شئ ف قلــــــبى ..

فجر الخميس 29 / 7 / 2010

معرفش فيه ايه بس بقالى تقريبا اسبوع

حاجة خنقانى معرفش هى ايه ؟

حاجة مخليانى قلبى موجوع اوى

بقالى اسبوع ماببكيش

حتى ف وفاة جدتى

عيونى وارمة كأنى كنت ببكى

وصوتى ضايع ومش قادرة اقوم اقف

فاقدة احساس الوجود

انى اكون كائن موجود

عمالة افتكر ف حاجات حلوة حصلتلى

مع ناس افترقت انا وهما

قرايب واصحاب جامعة واصحاب شغل واصحاب نت

بحاول اضحك واخرج نفسى من اللى انا فيه ده

مش عارفة اخرج

محبوووسة جوه قفص الحزن والخنقة دى

زعلانة ومخنوقة ع ناس بحبهم اوى

مخنوقيين وحصلتلهم حاجات مزعلاهم

ومش عارفة اعملهم حاجة

عارفين حتى مش قادرة اسمعهم زى زمان

كنت زمان بسمعهم

مش قادرة استقبل لوم ولا عتاب ولا شكوى من اى حد

النهاردة جبت اسمائهم وحطيت الحالة اللى هما فيها

كلهم مخنوقيين

طيب يمكن تكون خنقتى دى ببسببهم

اصل انا كده اى حد بعرفه بيبقى ف وصلة غريبة

بينى وبين قلبه

وعقله

لو متضايق او مخنوق بحس بيه اوى

تخيلوا انا كده مع كل اصحابى وكلهم تعبانين

يكونش هو ده السبب

طيب اعملهم ايه علشان يرتاحوا وبالتالى ارتاح انا ؟

اول مرة اكره الصيف ..

 المرة دى جاى كئيب ورخم وطويل وحزيييييييييييين اوى

اوى اوى

يارب يارب بحق اسمك المرفوع ف كل مكان دلوقتى

بحق فجر اليوم الجميل ده

خفف عن كل اللى جوه قلبى احزانهم وهموهم

افرجها عليهم يا كريم

يسر امورهم واطرح الفرحة ف ايامهم اللى جاية

يارب اهديهم للخير

يارب وفقهم وبارك ف رزقهم

يارب ارزقهم رزق حلال طيب يغنيهم ويعافيهم ويرضيهم

يارب انت الوحيد العالم بحالهم وحالى

حقق لنا كل اللى بنتمناه واجعلنا الخير ف كل خطوة نخطيها

يارب انت عارف بحبهم قد ايه

ع قد حبى ليهم اديهم فرح وهنا

يارب اللهم اميييييييييييييييييييييين



----------

اخواتى .. يا اصحابى .. ارجوكم افرحوا وغيروا المود ده

ارجوكم هونوا ع نفسكم

يا اخواتى الهم بياكل عمرنا وهو اصلا قصير مش ناقص اكلان

ارجوكم فوقوا منه قبل ما نصبح نلاقيه قافل ع قلوبنا


******



شيروه علشان يوصل لكل حبايبى

 ساعدونى اتخلص من الوجع اللى ف  قلبى


انا بحبكم ف الله جدااااااااا جدااااااااااااا

ربى يجعل صباحكم ســــــكـــــــر




 

اعتذار ..

إعتذر !!

ولكن يا ترى هل يكفى الاعتذار ؟؟

 

 

 

منى درويش 

22 / 7 / 2010 

البقاء لله ..

