بيحكوهالى بشكل مختلف

وتعبت من مناظرهم وانا شايفاهم بيتقطعوا

والبهوات زى ال... ولا بلاش

اللى قال ظروفى معداش شهرين واتجووز

واللى قال اصل امى واصل ابويا

اتجوز اللى ع مزاجه هوه

وهى يا عينى اينعم تستاهل اللى جرالها

بس بردو بتصعب عليا وهى بعد ما بتسيبه بتموت

ليه يعنى مابقاش ف رجالة غيره

انا ماعنديش اى استعداد ابقى واحدة من دول

بصراااحة وبعدين بقه مابحبش انا

اللف والدوران والسهوكة

مرارتى بتتفقع منهم بصراحة
:(
انا كده ومش هاتغير

والله يا جدعان عنوان بيتنا مايتوهش
على راى على الحجار

واللى داخل جد اهلا وسهلا بيه

اللى هيتسلى يبقى يشوف له عتبة تانية

علشان دى احنا راشين عليها ماية وبتزحلق

وبعدين لو حاول رجله هتتكسر

واولا واخيرا

مايهمنيش الناس عايزة  ايه 

المهم عندى ما اخسرش نفسى

وقبلهم ما اخسرش رضا ربنا عليا

بس بقه خلصت انا

:)


  ===========
البوست ده من زمان عندى


اللى خليتنى انزله


بنوتة بحبها جداااااااااا


لقيتها بعتالى امبارح رسالة ع الفيس بوك


قسمتنى نصيين بجد


بجد ربنا يحرق قلبه زى ماحرق قلبى عليها

حتى ماكانش كامل كملته وعكيته


تلاقوا حتى الاسلوب مختلف


انا الحمد لله دلوقتى بكتب احسن من كده

سلام طولت انا عارفة


رغااااااية

بس بتحبونى زى مابحبكم 

:)



16 داقوا الشاى وقالولى رأيهم:

سمع هوص (Abo 3li) يقول...

خلاص ياستي مش هسبلك.... اهوووون... غمضت عيني خاااالص كمان... مبسوطة كده!!؟!

تاتا ايه ياقمر.... انتي كاتبها حلو اوي... تسلم ايدك...

بمناسبة انتهائك من الرد علي التعليقات... عاوز اقولك اني كل مقرأ رد من ردودك علي تعليق كتبته عندك قبل كده... بتخليني ارجع اشوف انا كنت كاتب ايه... لأني بعيد عنك الزهايمر مظبطتني...
عموما مبروووك...

وربنا معاكي ويوفقك للنفسك فيه.. ويريح بالك ان شاء الله...

Ramy يقول...

جميلة جدا

مش مهم ان تكون مكتوبة بشعر علشان
نقول برافو

المهم ان انت كتبتى احساسك

والف سلامة ربنا يشفيكى

وشكرا

мαησηα يقول...

ابو على السكرة ..

هههههههههههه والله انت فعلا سكرة

انا بدعيلك دايما يا ابو على

بحسك زى اخويا محمد سبحان الله يمكن لان اسمكم واحد فطبعكم واحد مش عارف هههههه

تسلملى يا ابو على دايما رافع من

معنوياتى بردو انا لسه نونو

والمفروض اكون احسن

هههههههههههه معلش كلنا كده وبعدين

ايون انا عايزة ع طول رجلك

ماتنقطعش من هنا

يارب اللهم امييييييين

تسلملى على الدعوة الجميلة اوى دى

мαησηα يقول...

سامى ..

مرورك الاجمل وميرسى بجد على تشجعيك ليا

اها المهم عندى انها تكون

وصلت للقلب زى ما طلعت من القلب

الله يسلم عمرك

ههههههههه بالنوسبة للتعليقين التانيين

انا مانشرتهموش جيت ابعتلك لقيتك

تبت عن التدوين باين خالص ههههههه

لقيت اكونتك غير متاح عااااااا

بس انا اروبة واتصرفت وهابعتلك الرد

ع الايميل الله اعلم هيوصلك ولا لأ

اوك

عفوااا على ايه انت نورتنا يا باشا

هي وظروفها يقول...

الله بقي

هي بقت كده مبقتش انا من نصيبك
بالراحه علي نفسك كده

ايه يا منونه

يا بنتي ادي نور اخضر لحد عشان يقرب
انما كده هيخاف يتكهرب

يا بنتي خللي اسلحه الدمار الشامل بعيد عن التفتيش
ومن الصراحه متكتريش
ولا تقولي اللي يخوف اي موز شايفك موزته
ولا تخللي شاب مثلا لقطه زي حالاتي
شايفك متضجكيش ايون لقطه
شايفني لقطه
حاسسني لقطه
وبعدين يا منمن براحتك اتدربي فينا
اتعلمي فينا
رخمي علينا
براحتك خالص
انتي بنتنا وان مكناش هنستحملك
مين يستحملك اما غريبه صحيح
سلامو عليكو

Ramy يقول...

معلش نسيت اقول

مبروك للشكل الجديد للمدونة

شكرا

мαησηα يقول...

