احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الاثنين، فبراير 14، 2011

كل يوم واحنا ف حب مصر غرقانين ..

من عمايل ايد .... мαησηα بالظبط الساعة 10:27 م 21 داقوا الشاى وقالولى رأيهم



انا بحب الحب ف اى يوم وف اى وقت 

بحس انه هو اللى بيخلى الواحد يقوم من نومه الصبح 

لو ماكنتش بتحب حياتك ماكنتش صحيت 

مش لازم يكون ليه يوم معين ومش

بقول لاصحابى ف يوم الفلانتين 

او يوم الحب المصرى كل سنة وانتوا طيبين 

علشان اليوم ده 

لا انا بحسه تجديد او وقفة مع النفس شوية 

اللى بيكره حاجة يفكر بيكرهها ليه 

ولو حبها ايه اللى هيخسره

لما كنت ف المدرسة كنت بشترى بمصروفى كامل

بونبونى واشتريه من الرخيص علشان يبقى كتيييييير 

وطول ما انا ماشية اوزع عالناس بونبونات 

لما دخلت جامعة عملت نفس الحكاية 

لقيتهم بيقوللوى ف الجامعة ناس كتير 

اغلبهم مش اصحابى بس بيحبونى من غير مايعرفونى 

قالولى ان البونبوناية دى كانت بترفع من روحهم المعنوية

اوى كانت بتخليهم لو زعلانين يفرحوا

لو محبطين يبقى ف امل عندهم 

انا كنت بعمل كده علشان 

كنت عايزة كل النااس تحب بعضها

مش يحبونى انا 

والله على ماقول شهيد 

لما رحت الشغل السنة

اللى اشتغلنا فيها بحب كلنا كانت

من انجح السنين قعدت احاول اخليهم يحبوا 

بعض بس للاسف دايما الكره والانانية والغيرة 

بتنتصر

او يمكن انا كان نفسى قصير اوى 

ف الشغل ماكملتش

لما لقيت مابقاش فيه حب 

والله على ما اقول شهيد 




مصر وكل الفساد اللى حصل فيها 

كان لاننا مكناش بنحب مصر

حبينا الكرة ونسينا مصر

حبينا  الممثليين ونسينا مصر

حبينا نفسنا ونسينا مصر 

حبينا الانانية  ونسينا مصر 

علشان كده مصر  اوحشت وعجزت شوية 

بس الحمد لله فوقنا ورجعناها 

لابسة توب الشباب من تانى 

انا مابخرجش بس هاسالكم انتوا اكيد شايفين الفرحة 

اللى ف عيون كل المصريين عارفين دى ليه ؟

علشان رجعنا نحب مصر 

عيون كل الفرحانين دى عيون مصر المليانة حب 

عارفين يوم الخميس اللى قبل النصر مافرحناش ليه؟ 

مع اننا كنا مستنينها علشان ربنا 

كان مستنى يشوفنا بجد بنحب مصر

ولا بنعمل كده علشان نفسنا 

ولما حبيناها بجد وزعلنا علشانها بجد 

وبكينا  كلنا قولنا يارب

من قلوبنا وكلنا وقتها اخلصنا النية

والحب لمصر ربنا نصرنا 

والله اعلم انه مجرد تخمين



النهاردة يوم الحب العالمى

جاية اقولكم تعالوا نحب 

مصر بجد 

نجدد حبنا ليها بصدق من قلوبنا مش مجاملة 

وبينا ومعانا الحب هنخلى مصر جنة 

يندم عليها اللى فاتها 

اتمنى ان دعوتى توصل لكل مصرى
وكل يوم واحنا ف حب مصر غرقانين
اما انا  بحب مصر بجد وهاعمل كل اللى هاقدر عليه
علشان تفضل مصر حرة 