السلام عليكم ورحمة الله وبركاته 

اسألكم الدعاء لجدتى بالرحمة والمغفرة 

وان يخفف ربى عليها وحشة القبر 

واسأل الله لى ولكم حسن الخاتمة 

يارب اللهم امييييين 

-----------------------

شكرا يا كيارا بجد مش عارفة اقولك ايه

يارب عمرى ما اعزيكى ف عزيز عليكى يارب اللهم امين 

-----------

دكتورة ستيتة 

مينا 

الحب الجميل 

اشكركم ع تعازيكم 

وبعتذر عن عدم نشر التعليقات 

---------------

شكر الله سعيكم جميعا ويارب ما  اعزيكم ف عزيز عليكم 

شكرا 

حدث ف مثل هذا اليوم ... + تحديث

تحديث 

البوست ده تاريخه 23 يوليو 

انا بعتذر يا رامى انه ما اتنشرش يوميها 

بس للاسف حصلت الظروف اللى انت عارفها 

مع انى كنت عملاله نشر  بس ما اتنشرش 

انا اسفة





-------------------------

يا اهل بلوجر الطيبين 

كيفكم وكيف اخباركم 

ان شاء الله تكونوا بخير وف احسن حال كلكم يارب

النهاردة كل الناس هتقوم 

مبسوطة جدااااااااااا ليه علشان ف سنة 1952 قامت الثورة 

 ثورة يوليو 

شهر عظيم والله شهر يوليو ده 

انا والثورة ف شهر واحد هههههههههههه

ف حد النهاردة هيقوم 

 يقول كل سنة وانا طيب 

وبما انه بجد انسان انا بعتز بيه وبجد حد زوق جدااااااااا 

ومابيقصرش ف اى واجب ومتابع جيد للتدوين  واهله 

حبيت نعمله حفلة صغيروة يارب تعجبه 

بمناسبة عيد ميلاده الــــــ 31 

كل سنة وانت طيب يا رامى وسامى سابقااا ههههههههه 

رامى فوزى صاحب مدونة بابى 

كل سنة وانت جميل وطيب وزوق ومجامل ومعانا ف وسطينا 

وعقبال مليوووون سنة يارب 

ودايما بحب اقول كده يارب السنة دى وهى ماشية

تاخد ف ايدها كل الحزن والهم اللى ف عمرك 

والسنة اللى جات تيجى بكل الفرح والهنا والخير اللى ف عمرك 

يارب اللهم امييييييييييييييييييييييين 

كان نفسى اعملك كادوهاية بس انا والله مسافرة دلوقتى 

انا كتبت البوست وعملت انه يتنشر ف ميعاده 

وبعدين انا قلت الحق اعمله علشان الكادوهات اللى هتيجى بالنص هههههههههههههه 

اتفضل يا سيدى ادى التورتاية 

وكمان جبتلك كادوهات بس  خلى بالك بقه هيبقى فيهم الطمع ههههههه 

دول فيهم كل اللى نفسك فيه اه صدقنى 

ولو مش فيهم جاملنى وقولى انهم فيهم ههههههههههه 

كل سنة وانت طيب يا سامى ويارب السنة الجاية يكون معاك نصك الحلو

ونفرح بيكوا انتوا الاتنين يارب اللهم امييييييييييين

مـــــــــــــوت

كان قراره بالانسحاب من حياتها

يعنى لها احد الخيارين : اما الذهاب لاحد الدجاليين لفك العمل المعمول لها

او 

الموت 

فكان الموت لها اهون

-----

تررررن

- الو  استاذ فلان ؟

- اهلااا اهلااا .. اخيراا .. وحشتينى

- انا موافقة

- ايه ؟ ايه غير رايك فجاة كده ؟؟

- قولتلى فكرى .. فكرت .. وقررت .. وببلغك بقرارى !!

- مقتنعة ؟

- ف نفسها ( هتفرق معاك اوى )

انت شايف ايه ؟

-  شايف كل خير  .. يوم الخميس الجاى مناسب ؟

--------------

بعد مرور 25 سنة 

بعد ما ودعها الوداع الاخير

اكتشف انها اختارته  موتا

وقد كانت له كل الحياة

----------

اخر ماسطرته ف مذاكراتها  ..

"  اخترتك موتى .. فكنت احلى موت فى الدنيا .. سامحنى  "

---------- 

منى درويش 

30 / 6 / 2010 

قصيرة اهون اهون علشان

محدش يقولى يا رغاية

ههههههه 

اخيرااااااااا انا جيييييييييت

انا جيييييييييييييييييييييييييييييت

اولا انا اسفة جدااااااااااا ع قلة زوقى
 
وعدم الرد ع اى تعليق من تعليقاتكم

مش عاملة مهمة ولا حاجة بس  انا

كنت وحشة اوى رغم انى قد ابدو

 بضحك وبهزر

لكن ربكم الوحيد العالم بالنفوس

ثانيا : انا بجد كتير اوى اوى

الاطراء اللى بيقولوا محمد وفاتيما

 
 ودكتورة ستيتة

وكلكم بجد بجد كتير انا ما اجيش جنبكم

 حاجة والله

الفضل لربنا ومن بعده محمد لانه لو انا

 عملت حاجة كويسة

ف دنيتى هتبقى هى دى الحملة دى ويمكن تكون

باب اعمل منه خير ع طول باذن الله

ثالثا :

