احدثكم من مصرنا الجديدة .. مصر العزة .. مصر الكرامة .. مصر الحلوة من النهاردة دي بلدك انت ماترميش زبالة فى الشارع ماتكسرش إشارة ماتدفعش رشوة ماتزوّرش ورقة اشتكي أي جهة تقصر في شغلها ما تمشيش عكسى ما تدخلش من باب الخروج في المترو ، ما تعاكسش البنات ماتقولش "وانا مالى" و راعى ربنا فى شغلك فرصتك تبني بلدك بإيدك انـشـر الحـمـله وسـاهـم في صناعـه مستقبل جديد للمصريـين قبل ماتمشى ادعى لمصر وشباب مصر

الجمعة، فبراير 01، 2019

لأ لأ .. لأ يا سعيد لألألألأ

من عمايل ايد .... мαησηα بالظبط الساعة 2:21 م






فاكرين فيلم الف مبروك

المشهد بتاع احمد حلمى وسعيد

انا كل ما اشوف الفيلم ده افتكرنى اصل كان ليا موقف شبهه

لالالالالالالالالا  استنوا بس ماتفهمونيش صح :)

انا حد بيتقرف من اى حاجة وممكن من اى حد بردو

وخصوصا الناس اللى لو لاحظت انهم

دخلوا التواليت وماغسلوش ايديهم

انا لما بدخل التواليت وانا خارجة بغسل الحنفية بالصابون وبعدين

اغسل ايدى وبغسل اوكرة الباب علشان

هامسكها بعد ماغسلت ايدى

وبعد ما بخرج استحالة اقفل الباب ورايا

ولذلك تلاقى صرخة من ماما وبابا  " قولنا ميت مليون

مرة الباب ده يتقفل بعد ما تخلصوا التواليت "

الكلام ليا انا واخواتى لاننا نسخة واحدة

 بيعملوا بردو نفس اللى انا بعملوا

مفتاح النور بقه بطفيه ازاى بعد ما بخرج من الحمام

بطفيه بكوعى ابعد مكان ف ايدى عن التعامل

مع اى حاجة ممكن تتاكل او تتشرب :)))