فوق جبين الدهر

اغلى درة
والله على ما اقول شهيد 




الجمعة، فبراير 11، 2011

العبور الخالد .. من الالم الى الامل

من عمايل ايد .... мαησηα بالظبط الساعة 9:29 م 0 داقوا الشاى وقالولى رأيهم

الجمعة 11 فبراير 2011  الساعة مش فاكرة كام 




قدرنا نفرح كل ام مكلومة بفقدان ابنها او بنتها 

الورد اللى فتح جناين مصر
حلفنا ان دمهم مش هيروح هدر

وقد كان وهيكون باذن الله

اثبتنا للعالم كله ان مصر عظيمة ان مصر حرة 

وهتفضل فوق جبين الدهر اغلى درة 

احساس مش نافع يتوصف 

استحالة حد يقدر يوصف هو كان حاسس بايه 

حاجة كده متنفعش تتقاس ولا تتقييم باى مقاييس 

فرحة بكرامتنا وعزتنا اللى كانوا وحشونا اووووووووووووى 

اشتياق رهيب لمصر حبيبتى الغالية 

احساس بفرحة شهدائنا ف قصورهم المنورة 

ف جنة الخلد  باذن الله 

الحمد لله الحمد لله الف حمد وشكر 

لا ده حمد وشكر بعدد ملائكة عرشه عز وجل

وعدد خلقه ولا يعلم عددهم سواه

وعبرنا العبور الخالد اللى باذن الله بدأ 

وباذن الله هيكمل وهتقوم مصر 

من تانى على حيلها 

مسنودة على خير اجناد الله فى الارض 

مسنودة على ايد واحدة  ايد جامدة ايد قوية اووى 

قوية بايمانها قوية بعزيمتها قوية بعنادها 
 
ايد عمر ماحد هيقدر يكسرها من تانى 

ربنا يقوينا ويقدرنا يارب اننا نبنى بلدنا من تانى 

كانت معكم انا وزى كتيييييييييير 

أنا بنت النيل..

وزهو الجيل ... 

بكل جميل تلقاني ..

في قمر الليل، وموج البحرِ ... 

وشمس الصحراء تراني .. 

في وجه الدنيا كتبوني ...

للغات الدنيا نقلوني ..

وإشتاقوا لي وأحبوني ..

أنا لست إمرأة عادية..

مصرية انا .. 

انا مصرية



صـــــــــــباحـــــــــــكم بطعم الحــــــــــريــــــــــــــــة الاصيل 




الثلاثاء، فبراير 08، 2011

هام وارجوو النشر ..

من عمايل ايد .... мαησηα بالظبط الساعة 10:12 م 2 داقوا الشاى وقالولى رأيهم


وغيرهم لا نعلم عنهم شيئا



عن الشهداء ووجع قلوب امهاتهم مش هتكلم تانى 

بس ارجو من كل واحد قادر يدافع بكل ما اوتى من قوة عن حقهم 

واللى بيتقال عنهم ياريت  مايستخسرش 

لو قابلك حد بيدعى عليهم زى ماشفت للاسف كتير 

وقفه وفهمه

لو عندك حد من اصحابك من اخواتك من قرايبك

مش فاهم فهمه مين السبب ف كل حاجة وحشة حصلت 

 اما عنهم فلن انساهم ما حييت 

وبدعيلهم وهافضل ادعيلهم  ولو نسيت 

ابنى وبنتى هيفكرونى لما اشوفهم ومستقبلهم منور

امى علمتنى دعوة حلوة اوى علشانهم

قالت ربنا يصبر امهاتهم على قد غلاوتهم 

يارب دعوناك كما امرتنا فاستجب كما وعدتنا 

ارحمهم ونور قبورهم وصبر ذويهم 

===========

ندخل ف الموضوع  بسكوتة اقترحت فكرة حلوة جداا 

جزاها الله عنا كل خير 

دلوقتى المصابين اللى ف المستشفيات 

دول محتاجين يشوفونا ويسمعونا احنا 

مش التليفزيون المصرى 

محتاجين يعرفوا  اننا بندعيلهم ومقدرين 

اللى عملوه ومقدرين انهم ضحوا بحاجات كتير اولها عمرهم 

محتاجين مش تعاطف منك لا محتاجين

عرفان بالجميل وكلمة حلوة يمكن يقدروا ينسوا بشاعة اللى شافوه 

باذن الله كل مجموعة تقدر تحدد المستشفيات

اللى قريبة منها وفيها مصابين وتروح تزورهم 

شكل المجموعة لوحده هيفرح واحد لا يعرفك

ولا تعرفه ولا عمرك شفته ضحى بصحته وعمره علشانك 

هما مش محتاجين كلمة شكراااااااا

هما محتاجين  وقفتك جنبهم 

تم نشر الفكرة على الفيسبوك 

واكرر الفكرة مش بتاعتى دى بتاعة 

بسكوتة بنت فاتيما روح قلب ماما 

ياريت ماننساش ندعيلها جزاها الله عننا كل خير 

مبعرفش انظم ولا الحاجات دى بس تقدروا تنظموه

زى يوم مستشفى الدمرداش كده ياريت 

يدخل ف نطاق تطبيق الفكرة امهات الشهداء واسرهم 

جزاكم الله كل خير 

ارجو النشر 


الاثنين، فبراير 07، 2011

اسباب الثورة ..