انا مش هاكتب بوست واقول ايه اهمية نقل الدم
ولا هاقول ان ده خير وانه زكاة عن نفسك

بس هاقول كلنا دلوقتى مصريتنا بانت اوى ظهرنا كمصريين

كلنا اه يا محمد هنبقى معاك وبعدين مالقيتش حد معاه حتى انا

بس هو عارف ظروفى

دلوقتى هو مشروع سهل خالص

هنعمل قاعدة بيانات لكل محافظة باسماء متبرعين

اللى يقدر يتبرع ويكون متواجد ع طول يعنى سهل الوصول اليه

يتفضل يملأ الاستمارة دى ويكون ربنا جزاه
كل خير انه حتى نوى يعمل خير

ولا بنطلب منكم فلوس ولا مجهود

دى دقيقة هتملا فيها استمارة ووقت بقه مانحتاج لمتبرع

واظن وقت ما هتلاقى حد محتاجك مش هتتاخر

ده انت يا سيدى ويا سيدتى بتبرعك ده هتحيى نفس

ومن احيا نفس كانه احيا الناس جميعا

مااعتقدش ان ده شوية

مستنية تفاعل يا جماعة

انا اللى بطلب منكم تساعدونى اعمل خير ف حياتى يمكن ربنا يكرمنى

ويرزقنى خير ويهديلى نفسى ع ايديكم

يعنى هتعملوا خير اوس اتنين

يلا انا عايزة لو سمحتوا الاستمارات تنزل ترف عليا

وعارفة انكوا مش هتكسفونى

جزاكم الله كل خير

بحبكم ف الله كلكم

اختكم منونا

معلومات مش اكيدة ..

ياريت ما بتعمر بيت

تحفة لابعد الحدود

---------

بعتذرلكم عن تقصيرى وعدم ردودى عليكم

واهمالى كمان لـ واحد شاى

لكن سامحونى انا بس مشغولة جامد جداااااااا

ادعولى بس ماتنسونيش ولاتزعلوا منى

بحبكم ف الله 

كل 29 سنة وانا طيوبة ..

سالخيييييييييييييييير عليكوا كلاتكم نفر نفر

يارب كلكم تكونوا بخير وف احسن حال

منذ دقائق قفلت الــ 28 سنة بالتمام والكمال

والهم والغم والفرح والحب والخير

بكل حاجة حلوة وكل حاجة وحشة

وبدأت عامى الـــ 29

بدأته بصفحة جديدة

ف كل حاجة ف حياتى ان شاء الله

من اسبوع او اربع ايام لقيت الفيسبوك باعتلى

مش عارفة ايه كده بيفكرنى بعيد ميلادى

 وبيقولى اتمنى امنية بخصوص شوية كوارث ع مستوى العالم

 من ضمنهم كان مرض السرطان اخترته لانى حسيته ابشعهم

 الباقيين كانوا بخصوص مجاعات و حاجات من دى

 انا لقيتنى بختاره والمفروض انى هابعت للناس اصحابى

 واطلب منهم يتبرعوا بدولار لكل سنة من عمرى

 يعنى 29 دولار ههههههه

 طبعا اخدت فيه النصيب من اللى

 اتبعتلهم الرسالة ههههههههههههههه

 بس احب اقولكم انا ماكنتش

 اعرف ان الموضوع فيه تبرع وبتاع

 انا قلت اللى توصله الرسالة يحاول يدعى

 او لو قدر يعمل حاجة

 من اللى ف رسالتى يتفضل يعملها

 اعتبرتها تذكير للناس بالمرض اللعين ده

  لانها ماوصلتش غير لـ 29 بس من اصحابى :(

 

  كان نص رسالتى الاتى :