وكتتير بتكهرب بسبب الحكاية دى :((

بجد بحس ان التواليت مكان ملئ بالميكروبات والقذارة

 معرفش ليه هو احساس جوايا وخلاص

المهم وانا ف اولى ثانوى  كنت باخد درس فرنساوى

مع 9 ولاد وانا البنوتة الوحيدة ف المجموعة

هو كان درس تقدروا تقولوا عليه شبه خصوصى

كان الدرس ف الدور السادس ف عمارة مسيو جمال

هى عمارة كبيرة ماشاء الله هو واخد السطوح عامل شقة ليه

وباقى السطوح عامل قاعدة ظريفة كده كنا بناخد فيها الدرس

المهم كان ابن اخته اسمه محمود  معانا ف المجموعة

وساكن ف نفس العمارة بس ف الدور الاول خالص اللى منه ع الجنينة ده

كنت انا اشطر واحدة ف الفرنساوى ع مستوى المدرسة كلها ع فكرة والله

قبل ما ابقى فاشلة ومحمود كان افشل واحد ف الفرنساوى

كان بنضرب به المثل ف الفشل دراسيا ف كل حاجة مش فرنساوى بس

كان دايما بيكرهنى والله العظيم وقالى انا كنت بكرهك

الدروس عندنا بتبدا ف شهر اغسطس يعنى زى اليومين الحلوين دول

ف يوم الاقى محمود بيقول لمسيو جمال انا عايز اروح التواليت

وده طبعا هروبا من الحصة

راح التواليت ورجع ابص ع ايده ان الاقى نقطة ماية واحدة

 تبرهن لى ع انه غسل ايده

ابداااااااااااا

وشوية وقعد يلعب ف مناخيره 

وانا بتمزق من القرف جوات نفسى

والمشكلة انه قاعد قدامى غصب عنى ع مايجى

 دورى ف الاجابة ع الاسئلة لازم اتفرج عليه

المهم انا عطشت

وانا ف دماغى بقه كالعادة مسيو جمال

 هيروح يجيبلى من شقته زى كل مرة

وبيجيب لى كوباية وبتاع

كسل وف نفس الوقت كان عايز يعاقب محمود

راح قاله انزل هات ماية من تحت من عندكوا

ماتعديش ع اى شقة من الشقق اللى ف النص

محمود انبسط هيرتاح من الحصة شوية

نزل محمود وبعد ربع ساعة راجع

جايبلى ازازة ماية مليانة لحد النص

ريحتها سجاير تقرف

غير انه ماسكها ازاى حاطط صباعه جوه بوء الازازة

وماسكها من بره بايده

ال وايه بيقولى اشربى

قلتله لو هاموت عطشااااااا مش شاربة من الازازاة دى

ومحمود كان بيعزنى اوى اما صدق اتفتح فيا

يعنى تنزلينى 6 ادوار وف الاخر تتدلعى وتقولى مش هاشرب

وانا ساكتة واقوله اتلم يا محمود

يقولى لا بقه انتى فاكرة نفسك مين ؟؟؟

انتى هنا ف بيتنا يعنى دلع المدرسة ده تنسيه

كل ده والمسيو واقف بيتفرج ويضحك عليا وعليه

انا بقه صعبت عليا نفسى انه فاكرنى بتدلع

وقولتله " مش هاشرب علشان مقروفة  "

طبعا المسيو اتصدم !!!

قالى منى دى اختى اللى تحت ماتقلقيش

قلتله يا مسيو مش شايفة ماسك الازازة ازاى

يقولى عندك حق صح طريقة مقرفة

التانى مش يسكت لا رايح يقولى وانا ايدى فيها ايه يعنى

نضيفة اهى كنت بلعب ف الطين انا

قلتله " لايا فالح دخلت  التواليت وماغسلتش ايدك
 
عااااااااااااااااااااااااااا "

انا بعيط وال 10 رجاله واقفين متنحين 5 دقايق

 كده وبعدين

اتفتحوا ف الضحك

المشكلة بقه ف رد محمود قالى بمنتهى البراءة

 " انا ماكنتش بعمل بيبى "

يييييييييييييييييييييييييع كمان

اتاريه كان بيشرب سجارة ف التواليت :))

قالى كده بعدين

والله انا ما اعرف الجملة دى طلعت منى ازاى

بس انا من يوم ما عرفت المعلومة دى

وانا بنقرف من انى اسلم ع اى ولد او راجل 

حتى لما دخلت الجامعة كانوا

فاكرين انى مابسلمش عليهم تدين

وبعدين يلاقونى بتعامل عادى يعنى لحد

 ما محمود قالهم بتتقرف مننا ههههههههههههههه

اصل انا ومحمود وال 8 ولاد الباقيين

دخلنا جامعة مع بعض

وكلية واحدة وبقينا اصحاب جدااااااااا

 بعد كده لحد دلوقتى الحمد لله .

المشكلة ان من شب ع شئ شاب عليه

ماما بتتقرف اوى وطلعنا كلنا كده بننقرف

 الموضوع وصل معايا للوسوسة والله

  وانا صغيرة وماما علشان مش تخلينا

نشبط ف الحاجة بتاعة الباعة الجائلين

كانت تقولنا الراجل ده واقف طول النهار ف الشارع

اكيد بيلبى نداء الطبيعة طيب هيغسل ايده فيييييييييين ؟

طبعا مش بيغسلها ومن يومها ولله الحمد

لو ايه حصل مابشتريش حاجة من بره واكلها

حتى لما دخلت جامعة اخدت وقت كبير

اوى ع ما بطلت اخد سندويتشات من البيت

واشترى زى بقيت اصحابى من المطعم اللى قدام الكلية

والله هى حاجة كويسة الحمد لله

كل امراضنا بتبقى ناتجة عن العصبية وبتبقى ف الاعصاب

ما افتكرش حد مننا جاله ميكروب ف بطنه او كده

بس اتربت عندى عقدة فظيعة والله لحد دلوقتى

تلاقينى ابقى مطمنة اوى لو حد انا عارفاه وعارفه انه بيتقرف وكده

انما غير كده تؤ

يلا كل سنة وانتوا طيبين وبخير

اتفرجوا ع ده بقه دعم فنى للنوت :))

افــــــعص هــــــــــونا

21 داقوا الشاى وقالولى رأيهم:

Ramy يقول...