وليد ..

هههههههههه ما انت عارف انى هاضحك

هههههههههه والله العظيم انت مشكلة يا لقطة

ياريت يخافوا ياريت يبقى ف دم واحساس

وياريت يبقى ف شجاعة لكن كون ان حد يدخلى بغير معرف

وفاكر بقه انه بكلمتين حلوين بقه يا عينى انا

هادوب ف دباديب اهله وبعدين يجى يعملهالى

مفاجاة ويعلنى عن نفس سيادته دى حاجة محتاجة انه يفوق

ويعرف انه مافيش فايدة

انا بانية خط بارليف على قلبى

والحمد لله مش واقعة عطفا وحنانا هههههههه

والله انا جد اللى شايف انى انفعه

اهلا وسهلا وبعدين انت اخ اى كلام ولا ايه

اى حد يفتكر ان مافيش امل قلهم انك اخويا

وعارفنى وفى امل بس رسمى فهمى نظمى هههههههههههههه

اختك بقه ولازم تستحمل الله يعنى اجيب ناس يستحلمونى من بره

نورتنى يا وليد

ومبروووووووووووووووووووك على خطوبتك ياباشا

عقبالى بقه قول امييييييييين ياراجل انت

мαησηα يقول...

سامى ..

الله يبارك فيك

اللى واخد عقلك يا عمنا

هههههههه ده عموما استايل مؤقت بس لحد

ما اخلص اللى بعمله لنفسى حاجة كده

تليق بمقام الناس

بس انا اخف كده وافوق علشان الدنيا جميلة خالص عندى

Ana keda يقول...

هههههههههههههههه
يا جامد يا جامد
ايه الحلاوة دى يا منونة عاقلة ياوختى والله
عندك حق فعلا والله ربنا يديكى يا رب الى يستاهلك
حلو اللوك الجديد ده يا منونة
بودا بيسلم وباعتلك بوسة
مش من حقه برضه
ههههههههههه

ستيتة يقول...

منونة
عااااااااااااااااااااااااا
شكل المدونة الأول كان أحلى ومنور وكنت بعرف أقرأ
عااااااااااااااااااااااااااا
وكانت فناجين الشاي كده سخنة وفي كل حتة
كمان عاااااااااااااااااااا

بس اللي مكتوب حلو قوي

мαησηα يقول...

مرمر .. حبيبةقلبى انا

ههههههههههههه

شوفتينى وانا جامدة بزمتك مش اجنن هههههههه

يارب اللهم اميييييييين

اممممم طيب انا دلوقتى فمشكلة كبيرة

اخلى ده ولا اغيره ؟؟

انا عندى تعليق وتعليق تعليق عاجبه وتعليق نو

على اخر اليوم هاشوف التعليقات واحسمها بالاغلبية

بينى وبينك انا كان نفسى احط واحد اسود من زمان

وبعدين كنت خايفة الناس تضايق من اللون

لانه كئيب اممممم ربنا يسهل ويعمل اللى فيه الخير

بوووودا حبيبى لا طبعا حقه ونص وتلات اربع كمان

حبيب خالتو الكميل ربنا يخليه ويجى ينور الدنيا بالسلامة

بوسيهولى وخلى مامته تتصرف وتتباس هههههه

мαησηα يقول...

دكتورة ستيتة ..

حبيبتى ليه عاااااااااا بس

اها حاضر حاضر ده استايل مؤقتا بس والله

انا بشتغل ف واحد تانى فاتح ومنور وهيعجبك بردو

اصل بتاع الفناجين انا عكيته اصل

انا مابعرفش اقعد ساكة

قعدت العب فيه وبوظته قلت بدل

ما اعدله اغيره

يا حبيبتى تسلميلى انتى اللى

مرورك احلى

sony2000 يقول...

بجد روعه وجميييييييله جدا جدا جدا
وعندك حق فكل كلمه بتقوليها
والف مليون سلامه عليكي

мαησηα يقول...

سنسن حبيبتى

مرورك الاروع يا حبى

الله يسلم عمرك حبيبتى تسلميلى يا سكر

beautiful mind يقول...

الف سلامة عليكي يا منونة وان شاء الله الف لابأس عليكي
رغم انها اول محاولاتك لكن بجد محاولة جميله بجد
والموضوع حلو اوي
انتي كدا سديتي الباب في وش اي حد يحاول يقرب ناحية قلبك
بجد تسلم ايدك
تحياتي

мαησηα يقول...

هيما .. الله يسلم عمرك يارب تسلم وتعيش

اها ادينى بحاول اعلم منكم

وبتعلم منك انت احد استاتذتى يا ابراهيم

هههههههههه بيقولك مثل حلو اوى

الباب اللى يجيلك منه الريح

سده واستريح :)

الريح بيجى بسرعة ويمشى بردو بسرعة

يبقى مايلزمنيش

ولا ايه يا باشا ؟؟

نورتنى يا جميل وانا كتبت تحديث شرحت

فيه وجهةنظرى

 

ೋ واحــد شـاى ♨ Template by Ipietoon Blogger Template | Gift Idea