" النهاردة عيد ميلادى بقه عندى 29 سنة

والله اعلم هاقدر اعيش 29 سنة  تانى ولا لأ

يمكن اموت فجاة او يمكن يجيلى المرض ده

المرض اللى بيخطف الحبايب من وسط الحبايب

بيخطف عمرك وبيخطف حلمك وبيخطفك

انت نفسك من دنيا حتى لو كنت كارهها

 اهو كنت عايشها

بتمنى ف يوم ميلادى

 ان ربنا يمحى المرض ده من الوجود

وبدعو كل واحد قادر ع انه يقدم حاجة تمنع

 او تساعد ف مهاجمة المرض ده مهاجمة مببيدة

يتقدم ويساعد

وبتمنى من كل دكتور انه يكون

رؤوف بالمريض اللى يقع تحت ايده

ويحاول يفهمه انه مرض زيه

زى اى مرض تانى لو نفسيتك تعبت واستسلمت له

هيلتهمك لكن لو قاومته مش هيقدر عليك

بتمنى من اهل المريض ماييأسوش

ويبدأو يتعاملوا مع مريضهم ع انه

ميت فاضل كام يوم ويفارقهم

لا شجعوه انه يتعالج ويقاوم بكل قوته وقوتكم

بحبكم للشخص ده وع قد

ما انتوا عايزينه وسطكم خلوه يقاوم

ويارب يارب ماحد يصاب بيه ابداااااا

لا عدو ولا حبيب

يارب اللهم اميييييييين

خلصت رسالتى وامنيتى ف يوم ميلادى

---------------------

ده بوست يوم ميلادى السنةاللى فاتت

نفس امنياتى اللى تخصنى هى

هى مش هاقعد كل سنة اكررها بقه

ههههههههههههه

دوووووووس هنا 

--------  حصاد الــ  28  -------

الحمد لله بفضل ربنا

ماخسرتش حد من الناس اللى عرفتهم

كسبت كتيييييييييييييييير

ناس بجد عشقت وجودهم ف حياتى

اتغيرت الحمد لله زى ماطلبت من ربنا

بقيت اقوى بقيت بكتب شعر هههههه

اه وربنا والمفاجاة انى بكتب قصص قصيرة

هانشرها قريبا وهتقروها هتقروها هههههه

" سمعاك ياللى بتقول منونا وقصيرة ازاى يعنى "

عارفة انى رغاية بس بجد هى قصص قصيرة

وبعدين انتوا اللى قعدتكوا حلوة اوى

بتخلوا الواحد نفسه تتفتح للكلام

ههههههههههههههه

سيبت الشغل وتفرغت باخد هدنة وبابنى نفسى من جديد

بس واخدة ف اعتبارى خبراتى من الشغل ف الحياة

الوقت اللى هاقعده من غير شغل

هاستغله استغلال كويس باذن الله

مش هاقول انا هاعمل ايه انا هاعمل ع طول

وربنا يقدرنى ويقوينى يارب

------  كلمتين وبس  -------

بابا حبيبى وماما حبيبتى

تعيشوا وتفتكروا اليوم الحلو اللى انا جيت فيه ده  :)

انا اسفة انى لحد دلوقتى مش قادرة

اتنازل عن اى حاجة ف دماغى

علشان انتوا تفرحوا بيا وتطمنوا عليا

صدقونى انا وسطكم ف امان

عن اما اكون مع واحد وخلاص

انا اسفة انى مش قادرة اتجوز وخلاص

واجيب ف عيال تملى البيت هيصة وتقرفكم ف عشيتكم  :)

بس والله والله والله لتفرحوا بيا وراسكم مرفوعة

وتتباهوا بجوز بنتكم باذن الله

والست اللى قالتلك يا امى

" هى بنتك فاكرة نفسها صغيرة دى فاتها القطر "

- مش عارفة انتى مش طالعة لى ليه كنتى قوليلها قطر يلمك -

 بكرة تقوليلها اهى بنتى وجوزها وعيالها

اهى صبرت ونالت

 " مش عايزة ادعى عليها الولية دى هههههههه

اهى صاحبة عيال بردو وبعدين

 لو دعيت عليها ربنا هياخدها

وهى عايشة اصلا بتكفر ذنوب جوزها

هههههههه اسكت يا لسانى "

سامحونى وبعدين ادينى مونساكم

والله بكرة تفتقدونى اشبعوا منى

 يمكن اتجوز ف السنغال ولا حاجة

وماتشوفوش وشى تانى ههههههه

==============

محمد اخويا :