ههههههههههههه

بجد طب الحمد لله ان انتى سلمتى عاليا لما حضرت حفلت توقيع الكتاب (:

بس أنا بقرف على فكرة برضه

لدرجة تريقة صحابى

بس عادى بقى

يمكن دلوقت مش بقرف من كل حاجة

بس السجاير دى لا يمكن ابدا

ولا موضوع الحمام ده

لدرجة ان صحابى عمالين يدعوا عليا يا رب تجوز واحدة بتدخن

ههههههههههههه

دة انا وبتفرج ع الجزء فى السينما كنت قرفان اكتر من احمد حلمى (:(:


لألألألأ يا سعيد (:(:(:

جميل البوست

Ana keda يقول...

مسخرة والله يا منونا
وحشتينى يبت انتى ع فكرة والله
ودعيتلك كتير يا حبى
ايه يبنتى الوسوسة دى هههههههههههه
كان عندى واحدة صاحبتى كده
بس انا مش كده فى فرق بين النضافة وبين الوسوسة
انتى كده سنة يبنتى وهتتلحس دماغك
خلى بالك من نفسك يا بنتى
واشربى سوايل كتير يا حبيبتى عشان الصيام وكده
بحبك كتير

محمود(باحث عن حب) يقول...

السلام عليكم مدونه رائعه
بالفعل
عاوز اقول حاجه
معظم البنات فيهم العاده دى بس لما تكون متوازنه بتكون حلوة مش لدرجه الوسوسه
كلامك ادخل عليا السرور
ربنا يسعد قلبك
ميبارك عليكى رمضان

adel يقول...

ههههههههههههههههههههههه
ماشي ياسعيد

انا بقرف بش مش لدرجة الهسس دي :)

ELMOSTAFZ يقول...

و الله حضرتك حاجة بسيطة جنب اللي بشوفه من ناس كتير ، خصوصا ان انا ايدي دايما عرقانة و المنديل مش بيسيب ايدي ، عشان كده بطلت اسلم علي حد بس عشان قرفانله مش قرفان منه :) :)

FAW يقول...

معتقدش إن إنتي هتقدري تعيشي في مصر كتير لو فضلتي كده . .
إحنا شعب مقرف أصلا . .
فكرتيني بفيلم (Aviator) بتاع ليوناردو دي كابريو لازم تتفرجي عليه , ده مرض D:

قلــ"بـــلال"ــــــب فارس يقول...

iههههه
حاجه فعلا وحشه
بس اقولك شئ
مش كل الناس
انا لا ادعوكى ان انتى تسلملى
بس النظرة مش تعميميها
هههه

غير معرف يقول...

هههههههههههه

المهم شربتي نص الأزازه ولا ايه؟

فراشة يقول...

هههههههه ضحكتيني يا منمن نفس الحركات تقريبا بغسل الحنفية الاول وليا فوطة لوحدي بابا بيخاف يلمسها ونفس حركة الكوع دي ولحد كلية معايا ساندوتشاتي ولازم المناديل المعطرة وكمان بخاخ ديتول ف الشنطة عشان اتعقم قبل ما أكل وانا بره
ومبحبش امسك اوكر اي باب او الدرابزين بتاع اى مكان


بس اول مرة اشوف حد زيي محدش من اللي اعرفهم كدا ولا حتى قرايبي


"منى \ فراشة"

الشاعر الفنان أحمد فتحى فؤاد يقول...

السلام عليك

كل سنة و إنتى طيبة و بخير و سعادة

رمضان كريم

أنا رأيى دائما ... خير الأمور الوسط ... بس الوسط اللى فى جانب النظافة ... مش الوسوسة

ربنا يوفقك و يسعدك

دمتى بخير

محمد التركى يقول...

هههههههههههههههههههههههههههه
ههههههههههههههههههههههههههههه

جامد موت جته مليون قرف سعيد ومحمود
ههههههههه

أيه ياستى ده أنتى تغيبى وبعدين ترجع بنداء الطبيعه وسعيد ومحمود
أنا خلاص هقرف حتى من نفسى بعد البوست ده
أنتى فكرتينى بقى بأيام الكليه
هى حكايه مقرفه بس مش زى سعيد ومحمود
كنت فى سنه أولى جامعه وكان المدرج على تبه عينه ومحاضره محاسبه والدنيا فوق بعضها شبابا وبنات
وفجأة وبدون مقدمات أنقطعه الكهرباء والمراوح وقفت
وعينك ماتشوف الا النور
لا عينك ايه مرخيرك بقى ماتشم الا ...