من عمايل ايد .... мαησηα بالظبط الساعة 9:15 م 2 داقوا الشاى وقالولى رأيهم


درسنا النهاردة يا اولاد عن ثورة  25 يناير 2011

التعريف بالثورة : 

فى يوم اسود ماطلعتلوش شمس مصر اتحسدت  من ذووى العيون الصفرا المدورة
والعين يا حبة قلبى جت ف الزعيم محمد حسنى مبارك
وده لانه ماسمعش كلام مفتى الجمهورية وماكنش  بيخلى سوزى ترقية كل يوم 
اصله زعيم همام شايل البلد على قلبه مابينامش الليل ولا لاقى ياكل يا كبدى 
فداء للوطن مصر الغالية .وياما قالوله ياريس هتتحسد والله يقولهم بلا حسد بلا كلام فاضى.
جت نفس كده بينه وبين الـــ 83 مليون نسمة وقتها كانت مصر صغيرة يا ولاد .

الاسباب الحقيقية للثورة :
  1. اصدقاء السوق ( السوء ) اللى بنحذركم منهم ليل ونهار اللى اتلموا على جمال ابن الزعيم وبوظوا اخلاقه يا كبد امه .
  2. الحرية والديموقراطية اللى الشعب المصرى كان واخدها  آنذاك واثبتت فشلها كنظام تبنى عليه الدول مصائرها.
  3.  وباء اسمه الاجندات الخارجية اجتاح مصر ف هذا الوقت .
  4. الاحزاب السياسية اللى ماكنش فيهم نفر يعرف حاجة عن الثورة اساسا واستهبلوا وعملوا انهم هما اللى منظمينها.
  5. الانترنت العدو اللدود الخفى الشيطان  الذى غزا بيوت مصر بيت بيت .
  6. خيرى رمضان المذيع الرائع وانجازاته من خلال برنامج كانوا يذيعوه زمان اسمه مصر النهاردة .
  7. مرتضى منصور اللى كان بيدعو للثورة دى وكتب كتابين الله يباركله من 8 سنين واخيرا الناس سمعت لكلامه .
  8. محمد صبحى وده فنان كان قدير عمل يوميات ونيس ودى بقه اللى فجرت الثورة بجد .
     ولسه جارى اكتشاف الاسباب الحقيقة لما تكمل هابقى اعمل ابديت للاسباب دى 

    نيجى بقه للاسباب الظاهرية :
    1.  شباب اثبتوا ان مش كل الرجاله ماتت وخلصت فى حرب اكتوبر .
    2.  شباب عندهم ميزات - ( نخوة ورجولة وكرامة احساس بالمسؤلية  ) - اتضح انها لم تختفى بعد من المجتمع المصرى ف عصر مبارك العظيم .
    3.  شباب بيحبوا مصر بجد .
    4.  شباب زهقوا من الكلام وقالوا جه الوقت نعمل مش بس نتكلم .
    5.  شباب زى الورد مايعرفوش كلمة  ( وانا مالى  ).
    6. شباب رافض انه يتذل ويتهان  ف بلد الكرامة.
    7. شباب رفض انه يتسرق عينى عينك ويسكت .
    8. شباب ضحى بعمره علشان غيره يعيش كويس او بمعنى اصح يعيش زى البنى ادمين .
    9. شباب كنت اتمنى انى اكون منهم.

      والحصة الجاية نكمل تاريخ مصر ف عصر مبارك الاعظم 

      كانت معكم ميس منونا 


      السبت، فبراير 05، 2011

      كفـــــــاية بقى ...

      من عمايل ايد .... мαησηα بالظبط الساعة 9:31 م 14 داقوا الشاى وقالولى رأيهم






      اتخيل منظرك الان وانت جالس تضع قدمك اليمنى ع اليسرى وتقول لجمال 
      " انت السبب يا كلب يا ابن الكلب مكنا بنسرق ف الخفا محدش حاسسس بينا 
      انت واصحابك البايظين ادى اخرة اللى يمشى ورا العيال "


      كمان اتخيل منظرك وانت فرحان وسعيد بما يردده الببغاوات الذين يملؤن 
      مصر للاسف ويرددون خلف اتباعك مايلى من كلمات :
      •  الاجندات الخارجية
      • الرئيس كرامته من كرامتنا
      • الزعيم انه زعيم امة
      • استقرار مصر وامنها هيضيع لو تنحى الرئيس
      • انتوا مش فاهمين حاجة الدستور ماينفعش يتغير الا بعد ما الرئيس يمشى
      • ده ابوكم هترضوا يتعمل ف ابوكم كده

      كمان
       
      اتخيل منظرك وانت تعلم مايقوم به اتباعك ودلاديلك 
      بمنتهى الهبل وقلة احترام او حتى تأثر باللى حصل للناس
      وانت بتقرا كومينت لواحدة بتقول يااااااااااى كارفور اتحرق
      ولا السوبرماركت اللى جنبنا سرقوه
      ولا الابشع اللى بتقول ميدان التحرير باظ هانزل اتمشى انا ازاى دلوقتى