حبيبى انا وتاج راسى ياللى مالك زى ف الدونيا كلها

اختك جدعة اوى وهتفضل طول عمرك فخور بيها اوى

انا بحبك اوى ربنا مايحرمنيش منك ابدا

===========

سمو الاميرة الجميلة سارة

اميرة قلبى انا بحبك اوى

مش عارفة اقولك ايه ع وقفتك جنبى

ومش عارفة بجد من غيرك انا كنت عملت ايه ف الدونيا

ربنا يخليكى ليا ومايحرمنيش منك ابدااااااااا

===================

اصحابى

بحبكم بجد كلكم

بحب دلعكم ليا بحب احساسى انى انا الصغنونة

الدلوعة الرقيقة البنوتة اللى كل يوم

تيجى تعيطلكوا من حاجة الدونيا زعلتها فيها

بحب اوى عيالكم وخناقتكم

مع اجوازكم ع مين اللى هيكلمنى الاول

ويلحق يقولى كل سنة وانتى طيبة يا منمن

بحب صحوبيتى ليكم

بحب جنانكم وبحب انكم مستحملينى اوى

وانا مطلعة عينكم

بحب تسمياتكم ليا ع موبايلتكم

انا بجد من غيركم ولا حاجة

ربنا مايحرمنى منكم ابدااااااا

تسمياتى ع موبايلات اصحابى هنزل بيه بوست

اينعم كنت مصدومة بس ضحكت بجد ضحك عليهم

يلا ربنا يسامحهم يارب

=============================

اصحابى المدونيين

مش هينفع اقول اسامى لانى هانسى اكيد اسم

انا بجد بجد ممتنة ليكم جدااااااااااااا

غيرتونى علمتونى نورتونى خليتوا

 عندى امــل ف كل حاجة حلوة

خليتونى قوية اوى خلتونى طيبة اوى

خليتونى جدعة اوى خليتونى جميلة اوى

ايوووووووووون

حليتونى لانكم بجد بجد جوايا ف قلبى كلكم

انا اتعلمت من كل حد اهتم بالبوست ده وقراه

حاجة جديدة

شكلتونى  ولونتونى بلون الفرحة

انا لو قعدت اشكركم من هنا لحد 29 سنة كمان مش هيكفى

انا بحبكم اوى وبدعيلكم كلكم بجد مش بنسى حد

نفسى ربنا يحققلكم كلكم كل اللى بتتمنوه

======================

نصفى الذى سينصفنى ع العالم : 

" سأظلُّ أحلم دائما بذلك الفجر الأزرق الشفيف

وأنت نائمٌ على الأريكة

 وأنا افتح النوافذ

 وأصغي للأذان وأقترب منك

 وأصغىِ لصوت أنفاسك

 وأغفرُ من أجلك للعالم كلَّ ذنوبه

 ***

 أيها البعيد كذكرى الطفولة..

 القريب كأنفاسي وأفكاري ..

 أحبك .. أ ح ب ك

 **  كان نفسى تكون معايا النهاردة  **

 عارف من زمان اوى من يوم

 مابقيت بنوتة بتحلم بنصها الحلو

 وانا نفسى ابقى زى بقيت البنات

 معايا شخص واحد ليا انا بس

 احسه فرحان بيا انا بس

 بيحبنى ويحسنى ويفهمنى ويسامحنى

 اسمع يومها منهالكلمتين دول

" كل سنة وانتى طيبة وحبيبتى و معايا كل دنيتى "

لا ويقولى كمان بحبك جداااا :)

مش عايزة هدية كفاية ان ربنا هدانى بيك

وان الدنيا كلها حلوة بوجودك فيها

بس معلش بقه يمكن السنة الجاية تبقى موجود

============

خالد  .. همس الاحباب

احمد .. ابو حميد

وليد .. هى وظروفها

مصطفى ريان .. يوميات شاب ثائر

محمد الغرباوى .. رحلة البحث

محمد كمال ..  احلى صوت من مصر

 عسقول .. مش عارفة مدونتك

فاتيما .. روح قلب ماما

نوران ..  مش خيخة ومش اى كلام خالص

بسمة .. بكرة يبقى عندها مدونة  :)

انا لو قلت شكرا هابقى عبيطة اوى

مش هتكفيكم كلمة شكرا

بس هاقولكم ع قد الفرحة اللى فرحتوهالى امبارح

ع قد منا كنت سعيدة وراجعة معنوياتى مرتفعة

ع قد منا بحبكم يارب ربنا يسعدكم ويهنيكم

انا اصلا مش عارفة اقولكم ايه غير بجد

كان من احلى ايام حياتى

ختمت بيكم 28 سنة من عمرى وكان ختامهم مسك

وبدات بيكم عمر جديد معرفش قد ايه ؟

بس هيبقى حلو اووووووى

لانكم وش الخير ووش السعد ع اى حد تعرفوه

انا بحبكم جداااااا ربنا مايحرمنى منكم ابداااااا

-------------------------------

اخر كلامى

لا مش هترتاحوا منى ههههه

النهاردة يعنى بس

لــــ "  ربنا "

مش لانه اخر حاجة افتكرتها لا

انا حبيت اعدد نعمه عليا وافكر نفسى بيها

النهاردة يارب اكتشفت ان انا المفروض ما ازعلش خالص

النهاردة انا مش لوحدى خالص انا معايا ناس كتير اوى

بتحبنى من قلبها مش عايزين منى غير بس الحب ف الله

بجد النهاردة انا عرفت قد ايه انت بتحبنى

الف حمد وشكر ليك يارب

-------------------

يلا بقه كفاية رغى

كل واحد يروح يجيبلى شوكولاته

وكانزاية ويجى يقولى كل سنة وانتى طيبة يا منمن

حاجات كتيررررررررررة ..