ساعتها كرهت نفسى والدنيا
ياله بقى بلا قرف ايه السيره ديه
اللهم ما انى صايم

البوست جنان والفديو جامد شفت الفلم بس بحب حلمى

ماشى ياستى كل سنه وانتى طيبه
ورمضان كريم

تحياتى لقلبك الطيب

محمد التركى

Kholoud Kamal يقول...

هههههههه
و الله انت تحفففففففة

أع ـقل مـ ج ـنـونــة يقول...

هههههههههههههههه

والله تحفة يامنونة

تصدقي مرت عليا فترة كنت كدا

بس بعد كدا ظبطت نفسي بين الوسوسة والنضافة العادية

حطيت حدود وفروق وحاجات كدا زي ماتفرقي بين ايديكي اليمين والشمال بالظبط :D :D

كل سنة وانتي طيوبة ياحبيبتي

كــركــبــة دمـــاغ يقول...

ههههههههههههههههههههههههههههه

انتي عسل وربنا

انا فيا كتير منك ع فكرة في حكايه حنفية الحمام والباب

بجد بجد انا في حاجات كتير زيك كده

بس ساعات بحاول اخبيها لان في ناس بتزعل وخصوصا لو حد قريبي يعني

منعاً للحساسيه بقى بحاول اتظاهر اني عاديه الا اني فيا كتير منك بجد في الحكايه دي

وحشتيني ع فكرة

وبحبك

وانتي حته سكرة

كل سنه وانتي طيبه وبالف خير وصحه وسلامة وربنا يعود عليكي الايام بكل خير

Antika يقول...

بحب الفيلم ده اوى .. وكل ماشوف سعيد معدتى توجعنى
xD

احم .. طيب هى الوسوسة دى حاجة وحشة يعنى ؟
انا كنت قربت اصدق ان مفيش حد كدة غيرى .. خصوصا ف حركة الحنفية دى

مش لوحدى اهو ^^

مدونتك جميلة .. اول زيارة
:):)

Antika يقول...

بحب الفيلم ده اوى .. وكل ماشوف سعيد معدتى توجعنى
xD

احم .. طيب هى الوسوسة دى حاجة وحشة يعنى ؟
انا كنت قربت اصدق ان مفيش حد كدة غيرى .. خصوصا ف حركة الحنفية دى

مش لوحدى اهو ^^

مدونتك جميلة .. اول زيارة
:):)

Sam Sh يقول...

ههههههه
على فكرة ي منونة أنا برضه بغسل الحنفية برضه :)
بس موصلتش لدرجة إن أنا أغسل أكرة الباب
و برضه زيك .. بكره السجاير كره العمى و محبش حتى أمسك العلبة بتاعتها بإيدي

Timo.. يقول...

هههههههههههه..
منوناااااااااا
مش قادر اقولك اتقــ... قصدي اتبسطت قد ايه بالبوست ده :)
بجد ضحكتيني..
بس مش عارف ليه انا مش ليا نفس أكل ولا اشرب حاجة رغم ان باقي على المغرب دقايق..؟
ما تعرفيش ليه يا منونا..؟؟
(وش بريء جدااا)

لـــولا وزهـــراء يقول...

هههههههه
ضحكتيني يا منمن ...تدوينة جميلة ..بس خلي بالك لان الوسواس مرض نفسي
لولا

غير معرف يقول...

هههههههههههه
ضحكتينى والله يا منونه
بجد زى العسل
الا الحمامات دى
أنا عندى 3 فى البيت موريش غيرهم
بس انا مريحه نفسى ومخصصه ليا واحد لوحدى أنا بسسسسسسسسسسس
هههههههههه
كل يوم دعك لما أتهريت
الصراحه الا الحمام ولا الميه
بوست جميييييييييييييل ولذيذذذذذذذذذذذ جدااااااااا
وحشتينى ... هحاول أكلمك فى التجمع اللى نفسى موت أجيه بس اعمل ايه بقا ما باليد حيله
دمتى بكل خير يا قمر
كل سنه وانتى طيبه

totahabib يقول...

هههههههههههههههههههه
لا بصراحة هوا الوقف ده يقرف اى حد مش بس الناس المنقرفة يعنى ^^
اصل احنا الاسرة عندنا فسمين
ماما واخويا واختى منقرفين
وانا وبابا نفسنا حلوة
بس بجد البوست دمه شربااااااات

 

ೋ واحــد شـاى ♨ Template by Ipietoon Blogger Template | Gift Idea