استغلال .. واه يابلد

العواف عليكوا

بقالى كتير مش كتبت بس معلش سامحونى واعذرونى

كان فى عندى شوية ظروف كده المهم

ندخل ف الموضوع

تعرفوا من ضمن الحاجات اللى بكرهها ف حياتى جدااااااا

الاستغلال فى اى شكل من اشكاله

لسه من اسبوع عرفت واحدة بتستغل حب جوزها ليها

بشكل مبالغ فيه حاجات كده عجيبة بصراحة تصرفات معجبتنيش

وكل مااقولها ازاى يعنى تقولى الله هو مش بيحبنى يستحمل بقه

المهم قلت انا مالى هو مش عاجبه عايشين انا مالى

بس دى احدى صور الاستغلال الصغننة

وفى منها كتير

المشكلة انها صغيرة بس بناتها لما هيكبروا هيبقوا نفس نظامها

وبما ان الام مدرسة فهتبنى مجتمع كامل ع الاستغلال

بدل ماتعلمه احترام المشاعر الجميلة دى

وبالتالى اللى بيستغل مشاعر الحب ومابيحترمهاش

اكيد مش هيحترم اى مشاعر تانية واكيد

هيستغل كل حاجة حواليه

المثال ده بسيط هياخدنا لمثال اكبر

هتشوفوه ف السطور اللى جاية

*****

يوم السبت اللى فات صحيت من النوم الساعة 3 بالليل

ع صوت دق خشب رهيب ايه ياجماعة ده

ابص من البلكونة مش شايفة حاجة ظاهرة

ابص من الشباك الناحية التانية

كل الجيران نايمين ف سبات عميق

ماهو احنا شارعنا تحديدا يعتبر انضف

واوسع واهدى شارع ف مدينتنا المبجلة

ايه الصوت ده ياربى ؟؟؟

المهم دخلت كملت نوم وانا نازلة الشغل الصبح بقه

ابص الاقى من اخر الشارع عندنا لحد

بقيت الناحية بتاعتنا منصوبة خشب كانه مسرح بتاع الافراح ده

قلت خير يارب يمكن يكون حد ف شارعنا هيتجوز يلا هنستحمل الهيصة

لحد كتيره 12 او 1 صباحا مش مشكلة خلى الناس تفرح

اسال البنات اللى ف شارعنا هو الفرح ده بتاع مين يابنات يقولوا منعرفش

طيب مين اللى طلبت معاه جواز فجأتاً كده ..

ماعلينا .. تالت يوم رايحة اشرب كنت سهرانة ورايحة اشرب

وانا معدية سمعت صوت رجالة اه والله صوت رجالة ف البلكونة

هههههههههههه طيب اخويا مسافر وابويا نايم ؟؟

مين دوووووول هما دول بقه الاشباح المستوطننين ف بيتنا

وبيخبوا مننا الحاجات قلت اروح اتشرف بمعرفتهم

ببص كده طبعا ماهو انا شاطرة ف الكلام بس هههههههه

ببص من وراء الجدار الاقيهم بالفعل رجالة ياحلولى

حرامية دول ولا ايه ؟؟

لببست الاسدال ورحت ابص اكتر

لقيتهم مش ف البلكونة هما بره البلكونة بس بيعلقوا حاجات

اللمض والانوار بتاعة الفرح بقه وكان ده بيت اللى خلفوهم

ولا استئذان ولا دياولو

ماهو ايه بقه ده فرح واحد من اكبر العائلات ف البلد

طب طظظظظظظظظظظظظظظظظ بقه

والله لولا انى كنت خايفة ان يعملوا حاجة فينا لانهم مجرمين

كنت فضلت اسخن ف بابا لحد ماعملهم بلاغ ف القسم

بس خوفا عليه هو واخواتى وماما والله

سكت .. وقفلت البلكونة شيش وازاز ونمت

كل ده حلو

يوم الفرح بقه .. من ادان المغرب وانا واقفة ف البلكونة الاقى البشاير

اشكال مايعلم بيها الا ربنا واقفة تلف سجاير تحت بلكونتنا

اشكال مايعلم بيها الا ربنا دخلت شارعنا وانتشرت

اصوات غريبة ف الجنينة بتاعتنا واذ اكتشف ان الجنينة بقت تواليت

وقمة ف القذارة ..