      واتخيل منظرك وانت بمنتهى العند وقلة الضمير شايف  ماتزعم انهم ابنائك بيتسحلوا وبيتجروا ع الارض
      وانت شايف من هرست رأسه المدمرات ومن مات بحجر
      وكانه من بنى صهيون
      وانت تتشفى وتقول الكلاب علشان يبقوا يتعلموا الادب

      اتخيل منظرك وانت بلا رحمة ترى اطفال السرطان لا يكملون علاجهم بسبب قلة الاعدادت ويتوالوا موتا الواحد تلو الاخر 
      وف نفس الوقت سيادتك او من يتبعونك 
      او من خولت لهم اتباع سياسة اشغلوا الشباب بيتفاوضوا 
      مع مدرب اجنبى بالمليارات او من ينظموا 
      المهرجانات السينيمائية انا لست ضد الترفيهة 
      ولكن انا ضد التدمير الغير مباشر للافكار والعقول
      والابشع اليوم ان اكتشف ان ثروة سيادتك لا تقل عن 70 مليار دولار 

       اتخيل منظرك وكلابك يصيحون باعلى اصواتهم انه صاحب
      نصر اكتوبر انه صاحب الضربة الجوية 
      سيادتك النصر كان لان الكل تعامل بحكمة وعقل وبتخطيط مش بضربتك الجوية
      حينها اتساءل وماذا اذن كان يفعل خالى الشهيد ف الصاعقة حين استشهد اثناء الضربة الجوية المنسوبة اليك وغيره من الشهداء ف جميع قطاعات الجيش

      سيادة الرئيس الم يحن ان نتخلى قليلا عن الانانية ونراعى
      هذا البلد الحبيب الذى تزعم انك افنيت عمرك فداء له 

      سيادة الرئيس الم يحن قلبك ولو لحظة حين رأيت صور
      الغارقين فى العبارة فى وسط المحيط 

      سيادة الرئيس الم تجرب نار  خطفة الموت حين اختطف
      حفيدك من بين احضانك 
      لماذا اذن لم تقم بواجبك كمسؤل عن هذا الوطن وراعى له 
      وعاقبت من تسببوا ف حرق قلب ام خطف ابنها من بين احضانها 
       ( خالد سعيد وغيره كثيرون  ) ولا ساعتها كان كلب وراح ؟؟

      الم ترى اطفالنا وقد ملئت المستشفيات بهم مرضى امراض
      لم نكن نتخيل مجرد خيال ان يمرض بها من هم قد شبعوا من الدنيا 

      الم ترى بعينك كم من اطفال تيتموا بسبب موت عائلهم
      بمرض الفشل الكلوى وفيروس سى والكبد الوبائى بسبب تلوث مياة الشرب

      الم تدمع عينك ولم يفطر قلبك على الشاب الذى مثل بجثته
      ف لبنان واخيرا بعد مرور عام تظهر برائته اى قتل ظلم 

      باى حق تطلب منا ان نرحمك وانت لم ترحمنا يوما 
      ما خلال رحلة من العذاب والذل والاهانة 

      باى حق تطلب منا ان نعزلك بكرامة وانت لم تحفظ لنا كرامتنا يوما ما 

      باى حق يطلب اتباعك ان تخرج معزز مكرم وبشرف من فعلا افنوا اعمارهم ف خدمة بلادهم 

      باى حق تطلب منا الانسحاب والخنوع والتراجع عما بداناه من ثورة غضب انت السبب الاول فيها 

      سيدى الرئيس الم تسمع قديما ان كثرة الضغط تولد الانفجار 

      ضغطتنا 30 عاما فانفجرنا ولن تستطيع تحمل تبعات 
      هذا الانفجار ولن تستطيع ايقافه ايضا 

      هل تتخيل انت منظرنا حين ترحل عنا 

      هل تتخيل مقدار فرحتنا بانتصارنا على الذل والعبودية
      اللى واخدين شكل شيك شوية عن شكلهم زمان 

      هل تتخيل مقدار فرحة كل ام مكلومة بنار ابنها
      اللى خطفوا من بين ايديها احد اسبابك 

      ارجوك انت بقه كفاية لحد كده كفاية عند وانانية 
       كفاية نهب ف اموالنا تحت بند انجازاتك

      كفاية بقى ارحم من ف الارض يرحمك
      من فى السماء ويمكن تلاقى حد يرحمك فى مصر

      سيادة الرئيس فاقد الشئ لا يعطيه 

      لم ترحمنا يوما فلن نرحمك 

      لم تكرمنا وتعزنا فلن نكرمك ونعزك 

      واخيرا هنيئا لك انجازاتك وانتصاراتك 

      وهنئيا لنا الخلا ص منك 


      مواطنة مصرية حرة لا ترضى الظلم ، الذل والهوان

      منى درويش


       

      ೋ واحــد شـاى ♨ Template by Ipietoon Blogger Template | Gift Idea