سالخيييييييييييير عليكوا كلاتكم نفر نفر 

كان نفسى ارد ع تعليقاتكم ولكنى مهدودة ومتكسرة

ومتدغدغة ميت مليون حتة

وحشتوووووووووووووونى كلكم وبعتذر 

ع  تقصيرى ف الفترة اللى فاتت 

ولكنها ظروف خارجة عن ارادتى خير ماتقلقوش 

 ان شاء الله كل مواعيدى هتتظبط وربنا

يسهل واتابعكم باذن الله بانتظام 

==============

بالمناسبة الاخ اياه ماعلقش عندى ولا تعليق 

من بعد مانزلت بوست انا مابتهددش 

ولابقه بيحاول يضيفنى ع الفيسبوك 

ربنا يهدى يارب 

ومن هنا بقول ياجماعة بليييييز ماتوقفوش

تدوين علشان حد مش كويس ضايقكم 

اعتبروه حد معدى ف الشارع وبيشتم 

شوية وهيمشى ف داهية 

ليه تخلى حد يجبرك ع قفل بيتك والمكان اللى انت بترتاح فيه 

وياريت تعملوا اشراف ع التعليقات 

ع الاقل لو ماكنتوش موجودين 

محدش يدخل من الناس المحترمة ويتأذى

بالفاظ  مش محترمة مالوش ذنب يقراها

==============

فاضلى يومين :((

=================

اه صحيح 

ده مايو خلص ..

ويونيو خلص  ..

ولســــــــــــــــــــــة بردو ... :)

====================

مرتاحة نفسيا جداااااا الحمد لله 

راضية عن نفسى 

ومش زعلانة من حد 

ولو مزعلة حد سامحونى 

مقصرة ف حق ناس كتير 

لو ليا عمر هاعوضهم باذن الله 

===================

رايـــــــــــــقة اوى 

نازلة كايرو تومورو 

هاشوف حبيبة قلــــــــــبى باذن الله 

يارب يكتبلى لقائها ع رواقة 

========================

سماء 

وحشتينى 

الوحيدة اللى كنت بحس ف حضنك بالحنية 

رغم انك صغنونة اوى 

بس قسما بالله احتوائك ليا 

ماشفتوش ولا هاشوفه ف اى مخلوق ع وجه الارض 

============================

انا بحبها اوى روحى فيها 

عارف لما حد يقولك روحى فيك صدقه 

وهما بياخدوها من حضنى بقت بتقع 

وانا بقيت بقع ف الارض 

مشهد انتزاع طفلة من حضن امها 

احنا الاتنين كنا امهات بعض وبنات بعض

سماء 

مش قادرة احب غيرك 

==========================

ماكنتش اعرف انى مديرة شاطرة 

ومحبوبة 

ومستغربة ان صوتى و شخطى ونطرى 

وزعيقى وحشكم 

انا كمان بحبكم اكتر ما انتوا فاكريين 

وماكنتش اعرف يا بنات انى كنت مصدر راحة ليكم اوى كده 

انا اســـــــــفة

  اذا كنت اخدت قرار غلط 

بس صدقونى كنت تعبت اوى اوى 

وماكنش فيه حل غير 

البعد والفراق 

اللى للاسف هيبقى للابد

========================

ساعات كتير بحس انى بحب ناس 

ماتستاهلش 

مش عارفين قيمتى 

ولا عارفين انا ف حياتهم ايه 

يمكن تحسوا ده غرور 

لكن لما تعمل لحد كل حاجة بيحبها 

وساعات تيجى ع نفسك علشان خاطره 

وهو بس بيفكر ف راحته 

يبقى بجد 

انت خسارة فيه

========================

كالعادة مسافرة والله اعلم 

هارجع ولا تؤ 

وكالعادة بطلب السماح من اللى مزعلاه منى 

وهافتكركوا وادعيلكوا 

=====================