طبعا افرح بدأ الساعة 12 بالليل وانتهى 6 صباحا بخناقة حقيرة

غير اننا مش جايلنا نوم ولا طايقين نقعد ف البيت

طلعنا الروف ف الدور الخامس ياحضرات

الاقى سحابة فظيعة من الدخان الا وهى

دخان الحشيش والمخدرات ..

انا اتسطلت قعدت خمس دقايق اتسطلت لكم ان تتخيلو ا

احنا تانى بيت ف الشارع

والمفروض ان يفصلنا عن الهلمة دى كلها بيتين تانى

وباقى ناحيتنا كلها منصوب ففيها الفرح

انا حاولت اصور لكن مانفعش من كتر الاضاءة

ومن الدخان كان مغطى المنطقة

كل ده ممكن تستحمله لكن تدخل شارعنا

رقاااااااصة

كده كتييييييييييييييييييييييييييييييييير بجد

اه ياشارعنا يا حبيبنا يامحترم يا هادى

الناس عايزة تفرح براحتها لكن مش ع حسابنا احنا

تلات اربع الناس الكبار ف السن وبيشتغلوا

ماراحوش شغلهم من قلة النوم

قلة زوق متناهية واستغلال اننا سكان مش

بتوع مشاكل ومحدش هيقدر يتكلم

ع الاقل استئذن من البنى ادمين اللى ف الشارع لا طبعا ليه ؟؟

ع اى اساس اننا نستحق التقدير مثلا ولا ايه ؟؟

الاغرب بقه بتكلم قدام الناس ف الشغل

لقيتهم بيقولولى ياسلام انتى زعلانة اوى ما احنا ياما

اتعمل قدام بيوتنا وف شوارعنا وحاجات اقذر من كده

قلتلهم سكتوا ليه ؟؟

قالولى ولا انتى تقدرى تتكلمى قبل ماتفتحى

بؤك هيكون شارى الشارع باللى فيه

كله بفلووووووسه ..

يحرق الفلوس اللى تعمل ف الناس كده

هو يعنى معنى انك معاك فلوس ماتحترمش الناس

طيب اديك اتشتمت لحد ماشبعت ده اذا كنت بتشبع

واخدت دعوات هتكفيك لحد ماتموت وزيادة كمان

اللى غاظنى سلبية الناس وجبنهم اوى

وكله يجى يسخن ف بابا لانه مش من البلد

علشان يروح لوحده يشتكى وطبعا البيه

المصون صاحب الفرح لو هد البيت فوق دماغنا

محدش هيتكلم كاننا كلاب ولا روحنا ولا جينا

بقينا بنصبر ف بابا علشان ماتحصلش مصيبة

والكل مش عارف ينام ومتغاظين وبس

بيتكلموا من ورا الراجل واول مايشوفوه

الف مبروووووك وهاين عليهم

يتحزموا وينزلوا يساعدوا الراقصة المبجلة

اه يابلد مافيهاش رجاله ..

جتكوا القرف ستين مرة

ادى الاستغلال ف ابشع صوره

والجبن ف اببشع صوره

والتعدى ع حرية الغير ف ابشع صورها

فاكرين ايام احتلال الانجليز للبلد شفتوا كانوا

بيصوروا مناظر الذل والمهانة ع المصريين ازاى

انا شفت ده يوم الفرح .. بجد قرفت اوى اوى اوى

ومع ذلك مقدرتش اتكلم ماهو مش كل مرة احنا بس اللى بنتكلم

الوضع ماشى لينا كلنا واحنا الحمد لله كنا اقل المتضرريين

احنا كمان للاسف قلنا .. واحنا مالنا :(

صدعتكوا بس معلش ماليش غيركوا افضفض معاه

يلا بالإذن بقه